¹ Polo, nkodi mu klisto Yesu, ye mpangi Timoteo, ku Philemo mpangi betu wu nzolakana ye mpangi mu kisalu, ² iku Apphia mpangi betu yu nkentu, ku Archipa mpangi betu mu nkindu ye ku dibundu di kutakananga mu na nzuaku: ³ Bika nlemvu wukala ye benu ye ngemba yi tukidi ku Nzambi Tata betu ye ku Mfumu Yesu-Klisto. ⁴ Ngita vutula matondu ntangu zakulu ku Nzambi amu. Ngita sambila mu diambu di ngeyi. ⁵ Ba kuntela mu zola ye lukuikilu wune luawu mu Mfumu Yesu ye ku ba minkwikidi bakulu. ⁶ Ngita lomba kintwadi ki minu kiaku kikala kilunga mu diambu di nzayilu yi mambu makulu ma mboti mena mu kati ye betu mu Klisto. ⁷ Kadi yikala ye kiesi kimbidi ye kikesa, mu diambu yi siamisa mintima mi bamikuikidi. ⁸ Kadi ngina ye kikesa mu Klisto muku zayisa mana ma wulenda ganga kansi, ⁹ ibuna mu kuma ki luzolo ngita kulomba munu Polo mbuta muntu ye bugangi nkodi mu Klisto Yesu. ¹⁰ Ngi takulomba mu diambu di muanamu Onesima, wu yibuta mu ki nkodi. ¹¹ Kadi yukala mu ntangu ziluta kakala mfunu ko ku ngeyi, kansi bungangi, wuna mfunu ku ngeyi ye ku munu. ¹² Yiku vutuluedi yani, yani yo wuna ntalu mu mbandu munu. ¹³ Ngita zola ka kala ye munu mpasi ka kunsadilanga ga kifulu kingeyi mu ntangu ngina mu nkodi mu kikuma ki nsangu zimboti. ¹⁴ Kizoledi ku nde kisalu kiaku kimboti kisalama bonsu mu lutumunu kansi mu luzolu lumboti. ¹⁵ Ngatu mu diambu dina ka gambana ye ngeyi mu fintangu, kidi wu mona diaka mu ntangu zakulu. ¹⁶ Kalendi kala diaka nanga ku, kansi kulutila nanga mpangi wu zolakana, wuna kibeni wu zolakana ku munu, ye wuna kibeni ku ngeyi mu kinsuni ye mu Mfumu. ¹⁷ Ye go wuna nkundi munu mu kisalu m'wuntambula bonsu munu. ¹⁸ Go wukudila diambu dimosi dimbi ye go kima ka feti ku gana tula kiawu muntu munu. ¹⁹ Munu, Polo, nsonekeni mawu mu moku ma munu mosi, si ku vutudila biawu. Kizoledi ku yi kutela nde feti ku ngana luzingu luaku. ²⁰ Ingeta, mpasi, ungana lusadisu muna mfumu; ungana luvuvamu mu ntima mu Klisto. ²¹ Mu kifulu mu bulemvu buaku ngita kusonikina. Nzeyi nde si wusala kulutila ma ngitalomba. ²² Mu ntangu mosi, nu nkubikila suku ku zulu, kadi ngina ye mayindu mu lusambulu luenu si yiluvutukila. ²³ Efalati, mpangi munu nkodi mu Klisto Yesu, wu kugeni mboti, ²⁴ bu mosi Malako, Alisitasus, Demasi ye Luka, mpangi zi munu mu kisalu. ²⁵ Bika nlemvu Mfumu betu Yesu Klisto wukala ntuadi ye Mpevi benu. Ameni.