¹ Polu ntumwa u Yisu Klistu mu luzolu lu Nzambi,ye di pangi Timote mu gadji ga dibundu di Nza mbi diena gu Korinto ye gwena asantu akima ena gwa Akayi mukima. ² Ngolu ye Ngemba zi Nzambi zikadi yanu mu kumbu yi Nzambi dada wedu ye mu kumbu yi Fumu wedu Yisu Klistu! ³ Lugumu gwena Nzambi dada u Fumu wedu Yisu Klistu.Dada uga zala ye lubogu ye Nzambi u kenda! ⁴ Yeyi magu duwanga ngolu mu mapasi medu minianga miedu mikima,mu mpila adu dufana kega guhana ngolu gwena o ena mu minianga,ngolu ye gikesagidu gasenzidi adu beni mu kumbu yi Nzambi. ⁵ Gifa gimosi munianga mi Yisu Klistu migu dulunganga mu dwena du,mu gifa gimosi lusadisu lwedu lugu dulunganga gwena Yisu Klistu. ⁶ Mbi adu dwena ye gikesa,gwena mu mwila lusadisu ye mu mwila ye mu mwila mapimbu;mbi adu dwena ye lusadisu ,diba gusalamana mu guganda mizima mu minianga mi midu bagunwana miomi. ⁷ Ye gusa muzima gwedu gu mesu menu gwena guganda mana,mu mwila adu dwisi,mbi anu munu gagumbudidi minianga,anu nwena ye gabu kega mu lusadisu. ⁸ Adu lo duzola mugio gunwega mu gugonda gwisiya,anedu,mu yo idadila minianga mio miga dwisididi du gubu di Aziya,adu mudu galenzi gamanini,mu guhida kega ngolu ziedu,mu mpila yimoshi mbi,adu dugonzi gusa ata minu mu luzingu. ⁹ Ye adu mudu dalanga nga amishi gugamuga gwedu mu lufwa,mu mpila adu dugonzi gusa muzima wedu gudwena du beni,ha mugu usa gwena Nzambi,ayo ugu fudumusanga hadu agafa. ¹⁰ Gwena ye uga dugadudidi,ye uga dubigisidi mu lufwa lugifa gio,gwena yueyi ayo udufana gusa minu mbi maga duhulusa kega. ¹¹ Anu beni kega,nudi gengidi lengi mu isambu,mu mpila mbi ngolu zidu gasenzidi,gwena hadu engi,mu mampila mengi,mu guhana ngolu mu mapanzi medu. ¹² Mu gio ayo iba gusala migembu miedu,gwena gimbangi gio manunga medu,mamo meduga didwadisidi mu gifudji,ye gwingi sila gumesu menu,ye gudigieba ye gugonda masumu gu mesu ma Nzambi,lo mbi ye ndungi zi gimusuni,ha ye ngolu zi Nzambi. ¹³ Adu lo duba gunu sonigila mu gima giega,gwena mu mama menu bagudanga,ye momo menu bagwisiya.Ye ami iba ginunga mbi anu munu gayisiyanga de gunsuga. ¹⁴ Nga mu mpila yinu gesiyiyi gadambu mbi adu dwena mu kiesi gienu,mu mpila yoyo anu munu gakala kega ededu mu ufugu ugesa Fumu Yisu. ¹⁵ Mu manunga magifa gio,ami inwegi mu gwenda tegu gumesu menu,mu mpila mbi anu nuyambi ngolu mu mbalu yi mbadi; ¹⁶ Ami miga hidjidi gunwena nu mu mwila ami mu gwenda gu Masedwani gu nwena nu,ye anu mugedi gusisa gu Yedeya. ¹⁷ Agio,mu luzolu lu gifa gio,ami igakedi ye mwa gulugumuna?Mbi lo mahanga mami mena mahanga ma gimudu,mu mpila mbi yoyi ikadi mu mwila mi gugumbula ye guduna? ¹⁸ Kega gwena gagidi mbi Nzambi ena luzolu,ndaga yo yiduga nwambididi lo yiga yigu gumbula mbi lo yigu duna. ¹⁹ Mu gio mwana Nzambi,Yisu Klistu,ayo wudu galongidi du mu gadji dienu,ami ye Silive,ye Timotayi,lo guga kedi mbi gugumbula mbi lo guduna,ha gwena gugumbula gugakedi gu ngiena mi; ²⁰ Mu gio,mu yo idadila magani ma Nzambi,gwena mu mwila yeyi gugumbula,mu gio kega Ameni mu mwila yeyi diga hosamanini mu kiesi gi Nzambi. ²¹ Ye mudu yo ugudu longanga malongi maguduwa ngolu ye anu mu kumbu yi Klistu,ye ayo agudu gamanga gwena Nzambi, ²² Yoyo uga dusidi gidimbu ye uga sidi mu mizima miedu lugwigilu lu gimpeve. ²³ Gisi ami isenda Nzambi mu gimbangi mu mwila moni wami,mu mwila mugu nugadula nu,mbi ami lo igedi gu Korinto; ²⁴ Lo mbi mu mwila adu dunu niadji mu lugwigilu lwenu,ha adu mugu nusadisa mu kiesi gienu,mu gio anu nwena agu gandamana mu misigu.