¹ Yambenu hadu o ena awa guhela mu lugwigilu,ye anu lo nufana gusaga gana miaga mu mapanzi mapamba. ² Amosi munu gununga mu gudia yima yikima ye mwega munu gununga mbi kiyo yeyi afana gudia mumboyi. ³ Gwena yo uba gudia,lo afana gumvenza aho aba gugonda gudia,ye ayo uba gugonda gudia lo afana gusambisa ayo uba gudia,mu mwila Nzambi maga muyambidi. ⁴ Ayi mwena na,ayi uba gusambisa musadi wu mugwedu?Mbi yeyi ena uwa guzangu luga,mbi lo yeyi ena uwa gubwa,yeyi ufana gudala longi wenzi.Ha yeyi maga kala mu mugidji,mu mwila Fumu wedu ena ye giyega gigu mulonga pimbu. ⁵ Ayo ugu hananga gisobagani gi mafugu;amosi agu nunganga mbi mufugu makima mena gigeledi.Hoshi mudu akadi ye manunga mengi sila mu lugwigilu wenzi. ⁶ Mudu yo uba gusobi gisa mafugu,yeyi agu salanga mu mwila Fumu,ayo ugu dianga,mu mwila yeyi agu hananga madodji gwena Nzambi,gwena yo ugu gondanga gudia,gwena mu mwila Fumu yeyi agudunanga gudia,ye yeyi agu hananga lugumu gwena Nzambi. ⁷ Mu gio,umoshi lo mu gadji diedu ugu zinganga mu mwila ye beni,ye lo gwena ye mudu ufana gugumbula lufwa mu mwila ye beni. ⁸ Mu mwila mbi adu dwena muguzinga,adu dugu zinganga mu mwila ngolu zi Nzambi;ye ata mbi adu dufa,adu duga fa mu mwila Nzambi.Ata adu dwena mugu zinga ata adu dwena mugu fa yiokima yo adu dwena kaka mu Nzambi. ⁹ Mu mwila Yisu Klistu maga fidi ye yeyi wena mu luzingu,mu mpila mbi yeyi ayadi ye hadu agafa ye hadu agimoni. ¹⁰ Ha ayi mu mwila yigi ayi uba gusambisa pangi wayi?Mbi lo ayi mu mwila yigi ayi uba gumvenza pangi wayi?Mu mpila yo adwa akima mudu gamoniga gumesu ma lufundusu lu Nzambi. ¹¹ Mu mwila yoyi yiga sonamana:Ami ngiena ye moni,gi hosa Fumu,mabongu makima muma gafuga mana gumesu mmami,ye mudu mukima maga hana lugumu gwena Nzambi. ¹² Mu gio mudu ye mudu maga da gimbangi ngienzi gwena Nzambi mumo masalanga. ¹³ Lo gwena ye mudu ufana gusambisa mugwedu,ha dufana gununga mugu gonda gusala gana gubiya yedu yedu mu mwila mu guginda gubwisa mana mu masumu. ¹⁴ Ami ngisi ye ami ngiena mu gudala mbi mu mbuga yi Yisu Klistu,lo gwena gima giena gubiya mu mwila mu,ye gima gibi gigukala gwena yo uba gugidala gibi. ¹⁵ Ha,mbi gwena mu mwila yima yigudia mbi pangi ena mu kenda,ayi lo ufana gukala mu luzolu:lo ufana gubebisa mu madia,mudu yo uga fididi Yisu Klistu. ¹⁶ Wega mbi,mapimbu mayi magonzi gukala,mu gumvenza pangi wayi. ¹⁷ Mu mwila gifumu gi Nzambi lo giena mu gudia ye gunwa,ha yena mu gigidi,ngembaye kiesi mu mbuga yi muhunga wu vedila. ¹⁸ Mudu yo uba gusadila Yisu mu mpila yi pimbu,gwena pimbu gu mesu ma Nzambi ye mugu lesa mana gwena hadu. ¹⁹ Mu gio adu dufana gugamba mu gusala mapanzi mo magu hananga ngema ye lusadisuyedu ye yedu. ²⁰ Mu mwila gudia anu lo nufana guziya gusalu gi Nzambi.Mu gagidi yima yikima yena yi pimbu;ha lo gwena pimbu gwena mudu,mbi yeyi ena mugudia,yeyi mugu guma mbuga yi gubwisa agwedu mu masumu,mugu ganda mbuga. ²¹ Gwena pimbu mugu gonda gudia misuni,mugu gonda gunwa magana,ye mugu gaduga mu yima yo ifana gukala gwena mugwedu mbuga yi disumu,yigu muganda mbuga,mbi lo yi gumu hedisa mwila. ²² Lugwigilu lo lugwedji,ayi ufana mugu lugieba pimbu pimbu mu mwila yi gumesu ma Nzambi.Mudu wu Ebeleyo,gwena yoyo ugugondanga gudivugilu nkanu ye beni mu yo yagu salanga! ²³ Ha muyo wena ye mimedu mu gima gio giazola yeyi mugu dia,yeyi ufana gudigingila nkanu yebeni,mu mwila yeyi lo aba gusala mu luzolu lwenzi beni.Yikima yo yigonda mu luzolu lu mudu lwena masumu.