SPATJIBAL OT'ANIL. ¹ Jo'on Judas, yabaton te Jesucristoe sok ja jbankil te Jacoboe, sok te mach'atik ik'bilik sok k'ux aybilik yu'un te Dios Tatile, sok kananteybilex yu'un te Jesucristoe: ² Te k'uxtaywanej sok te lamal k'inal sok te xk'uxul yot'an te Diose akame esmajuk ta atojolik. ³ Jkermanotak te k'uxex ta jkot'ane, la me jpas tulan yu'un te la jts'ibubatik yu'un te bit'il ay sk'oplal te jkoleltike, la me jts'ibubatik swenta yu'un ya jtak'uyex te yakuk awak'beyik yipal ta swenta te xch'uunjel awot'anike, te la yich'ik ak'beyel te neel ch'uunjeletike. ⁴ Melel ay cha'ox tul winiketik te ochemikix muken ta atojolik. Jai winiketik to ja yu'unik te ch'ayele. K'axel amen te yat'elike, syantesojik te yutsil yot'an te Diose ta swenta te beluk ma lekuke, sok ya smukik ta yot'anik te Jkajwaltik Jesucristoe, te ja muk' ajwalile. ⁵ Ta ora to ya jk'an ya jkak'batik ana'ik stojol, manchuk me ana'ojikix stojol spisil a, te Kajwaltike la skoltay lok'el tel te israeletik ta lum egipto, jauk me to ta patilal la sjin te mach'a ma la xch'uune. ⁶ Sok te ch'ul abatetik te ma la yich'ik ta muk' te tulan yat'elike, la yijk'teyik te lek snaike, te Diose la xchuk ta sbajt'el k'inal, ta bay mero ijk'al k'inale swenta yu'un ya me yich'ik ich'el ta k'op te k'alal ya sta sk'alelale. ⁷ Jich te bit'il te lum Sodoma sok Gomorra sok te lumetik te ayik ta sjuyubale, te janix jich la spasik spisil ta chajp' te muliletik sok te sbak'etalike, te la syantesik te stalelike, te la smulan sbaik te winik sok te yan winike, te antse sok te yan antse. Jai lumetik to ja me la yak' ta ilel ta stojol te ants-winiketike, te la yich'ik kastigo ta k'ajk' ta sbajt'el k'inale. ⁸ Janix jich uuk, te mach'atik joweltik nax te beluk ya snopike, ya sboltesik te sbak'etalike. Ma me sk'anik pasel ta mantal sok ya me yixta k'opteyik te ch'ul abatetike. ⁹ Yan te Miguel te wolwanej yu'un te ch'ul abatetike, te k'alal tulan yak ta k'op sok a te pukuje swenta yu'un te sbak'etal te Moisés te k'alal lajemixae, jauk me to ma ba jelaw sk'op te Miguele. Jich la yalbey: "¡Te Kajwaltike ya me skomat stukel!" ¹⁰ Jauk me to te ants-winiketike ya sbol-k'opteyik te beluk ma xk'ot ta yot'anike.Yan te beluk ya sna'bey sbaike, le' ya sboltes sbaik a jich bit'il te chambalametik te ma sna'ik k'inale, ja in to ja me te beluk ya xjinwane. ¹¹ ¡Obolme sbaik! melel ja la snopbeyik stalel te Caine sok jowejemikix jich te bit'il Balaam te la sk'an yich' smajt'ane. Ja lajemikix yu'un te la stoy sbaik jich bit'il te Coré. ¹² Jai ants-winiketik to te ya sjoinex ta spasel k'in yu'un te xk'uxul ot'anile. Ma xk'exawik yu'un te k'inweje, ya xwe'-uch'ajik ta stukelik nax. Jauk me to ja pajalik sok te tokal te mayuk yalel te ya yich' ik'elbel yu'un te ik'e. Pajalik sok te te'etik te ya xch'ay koel te yabenal te mayuk site, te xchebal buelta lajemikixe, te bulbilik lok'el k'alal ta yisim. ¹³ Jichik te bit'il te tulan yip te mare, te ya yak' sbul yu'un te xk'exlale. Jichik te bit'il ek'etik te k'axel nax aye, te ja chapalix yu'un te le' ya x-ain ta ijk'al k'inal ta sbajt'el k'inale. ¹⁴ Te Enoc, ja sjuk skumul sts'umbal te Adane, jich la yal ta swentaik: "¡Ilawilik! te Kajwaltike ya xtal sok bayal ta mil te mach'atik tojik yu'une. ¹⁵ Ya me xtal yich'otik ta k'op ta jpisiltik. Ja me ya xtal yu'un te ya yak'bey kastigo te mach'atik ma lekuk te yat'elike, sok spisil te mulawiletik te la yalik bol k'op ta skontroinel te Diose." ¹⁶ Ja in to muken ya x-anwanik, k'an kejaetik, ja ya snutsik te beluk ya sk'an yot'anik te ma lekuke. Nojel ta yeik te toybajele, ya sleik te bit'il ya slo'laybeyik yot'an te yantike, swenta yu'un ya staik te beluk ya sk'anike. ¹⁷ Jauk me to, jkermanotak te k'uxex ta jkot'ane, aka me juluk ta awot'anik te k'op te la awich'ik albeyel ta sneelal to yu'un te wolwanej puk k'opetik yu'un te Kajwaltik Jesucristoe. ¹⁸ Jich la yalbeyex awaiyik: "Ta nopol slajibal k'aal ay me labanwanejetik, te janax baem ta yot'anik spasel te beluk amene." ¹⁹ Jai ants-winiketik to ja me te ya yak'ex te ya axat-abaike; ayik to me ta spasel te beluk ya smulan te sbak'etalike, sok ma yich'ojik te Espíritue. ²⁰ Yan te ja'ex, jkermanotak te k'uxex ta jkot'ane, jauk me yip awot'anik te xch'uunjel awot'anik te ch'ultesbile sok k'oponaik me te Diose ta spisil ora ta swenta te Ch'ul Espíritue. ²¹ K'axel ak'abaik ta xk'uxul yot'an te Diose sok maliyaik te bi k'aalil ya ataik te k'uxtayel te ya yak'botik te Jkajwaltik Jesucristoe, te ya yich'batik tel te kolel ta sbajt'el k'inale. ²² Na'beya me yobolil sbaik te mach'a che-cheb yot'anike. ²³ Koltayaik me te yantike, lok'esaik tel ta bay te k'ajk'e. Sok na'beya me yobolil sbaik jauk me to akame xiwuk te awot'anik yu'un te ma apasik te mulil jich te bit'il ya spasike. Ileyaik me te smulike te ja xch'altesojik a te sk'u'-spak'ike. ²⁴ Te Dios te ay yu'el te ma yak'otik ta ch'ayele, sok te ya yak' xtejk'ajotik ta stojol te yutsilale, te mayuk mulile sok te ya sbujts'naj jkot'antik yu'une, ²⁵ te ja tul Dios, te ja koltaywanej jku'untik, ta swenta te Jkajwaltik Jesucristoe, ich'biluk ta muk' sok spisil yutsilal, te ja swenteinoj spisil te beluk aye sok yu'el, ja to ta xjajch'ibal sok ta ora to, sok ta sbajt'el k'inal. Jichuk.