¹ Petelo ntumua a yesu Klisto kua banzena bamuangana, bakiasolua kuna nsi ya Ponti, ya Ngalatia, ya Kapadose, ya Azia ye ya Bisini. ² Landila makubikua ma Nzambi Se, wabiekua kua Mpeve a N'longo mu kun'tumamena ye mu ndukudilu a menga ma Yesu-Klisto. Bika n'lemvo a Nzambi wakala yeno ye luvuvamu lueno lua nieka. ³ Bika Nzambi ye Se dia Mfumu eto Yesu-Klisto kasakumuka! Muna nene wa n'lemvo ani, watuvene ngutuka ya mpa muna vuvu kia fua. Fua diodio dina mu nzila ya mfulukilu a Yesu-Klisto mu bafua. ⁴ Didi dina mu kuma kia fua diodio ka dilendi fukila ko, kadilendi beba ko ye ka dilendi lengela ko. Diodio bakululundidi muna mazulu. ⁵ Lendo kia Nzambi ki kulukebanga mu nzila ya vuvu, mu mpulusu yina yakubama mu tombolua muna ntangu ya nsuka. ⁶ Mu diodio luna mukiese, mpeleko dina dia m'funu lua mona kiadi mu kuma kia tembo bia mpila mu mpila. ⁷ Dina mpila yoyo mpasi vo vuvu kieno kia nuanusua, vuvu kiokio kilutidi beni m'funu kua wolo yi fukilanga kuani kana nkutu yi tomene salua kuna tiya. Didi dikuizanga mpasi vuvu kieno kia vana m'butu mia n'kembo, nzitusu ye luzitu mu ntangu ya ngizulu a Yesu Klisto. ⁸ Ka luam'mona ko kansi lua n'zola. Ka lukumonanga ko muntangu yiyi kansi lukuikilanga mu yani ye luna mu kiese kikondolo nsasa ye kia nkembo. ⁹ Muwuwu lutambulanga bonso wuna m'butu mia vuvu kieno, luvuluzu lua miela mieno. ¹⁰ Vuvu kiokio ye n'lemvo wowo lu veno, biakala mambu makala longokua kua mim'bikudi. ¹¹ Bakala sosa mu zaya nani ye mu nika ntangu Mpeve ya Klisto yina mu bawu yakala ku bavovela. Mana ma kele lutanga mu ntangu kakala ku bavovela, tekela mavangama, mpasi za klisto ye min'kembo milanda ku nima. ¹² Babikudulua vo ka bakala sadila yawu mosi ko, kansi yeno, kiokio bakala vova mambu momo meta vovelua wuwu kua bobo beta kululongela n'samu a mbote mu nzila ya Mpeve a N'longo yatuka ku zulu (Mambu momo mbasi za zulu zitoma zolanga tula meso). ¹³ Dina, lukala luakubama. Lukala luavelela mu min'tima. Lukala ye vuvu kia sikalala mu n'lemvo si wakulu natinua mu ngizulu a Yesu Klisto. ¹⁴ bonso bana ban'tumami, ka lulandi yese luakele landanga kiokio ka lua bakusingi ko. ¹⁵ Kansi kina vo ndo wa kulubokele wuna n'longo, yeno mpe lukala ban'longo, mu nzila zeno zawonso. ¹⁶ Kadi dia sonama : "Lukala ban'longo, kadi mono mosi yina wan'longo." ¹⁷ Ye vo tubokelanga "Tata" ndondo fundisanga kondua kua soba bantu ye landila mavanga ma muntu muntu, lulutisa ntangu ya nzietelo eno mu kum'vumina. ¹⁸ Luzeye vo ka mumbongo yevo mu wolo wuwombelanga ko luasumbilua mu fu bieno biampamba lua longua kua Mase meno. ¹⁹ Kansi mu menga ma ntalu ma Klisto wakala bonso muana meme wakondua fu ye tona. ²⁰ Klisto wasolua wana kutu e nza ka yavangamene ko, kansi wuwu muntangu zizi zansuka, walusongolo. ²¹ Lukuikilanga mu Nzambi mu nzila ani. Yani wan'futumuna mu bafua ye kua yani kavana n'kembo wawonso mpasi vo vuvu kieno kiakala mu Nzambi. ²² Lua kumisa miela mieno miavelela muna tumamena ludi. Kidi diakala mu kuma kia nzola ya yakielaka ya kimpangi , lutoma zolana beni yeno ye yeno muna n'tima. ²³ Luabutuka mbutuka ya mpa, ka mungindu ziwombelanga ko, kansi mu nginga ka ziwombelanaga ko mu nzila ya mambu mena moyo m'vu ka m'vu ma Nzambi. ²⁴ Kadi"n'suni a wonso wufuanane ye titi, ye konso n'kembo wufuane ye mvuma za matiti. Matiti mayumanga ye mvuma zi sotokanga. ²⁵ Kansi diambu dia Nzambi dizingilanga kaka" yi n'samu a mbote wowo luasamuninua.