¹ Zude, musadi u Yisu Klistu,ye pangi u Zagi, gwena o agaleziga hadu apimbu a luzolu mu mbuga yi Nzambi dawa, ye aga swega mu mbuga yi Yisu Klistu. ² Wega mbi kenda,ngemba ye luzolu luwanga gani. ³ Pangi, uluzolu, ami isalanga ngolu mu mwila gunu sonigila muyo idadila mapimbu ma mudu mukima. Ami ifana gunu sonigila mu mwila mugu nulonga mugu nwana mu gigidi mu lugwigilu alo luga hana manini gwena akwigisi mu mbalu umosi. ⁴ Mu mwila yeyi maga tilumu gidi mu giswegi mu gadji dienu hadu amosi. Gwena hadu aga ponini mu mwila gwavugila mbadu. Hadu o agonda lugwigilu agusobanga ngolu zi Nzambi mu manunga, ye agudunanga fumu wedu umosi ye Yisu Klistu. ⁵ Mu dangu di, ami izola gunwibuga, (si giogio gi nwisi yikima)mbi fumu uga hulusa mu mbalu imosi hadu a Ngimbiti, ha ginima yeyi diaga zidi hadu o aga gonzidi lugwigilu. ⁶ Ye kega Awanzio aga gonzidi guswega mapanzi mowu beni ma gifumu ha owu dia gegidi manzu mowu (Nzambi maga swegidi miziga ye miziga mu gimvuga, mu piba, mu mwila lufundusu mu ufugu uneni). ⁷ Gwena nga Sodomi ye Gomodi ye mambu ma pembeni,momu maga dihanini mo beni mu gindumbu ye owu alandanga ma pwisa ma gifudji.Momu magakedi nga mbandu mu mwila o aba gunioguga mu minianga mi twiya du Gahungu. ⁸ Mu mpila yoyo,hadu o abebisanga mila miowu ;owu ambilanga gifumu ye owu ahosanga mapanzi mabi mu gumvenza hadu alugumu. ⁹ Ata adikanzi michela mu dangu dia sanganga miaga ye sadani ye guhosa gana mu mwila mwila u Mose,lo aga gugidi gusamba mu gumvenza mu mwila yeyi.Ha mu dangu di mosi yeyi munu guhosa: "wega Nzambi a mudadi pamba!". ¹⁰ Ha hadu o akima madu ganga akima o aga gonzidi gwisiya.Ye oho esiyanga(mu mpila imosi ye asidu aho agwisiyanga ma manunga ). ¹¹ Gwena yima yoyo ugwaziyanga. Kenda gwena oho!Mu mwila owu aga lanzidi mbuga yi Kayini ye owu diaga lanzidi mapanzi mabi ma Balami mu mwila mbingu .Owu aga fidi mu gidumba gi Koleya. ¹² Gwena kiesi nga mu mafezi menu guzola.Owu magu dianga mafezi mowu mugu gonda soni,mu gudia buna mu mwila guhana kiesi.Owu ena maduda magonda mema.Owu ena midondu mu gisiwu migonda ndumba(mbalu ziadi zi lufwa,mugu divuna). ¹³ Owu ena nga muhunga ugola u nzadi,mugu dusa soni ziowu mu gidengeni.Owu ena nga mioda mu mbuga yi miomi piba yigola miga engididi mu miziga mikima. ¹⁴ Enoki,mudu u sambwadi mu mbuga yi Adami,dia longa ye guhosa: "dalenu,Fumu wesidi ye mafunda ye mafunda ma asantu. ¹⁵ Yeyi magesa mu mwila gugugisa lusambusu mu hadu akima.Yeyi agesa gubinga hadu akima abi mu mwila mapanzi mowu mabi maga sadidi mu mpila yibi, ye mapanzi makima ma mudu umasumu ugonda lugwigilu aga hosidi mu mwila yeyi." ¹⁶ Gwena hadu o agu bogudanga ye gunienga, agukanga gu nima di mapanzi mowu mabi. Owu ena hadu a lulendu aho, mu mwila mbingu yowu owu munu guleba hadu ega. ¹⁷ Ha, anu apangi ami a luzolu,wibugenu mapanzi mo maga hosama nini mu dangu dihida gwena antumwa a fumu wedu Yisu Klistu.Owu aga nwambididi mbi: ¹⁸ "Gu nsuga di dangu,guga kala ye hadu amvenzanga agalandanga pwisa yowu yi mwila." ¹⁹ Hadu o agwingisanga nkabasana.Owu ena hadu agi fudji ye lo ena ye gimpeve. ²⁰ Ha anu, apangi ami aluzolu,ndungenu anu beni mu gadji ga lugwigilu lwenu usantu ye sambilenu mu mbuga yi mpeve uvedila. ²¹ Anu nuzingi mu luzolu lu Nzambi ye menenu kenda zi fumu wedu Yisu Klistu ayo uba gwisa gunu dwadila luzingu lu mvula ye mvula. ²² Kalenu mu kenda mu mbuga yi hadu o ena mu mimedu. ²³ Sadisenu hadu amosi ye mugwagadula gu twiya.Gwena amosi,kalenu mu kenda ye woma.Mengenu ata miledi miena ye zilu mu gimusuni. ²⁴ Mu dangu di, gwena yo ufana gunugieba mu gubwa ye mu gunu dwadisa mu gugonda fodu ye minianga mu dangu di pimbu, ²⁵ Gwena yeyi buna, Nzambi muhulusi wedu,mu mbuga yi Yisu Klistu fumu wedu, gukadi ye lugumu,gifumu, guyala ye ngolu, agwesi,mwanonu, ye mafugu magesa.Ameni.