¹ Simoni Pedula,gisadi ye ntumwa wu Yisu Klistu,aho aga yambidi mu gugaba mbalu umoshi gabu dimoshi yadu,mu mbuga yi gagidi ga Nzambi wedu ye mu mbuga yi Muhulusi wedu Yisu Klistu; ² Wegenu mbi ngolu ye ngemba zi Nzambi zikadi yanu mu gwisiya Nzambi ye mbuga yi Yisu Klistu Fumu wedu! ³ Nga ngolu nzienzi zi wulu ziga duwedi yikima yo yena mu mwila luzingu lwedu ye kenda,mu mbuga yi gwisiya mudu yo uga dulenzigidi mu lugumu lwenzi beni ye mu mwila gagidi genzi. ⁴ Mu mbuga yo yeyi maga wedi gabu dineni ye dipimbu mu magani menzi,mu mpila mbi mu mbuga yenzi anu nukadi mu gadji ga luyalu lu wulu,mu gudjina upala amo mwena mu gadji ga gifudji mu gulula. ⁵ Mu mwila gio kega, anu nufana gusala gikesa u mwila gubaga mu lugwigilu lwenu, gagidi ga gulonguga. ⁶ Mu gulonguga gwena gudigu lumuna, mugu digulu muna gwena gugandamana, mugu gandamana gwena kenda, ⁷ Mu kenda gwena luzolu mu gadji ga gipangi, mu luzolu gwena lu gipangi gwena zola. ⁸ Mu mwila mbi mapanzi mena mu gadji dienu, ye mena mu guhida dela, momu lo maga nwega gio, mbi lo mavala mu mwila gwisiya gu mapanzi ma Yisu Klistu Fumu wedu. ⁹ Ha ayo mwena mu gugonda gwisiya mapanzi mo, yeyi ena gifa mesu, yeyi lo agudalanga gu dadi,yeyi magu yadilanga gofuga mu masumu magulu. ¹⁰ Mu gio anedu, anu nufana gusala mu guhida gwingi kega mu gusadisa gulenzigamana gwenu ye gupona mana gwenu; mu mwila mbi nwena mu gusala gio,anu lo nugabwa mu masumu. ¹¹ Mu mwila gio, mu mpila yo, gwigila mu gifumu gigonda nsuga gu Fumu wedu ye muhulusi wedu Yisu Klistu, midi ganuhana manina. ¹² Dalenu mu mwila gio ami miga nugieba nga dangu dikima mu yima yo yikima,ata giogio ginuyishi ye giogio gunwena ye gikesa mu gagidi ga dangu di. ¹³ Ye ami ngiena mugu dala nga gibanza,kega gidadi,agio gigiena mu gadji ga gisalu gi,mugu nwambila mu gwanzulula mesu mu mbuga yigu nudimuna, ¹⁴ Mu mwila ami ngisi mbi migenda mu gidungu mugila ye Fumu wedu Yisu Klistu,yeyi maga ndesidi . ¹⁵ Ha ami miga kala ye gugieba mbi gunima diami,anu nufana gwibuganga mapanzi mo. ¹⁶ Lo gwena mu mwila gulanda masolo ma upala,mu gio,mbi munu gulanda samu ziupala ziegefidi,amo medu ganu lesidi ngolu ye gwisa gu Fumu wedu Ysu Klistu,hanga mu mpila yidu gamu dadidi ineni yenzi mu mesu medu beni. ¹⁷ Mu mwila yeyi maga yambidi gwena Nzambi dawa luyalu ye ngolu,mu dangu di gesa lugumu lu pimbu,ndaga yimoshi milu hosanga:ayu unu bagudala ena mwana wami uluzolu,mwena yeyi ami igasa mini miami mikima. ¹⁸ Ye adu mudu gefidi ndaga yo iga dugidi guwulu,mu dangu didu gakedi ye yeyi gu muselu wasantu. ¹⁹ Ye,adu duba guhosi lula mu guhida mbi mapanzi mamoshi ma ambigudi,mu mbuga yo miomi anu nugusalanga keba mu gwifa,nga mwinda umoshi awo uba guzuma mu gihani gi piba ,de gogo gugagia guma ye kega moda wu kela uduga mu mizima mienu; ²⁰ Mu gwisiya tegu anu beni,mbi lo gwena ye mbigudi ata umoshi mu isoni ufana gukala mudendudi wu mapanzi menzi beni. ²¹ Mu mwila lo gwena mbi mu luzolu lu mudu mbi owu afana gubigula panzi yo ifana gwisa,ha mpeve ya longo yigwa dwadisanga,mu gio hadu maga mu mbuga yi Nzambi.