¹ Ku mana matadila kisalu ki kusadisila kuba santu, ka buna diaka mfunu ku mudiambu di munu nde yi lusonikina. ² Kadi, nzeyi luzolu lu benu lumboti luyita kisemisina ku mbela besi Masedoni. yi bazayisa nde Akayi wuna wukubama tuka mvu wulutidi ye kiyangi kibenu kigana kikesa ku bambidi gana kati ki bawu ba ganga. ³ Yifila mukusa nde kisema kitusala mu diambu di benu kakikadi ki mpamba ku. ye nde lukala ba kubama, bonsu buna yi teka mokuluzayisa. ⁴ Go kabuaku, sibukala nsoni ku betu, go mu ngisa munu ku mosi ye ba mpangi ba Masedoni, kita goga diambu mu diambu di benu ku, kaluna ba kubama ku. ⁵ Mu kikuma kina, yi mona bu mboti yi lufila ba mpangi mukusa nde ba lusadisa muku nata makabu malusila. mukusa nde n'kayilu mina mikala mi kubama, mu luzolu ye ka mukunungina ku. ⁶ Lubakisa bo: yu wukunanga binduelu sika yonzika binduelu, ye yuwukunanga bi mbidi sika yonzika mpi bi mbidi. Konsu muntu kagana bonsu kina kikakubikidi muna ntima wu yani. ⁷ konsu muntu kagana ye ku bokuta nkatu kani muku nunguna. kadi Nzambi wu zolanga yu muntu wu gananga kiesi. ⁸ Ye Nzambi si kalutebisa ye madienga mani, mukusa nde mu mambu makulu, lukalanga ntangu zakulu muna kufuluka mu diambu di bisalu bi mboti. ⁹ Bonsu buna bu sanama:[ Wukabasa bi mvuama biani ye wu gana biawu ku ba mputu.] masonga mani mananganga ki mvimba. ¹⁰ Yu gananga mbutu ku bigati ye dimpa mu diambu di madia mani; si kakubika ye fulusa mbutu. si kayikila kuyela ku masonga menu. ¹¹ Si kalufulusa muna mpila zakulu mukusa nde luyela muna ma mboti menu. ye nga bambidi ba vutula matondu ku Nzambi. ¹² Kadi kisalu kiokio ka kikubama kaka mu mfunu wuba minkuikisi ku. wu wampi diambu di kiesi ye di mvutula matondu ku Nzambi. ¹³ Ye mudiambu di kimbangi ki salu ki benu luta kembisa buna Nzambi muna bu nlemfu mu nsangu zimboti zi Klisito. lutakembisa mpi Nzambi muna kiesi kiku gana zi mfuilu ku makabu menu mu diambu dibawu ye mudiambu dikonsu konsu muntu. ¹⁴ Muna kiyangi kiawu kimboti mudiambu dibenu, bata sambila mudiambu di benu. bata ganga mawu mudiambu didienga dimbidi di Nzambi di dina muna benu. ¹⁵ Matondu ma vutuka ku Nzambi mudiambu di kabu diani wukatulendi gogisa ku