¹ Mudina tufuete keba mu mambu momo tuawilu, mpasi katuvidisua mo ko. ² Kadi vo nsangu za tunatini zimbasi zakele zaludi, ye vo konso sumu yevo nkolameno yabakidi tumbu kifuene, ³ weyi tulenda tinina vo tutasakanena luvuluzu lulu lua nene? Luvuluzu lua tulongua ntete ntete kua Mfumu ye lua tusiamisinua kua bana ban'gua. ⁴ Nzambi mpe wam'vanina kimbangi mu bisinsu, masivi ye mu mavanga ma tulendo, ye mpe mu n'kayilu mia Mpeve a N'longo miomio kakala kabula mu luzolo luani. ⁵ Kadi ke kuazimbasi ko Nzambi ka vana wisa kia nza ya kun'tuala, yoyo tuta vovela. ⁶ Kansi nkutu, muntu mosi mu fulu kimosi, wata kimbangi wavova: " muntu yi nani kidi yam'banzile? Yevo muana muntu kidi wan'sadise? ⁷ Wavanga muntu lukufi kunsi ya zimbasi; wam'vana n'kembo ye nzitusu. " watula biawonso ku nsi a tambi biani." Kadi ku nsi a wisa kiani Nzambi ka tula bima biawonso. Kasisa kima kakina kunsi a wisa kiani ko. ⁸ Kansi, katuamuene eti ko vo bima biawonso biakala kunsi a wisa kiani. ⁹ Kansi tumonanga ndondo wavangua mu fintangu ntangu kuzulu dia makesa: Yesu ndondo, mudiambu dia mpasi zani ye lufua luani, watambula kolowa kia n'kembo ye kia nzitusu. Yidiodio, mu n'lemvo wa Nzambi, wayeleka lufua mu kuma kia konso muntu. ¹⁰ Dialuta wate kua Nzambi, kadi konso kima kina mu kuma kiani ye mu yani, mu nata bana bayingi ku n'kembo. Dialuta wete kua yani mu velelesa n'tuadisi mialuvuluzu luawu munzila ya mpasi zani. ¹¹ Kadi nduna wubiekanga ye bana babiekuanga ku nto yimosi batukanga. Mudiodio, kavena nsoni ko mu kubabokelela mpangi. ¹² Wavova: " se yasonga nkumbu aku kua zimpangi zame, se yakuyimbidila n'kunga miaku muna lukutakanu ." ¹³ Ye diaka: " se yatula vuvu kiama mu yani." Ye diaka: " Tala, mono endu ye bana bame bobo Nzambi kampana." ¹⁴ Yikuma, kina vo bana Banzambi bakayananga n'suni ye menga, Yesu mpe wuta kayana ye bawu bima bimosi, mpasi vo muna lufua, kafuasa nduna wakala ye wisa kia lufua, disongele vo yi diabulu. ¹⁵ Diodio diakala mpila yoyo, mpasi vo kavuluza bawonso bobo, mudiambu dia lufua, balutisa luzingu luawu lua m'bimba mukiwayi. ¹⁶ Kadi dina dia ludi, ka zimbasi ko keta sadisa, kansi nkutu, yi kua n'kuna wa Abalayama keta kuiza vana lusadisu. ¹⁷ Yikuma, diakala dia n'funu kua yani mu kuizila bonso mpangi zani mu konso mpila, mpasi ka kuma Nganga Nzambi yakuikama ye ya walakazi muna mambu ma Nzambi, ye mpasi n'lemvo wulenda vewa mu masumu ma n'kangu. ¹⁸ Kadi Yesu yani mosi wamona mpasi ye watontua, wuna mpe ye kikesa mu sadisa bana beta tontua.