¹ Paulu, Silivanu ye Timoteo, kua dibundu dia Tesalonika mu Nzambi Se dieto ye Mfumu Yesu Klisto. ² Bika n'lemvo ye luvuvamu lutukidi kua Nzambi Se dieto ye kua Mfumu Yesu Klisto biakala yeno. ³ Tufete vutulanga matondo ntangu zawonso kua Nzambi mu kuma kieno, luzimpangi. Kadi diodio dina dia lunungu, kadi minu kieno kitakula kua yingi, ye nzola ya konso muntu yina ya yingi mu yeno ye yeno. ⁴ Mu diodio, yeto mosi nkutu tutakuluvovela mu ntoko muna nzo a Nzambi. Tutavovela luvibudulu lueno ye minu kieno muna nduanusu zawonso. Tutavovela kiadi kina kialuluakila. ⁵ Kina sinsu kia kieleka kia mfundusu ya singama ya Nzambi. Nsukulu yina vo siluamoneka luafuana muna kimfumu kia Nzambi kiokio luamuenene mpe mpasi. ⁶ Dina dialunungu vo Nzambi kavutudila kiadi kua bobo bakulumuesanga kiadi, ⁷ ye kalusadisa yeno luna mu mpasi zasaka bonso yeto. Sikavanaga dio muna mbonokono ya Mfumu eto Yesu tuka kuna zulu ye zimbasi zani muna lendo kiani. ⁸ Mu n'laku a tiyatua wa ngolo, sikavutudila nsembolo kua bobo kabazeye Nzambi ko ye kabatambudilanga nsagu zambote za Mfumu eto Yesu ko. ⁹ Sibamona mpasi za tumbu kia mfuilu ya kuayele n'vu, kuanda ye Mfumu ye n'kembo walendo kiani. ¹⁰ Sikavanga wo muna lumbu kina sikeza mu tambula nzitusu kua n'kangu ani ye toma sungamenua kua bawonso bana bakuikilanga. Kadi yeno luakuikidi mu kimbangi kieto. ¹¹ Mukuma kiokio, tutatatamana sambila mu kuma kieno. Tutasambila mpasi vo Nzambi eto kalumona luafuana mu mbokolo ani. Tutasambila mpasi kalungisa konso kua nsatu za wete ye konso kua salu kia minu mu lendo. ¹² Tutasambila mu mpila yoyo mpasi vo nkumbu ya mfumu eto Yesu yasanisinua kua yeno. Tutasambila mpasi lua kembosua kua yani, mu kuma kia n'levo a Nzambi eto ye Mfumu Yesu Klisto.