¹ Idina betu tusalanga ye Nzambi , tuta kululomba ka lutambulani nlemvu wu Nzambi mpamba ku. ² Kadi Nzambi wutela: << ntangu buyikala yimboti, munu yikuwila; lumbu bu kifuana mu kugulusa, munu yikusadisa. bungangi ntangu yimboti iyiyi, ye lumbu ki ilumbu ki mpulusu. ³ Betu ka tutesanga bantu sakuba kani mudiambu dimosi nkutu ku mpasi nde salu kibetu kaki bebi ku. ⁴ Kansi mu makulu betu tukisonganga nde tuna bisadi bi Nzambi bu tutatamananga vibidila zimpasi, nsatu yi bima ye kingongo. ⁵ Bakutuzuba, bakututula mu boloku, bakututukisila zinkindu, tusala bisalu bingolu, tukaya mesu ye tufua nsatu. ⁶ Butuna bavedila mu ntima, butuna ye nzayilu yi masonukua ma Nzambi, butuna ye mvibudulu, butuna balembama butuna ye Mpevi yi Nlongo ye butuna ye zola kukedika, ⁷ Bu tusamunanga mambu mana mena kedika, ye butuna ye lulendu lu Nzambi. tubaka bikunuanina bilunungu mu nuanisa ye mu kukitanina. ⁸ Bakutuzitisanga ye bakutuvuezanga, bakutumuangisanga nsangu zimbi ye zimboti. bakutubakanga bankua luvunu kani tugoganga kedika. ⁹ Betu tumonikanga bonsu bantu kabazayakeni ku kani tuna batoma zayakana ku bakulu. betu tuna bonsu bantu bena lukufi ye fua kansi betu tuna kibeni bamoyu bonsu buluta mona. bakutusembanga mu ntangu zakulu kansi ka batukugondanga ku. ¹⁰ Bakutusanga kiadi kansi betu tumonanga kiesi ntangu zakulu. tumonikanga bamputu kansi betu tuvuamisanga bantu bambidi. tumonikanga bonsu nde ka tuna ye kima nkutu ku kansi nde mu kedika betu tuvuidi biakulu. ¹¹ Lubisi kolinto, betu tugogedi ku benu mu kedika kiakulu ye ka tulusuekedi diambu ku. ¹² Betu ka tulukangidi mintima bibetu ku kansi benu lukutukangidi mibenu. ¹³ Munu ngita goga ku benu bonsu bana bamunu, lutugangila bumosi, lutoma kutuzibudila mintima mibenu. ¹⁴ Ka lukalani ntuadi ye bawu kabakuikila ku, bawu ka bafueni kala ye benu ku. kadi mu nki diambu lunungu ye mambi bilenda fuanane? bonsu bue kia kilenda bundanana ye tombe? ¹⁵ Bonsu bue Klisto ye satana balenda wisane? nkuikizi ye kena nkuikizi ku,mu nki diambu benina kintuadie? ¹⁶ Bue nzo yinlongu yi Nzambi ye biteki bilenda fuanane? kadi betu yi nzo yinlongu yi Nzambi yimoyu, bonsu bukatela Nzambi yani mosi nde: munu siyikala ye siyidiata yawu siyikala Nzambi awu ye bawu sibakala bantu bamunu ¹⁷ Idina Mfumu katela: lukatuka ga bena, ye lugambana ye bawu. ka lusimbi kani kima nkutu kisumuka ku, buna munu silutambula. ¹⁸ Mfumu atulendu tuakulu wuta: Munu siyikala Se dibenu, ye benu silukala bana bamunu bababakala ye babakentu.