¹ Ami igu nudumisa Febe,pangi wedu wu mugosuna,ayo sadi yi dimbundudiena gu Segeleya, ² Anu nufana gumu yamba pimbu mu kumbu yi Fumu Yisu Klistu,mu mpila yi pimbu yasantu,ye anu nufana gumu ngieba mu mapwisa menzi menzi makima amo mafana gulombuga gu nwena nu.Mu mwila yeyi kega ugumini nsadisi mu mwila hadu akima ye mu mwila ami beni. ³ Anu nuhani mbodji gwena Prisika ye gwena Akila,apangi ami mu gisalu gi Fumu Yisu Klistu, ⁴ Owu maga hulugidi mu lufwa mu mwila gubigisa moni wami.Ami ngiena mu gwawa madonzi mengi,,ye lo mbi ami buna,ha mabundu makima ma apaganu. ⁵ Hanenu kega mbodji gu dimbundu diena gunzu yenu,hanenu mbodji gwena Epayineti,pangi wami u luzolu,ayo gwena mu mwila Klistu lundumba lutegu lu Aziya. ⁶ Anu nuwi Madiya mbodji,yeyi maga sadidi gigola mu mwila anu. ⁷ Anu numuwi Andronikusu ye Ziniasi,adada ami,ye hadu agisalu mugu gamuga gwedu mu mwila Yisu,ena mfunu yingi mu gibudi gia antumwa,ye owu agakedi mu gisalu gi Fumu Yisu gumesu mami. ⁸ Anu numuwi Ampiyasi mbodji,pangi wami mu gimvuga gi Fumu wedu Yisu Klistu. ⁹ Anu numuwi Uribani mbodji,mbayi wedu mu gisalu gi Klistu,ye Sitasi,pangi wami u luzolu. ¹⁰ Anu numu wi Apelesi mbodji,gumumega mu kumbu yi Klistu.Nuhani mbodji gwena o akima ena munzu yi Arisitobule. ¹¹ Anu nhani mbodji gwena Erodio,dada wami.Anu nuhani mbodji gwena gunzu yi Nadisisi,aho ena mu gadji ga Fumu Yisu Klistu. ¹² Anu nuhani mbodji gwena Tidifeni ye Tidifozi,aba gusala gigola mu mwila Fumu Yisu Klistu.Anu nuhani mbodji gwena Pelezidi pangi wami mugosuna wu luzolu,yeyi maga sadidi gwingi mu mwila Fumu Yisu Klistu. ¹³ Nuhani mbodji gwena Rifisi,mudu waga ponini mu mwila Yisu,ye maya wenzi ena kega maya wami. ¹⁴ Nuhani mbodji gwena Asikiditi,Felezeyo,Edimesi,Padolobasi,Edimasi,ye apangi wo amosi ena gihani gimosi ye owu. ¹⁵ Anu nuhani mbodji gwena Filologi ye Jidi,Nele ye pangi wenzi wu mugosuna,ye Olimpe,ye asantu akima ena ye owu. ¹⁶ Anu nufana guhana gana mbodji yenu ye yenu mu beze.Mabundu makima ma Klistu maba gunuwa mbodji. ¹⁷ Mu dangu di ami iba gunu longa,mugu nunga gwena o agwingisanga guga bulagana ye masasa,mu gwenda de gumasina mi malongi amo menuga yambidi.Anu nufana gukala gudadi ye owu. ¹⁸ Mu mwila hadu agifa gio lo agu sadilanga Fumu wedu Klistu,ha owu agu sadfilanga vumu diowu beni.Ye mu malongi ma pwede ye ma wupala,owu agukala ye mamedji gu mizima miowu mu mwila hadu agonda gusala panzi. ¹⁹ Mbandu yenu lubogu lukadi mu mwila mudu mukima.Ami ngiena mu kiesi,mu gio,ami igazola mbi anu nukadi ndungi mu mapanzi mo mena pimbu,ye gubiya mbi mu mapanzi mo mabi. ²⁰ Nzambi wu ngemba magu lungusa diodi Sadani gushi milu mienu.Wegenu mbi ngolu zi Fumu wedu Yisu Klistu zikadi yanu . ²¹ Timoteyi,mbayi wami mu gisalu,ena mugu nuwa mbodji,ye Lukiusi,ye Zasoni,ye Sozipatedi adada ami. ²² Ami Teditiusi,ami isoniga muganda wu,ngiena mugu nuwa mbodji mu kumbu yi Fumu Yisu. ²³ Gayisi,mbuda wami ye yeyi wena mu mabundu makima,ena mugu nuwa mbodji.Erasiti,muswegi muganda mimbu,ena mugu nuwa mbodji kega pangi wedu Kaditusu. ²⁴ Wega mbi ngolu zi Fumu wedu Yisu Klistu zikadi yanu akima!Ameni!Gwena yo ufana gunu nuwa gikesa mu mbuga yi musamu wu pimbu ye mu mbuga yi malongi ma Yisu Klistu,mu ngwenzila ye gulesa mu mbuga yi gisalu gi ginswegi guhida miziga mingi,ha gilesa mana mu dangu di mu isoni ya ambigudi,mu mbuga yi gusungiga gu Nzambi Mpungu,ye mugwilesa gwena mudu mukima mu gifudji,mu mpila owu azidjisi lugwigilu,gwena Nzambi,ye buna wena ndungi,gukadi lugumu lu miziga ye miziga,mu mbuga yi Yisu Klistu!Ameni! ²⁵ Gwena ye wena ye gikesa mu gunu longa mu mbuga yimosi ye malongi mami,ye malongi ma Yisu Klistu,mu gudwadi samana mu gisala gi gulesa agio giga swegamanini nga mu fundu banda tama. ²⁶ Ha mu ndangu di,giogi gidi lesa ye gisalamana mu mbuga yi isoni ya ambigudi nga mu mpila yi mbuga yi Nzambi mpungu,mu luzidu lu misigu mu lugwigilu mu maganda ma gifudji. ²⁷ Nzambi buna wena ndungi,lugumu lukadi gwena Yisu miziga ye miziga,mu mbuga yi Yisu Klistu!Ameni!