¹ Paulu, ntumua ya Yesu Klisto, landila ntumunu a Nzambi m'vuluzi eto ye ya Yesu Klisto vuvu kieto, ² kua Timoteo muana wa kieleka muna minu: n'lenvo ye nkenda ye luvuvamu bitukanga kua Nzambi Tata ye kua Yesu Klisto Mfumu eto. ³ Bonso yatomene kulombela wavanga tekela wenda kuna Makedonia, kala kuna Efeso mpasi vo wasikidisa bantu ban'kaka mu lembi longa mbambu masuasuana. ⁴ Kani tula mpe mabanza mu bisavu ye mu tusansu tua kondua nsuka. Toto tutukisanga mpaka zilembi tombolanga mabanza ma Nzambi ku n'tuala, mavangamananga mu minu. ⁵ Wuwu kuma kia ntumunu yi nzola yitukidi muna n'tima wavelela, muna kansansa kiambote ye muna minu kia kieleka. ⁶ Bantu ban'kaka kababaka mana bakala sosa ko ye bateka nima kua mambu momo, mukuma kia mpova zakondua m'funu. ⁷ Bazolele kala n'longi mia n'siku, kansi kababakusanga mana bevovanga ko yevo mana batatamananga vova ko. ⁸ Kansi tuzeye vo n'siku wuna wambote, vo wuta sadilua bonso wufuene. ⁹ Ye tuzeye edi, n'siku kawatuluanga mu diambu dia muntu a lunungu ko, kansi mu diambu dia bana bena kuna nganda ya n'siku ye yimpubulu, bantu bambi ye bankua masumu, bobo kabazolanga zisambudulu ko ye bakondolo nzayilu. Wavangua mu diambu dia bana bavondanga mase mawu ye ngudi zawu, mudiambu dia mim'vondi, ¹⁰ mu diambu dia basalanga kindumba, mudiambu dia bazolananga n'kento ye n'kento yevo yakala ye yakala, mudiambu dia bawu bayiyanga bantu mu kubakitula minanga, mudiambu dia Mim'vuni, mudiambu dia bankua yimbangi ya luvunu, ye mu konso kua diambu dian'kaka dina kitantu ye ndongokolo ya velela. ¹¹ Ndongokolo yoyo yina landila n'samu a mbote wa n'kembo wa Nzambi a mayangi yoyo yatudilua n'tuadisi. ¹² Ntondele Yesu Klisto Mfumu eto. Wansiamisa, kadi wanguana yakuikama ye wantula muna salu. ¹³ Yakala n'tiaki, n'kuamisi, ye muntu wakingolo. Kansi yatambula n'lemvo kadi yasadidingi mo kondua kua zaya ye mu kondua kua lukuikilu. ¹⁴ Kansi n'lemvo a Mfumu walutila mu minu ye mu nzola yina muna Klisto Yesu. ¹⁵ N'samu wuwu wuna wa vuvu ye wafuana mu tambudulua wawonso, vo Yesu Klisto wayiza va nza mu vuluza bankua masumu. Ngina lutila beni bampila yoyo. ¹⁶ Kansi mukuma kiokio yatambula n'lemvo, mpasi vo mu mono, ndondo lutidi nene, Klisto Yesu kalenda songela mvibudulu yawonso. Wavanga wo bonso mbandu kua bawonso balenda kuikila mu yandi mpasi batambula moyo wa m'vu ya m'vu. ¹⁷ Wuwu, kua n'tinu a zimbandu, kafuanga ko, lembi monekanga, Nzambi yimosi kaka, kavewa nzitusu ye n'kembo mu m'vu ya m'vu. Amene. ¹⁸ Ntudidi ntumunu yiyi va n'tuala aku, Timiteo, muana amu. Ngita dio vanga landila mbikudulu zaluta mu diambu diaku, mpasi vo wakivana mu nduanunu ya mbote. ¹⁹ Vanga wo mpasi vo wakala ye minu ye kansansa kiambote. Bantu ban'kaka baloza bio ye badimuka mu minu. ²⁰ Bonso Imenayi ye Alekisandele, bobo ya yekola kua satana mpasi balongoka lembi tiaka.