¹ Jich yu'un, te sbabial trato te la yak'botik jilele, le' la yak'botik jilel jkiltik te bit'il ya sk'an ya jkich'tik ta muk' te Diose, sok te bit'il ya yich' ich'el ta muk' te sna te Dios te ay ta balumilale. ² La yich' chajp'anel jun nail pak'. Te sbabial xjajch'ibal nae, le' ay a te xtuchtijib k'ajk'e, te we'bal te'e sok te kaxlan waj te ay ta stojol te Diose, la yak'beyik sbiilin Ch'ul awilal. ³ Ta spat te xcha' tsalal spajk'ul te nail pak'e, ja la yich' ak'beyel sbiil te mero muk' Ch'ul awilal stukele. ⁴ Ay skajtijib xchik'jibal pom te pasbil ta spisil oro. Janix jich yich'oj te smuk'ul xkaxail te trato te pasbil ta spisil oro.Ta yutil te kaxae le' ay jun bojch' te pasbil ta oro te nojel yu'un te manaje, sok te sbastón yu'un te Aarón te puline, sok te cha' lejch' ton te ts'ibubil le'a te mantalil te k'axel ak'bil jilele. ⁵ Ta sba te muk'ul kaxae, ay kerubinetik te yanxanix yutsilal a, te ya smukik sok te xik'ik te smajk'il te ch'ayel mulile, te yaxintesojik sok te xik'ike, jich yu'un ma stak' ya jcholbey xan sk'oplal spisil ta ora to. ⁶ Jich te bit'il chajbanbilix spisil a te sbilukil te nail pak'e, te sacerdoteetike jujun k'aal ya x-ochik bael ta bay te sbabial nail pak' te sbiilinoj ch'ul awilal swenta yu'un le' ya yich'ik ta muk' a te Dios yu'un le' ya x-at'ejik a. ⁷ Jauk me to janax stukel te muk' sacerdote te ya x-och bael ta xcha' mejch'el te nae, junax buelta ta jun ja'wil, sok ya yich' ochel xch'ich'el chambalametik swenta yu'un te smule sok te smul te lum te ma sna'ik te bay ya xch'ayike. ⁸ Jich ya yak'botik jna'tik stojol te Ch'ul Espíritu te ma to ak'bil ilel te ch'ul awilal swenta yu'un te ay to ta tuntesel a te sbabial nail pak'e. ⁹ Spisil in to ja la yak'botik jkiltik ta ora to te beluk tulan sk'oplale. Melel ta xcha' chajp'al, te smajt'an Dios sok te chik'bil majt'aniletik te ya yich' ak'el ta bay templo, ma xju' te k'axel libre ya xk'ot yu'unik te smulik te mach'atik ya yich'ik ta muk' te Diose. ¹⁰ Janax ya yalbey sk'oplal te swe'elike sok te beluk ya yuch'ike, sok te bayal ta chajp' te bit'il ya sk'an spoksbaike. Ja in to janax yu'un te sbak'etalike, ja to te k'alal ya yich' yantesel yu'un te Diose. ¹¹ Te Cristoe talix jich bit'il te muk' sacerdote te ja swentainej te beluk lek ya xtal te pajel-chaweje. Ja ay ta sacerdoteil ta ba ay te nail pak' te ma pasbiluk ta sk'ab te ants-winiketike, te k'axem to xan leke sok te k'axem to xan ay yutsilale, te ma le'uk ta balumilal to. ¹² Ma jauk la yich' ochel te xch'ich'el te stat tentsun sok te alal wakax, te k'o yak' ilel ta stojol te Diose, ja k'ot yak' ilel stukel te xch'ich'ele, te ja k'axel ochemix bael ta bay te mero ch'ul awilale, junax buelta och bael jich la yak'botik jkoleltik ta sbajt'el k'inal. ¹³ Te xch'ich'el te tentsunetike sok te stat te wakaxetike sok te ya yich' tijt'anel stanul te chik'bil te alal me' wakax ta stojol te mach'atik ay smulike, ya yich'ik ustesel yu'un te sbak'etalike sok k'ejbil ya xk'ot ta stojol te Diose, ¹⁴ Jich yu'un k'ax to xan jich a te xch'ich'el te Cristo te ya xju' yu'un te ya skolteyotik, te ja ta swenta te Espíritu te ay ta sbajt'el k'inal te la yak' sba ta milel ta stojol te Diose, ja ya spokbotik lok'el te beluk amen jpasotike jich me ya stak' abatotik ya xk'ootik yu'un te kuxul Diose. ¹⁵ Jich yu'un, ja ta swenta te tejk'anbil ta k'op yu'un te yach'il tratoe. Melel te Cristoe laj ta swenta te mach'atik ay smulik te ayik ta swenta te sbabial tratoe, jich me ya stak' yich'ik kolel yu'un te smulike, swenta yu'un ya yich'ik te beluk albotik yu'un te Dios te ya x-ak'botik yu'uninik sbajt'el k'inal te mach'atik ik'bilik yu'une. ¹⁶ Melel teme ay mach'a la spas jun te banti ya yal te bit'il ya sk'an ya yak' jilel spisil te sbiluke(testamento), ja to ay sk'oplal ya xk'ot a teme laj bael te mach'a la spas te june. ¹⁷ Melel ja to ay sk'oplal a te jun(testamento) teme laj te mach'a la spase, melel teme kuxul to te mach'a la spase, mayuk stulal te june. ¹⁸ Jich yu'un te sneelal tratoe la sk'an te ch'ich'e. ¹⁹ Jich te Moisés te k'alal la yak' te mantalil te ak'bot yu'un te Dios ta stojol te lume, la stsak tel te xch'ich'el te alal wakax sok te stat tentsun, sok la skap ta ja', sok te tsajal stsotsil te chije, sok te wamal te hisopo sbiile, te ja la stsijts'an a te banti ay te sjunal te mantalile sok te lum te stsoboj sbaike. ²⁰ Jich yu'un la yal: ''JA IN TO, JA TE CH'ICH' TE JA YU'UN TE TRATO TE LA YAK'BEYEX TA ATOJOLIK TE DIOSE." ²¹ Janix jich la spas te Moisese, la stsijts'an ta ch'ich' uuk te nail pak' sok te biluketik te ya yich' tuuntesel te k'alal ya yich' ich'el ta muk' te Diose. ²² Jich te bit'il ay ta mantalile, teb ma spisiluk kusbil sok te ch'ich'e. Melel teme ma ya yich' malel te ch'ich'e mayuk perdón. ²³ Jich yu'un, puersa la sk'an te la yich' kusel a te beluk lok'tebil ta ch'ulchan sok te xch'ich'el te chambalametike. Yan te biluketik te ay ta ch'ulchan stukele ja ya sk'an kusel ta mero lek sok te lekil ch'ich'e. ²⁴ Melel te Cristoe ma ba och bael ta bay ch'ul awilal te pasbil ta sk'ab te ants-winiketike, melel ja lok'teybil tel ta bay smelelil stukele. Jauk me to ja och bael stukel ta bay ch'ulchan, jich ya yak' sba ilel ta ora to ta stojol te Dios ta jwentatik. ²⁵ Te Jesuse ma bayaluk buelta la yak' te majt'anile, jich bit'il ya spas te muk' sacerdote te ya x-och bael ta jujun ja'wil sok te ch'ich' te ma jauk xch'ich'ele. ²⁶ Te jichuk xan la spas te Jesuse, bayal buelta k'ax swokol te jichuke ja to te k'alal xjajch'ibal te balumilale. Jauk me to, junax buelta k'ax swokol ta lajel melel le' nopolix a te slajibal te k'aale, te la yich'ix ak'el ta ilel swenta yu'un te ya yich' ch'ayel te mulil ta swenta te laj stukele. ²⁷ Ta tulutul te ants-winiketik albilix sk'oplalik te junax buelta ya xlajike jich ya yich'ik ich'el ta k'op. ²⁸ Janix jich uuk te Cristoe, junax buelta la yak' sba ta lajel yu'un te yakuk yich'ik perdón yu'un smulik te ants-winiketike, jich me ya sujt' tel ta xchebal buelta, ma jauk yu'un te ya xtal xan ta xch'ayel te mulile, ja yu'un te ya skoltey te mach'atik junax yot'an yakik ta smaliyel te Jesuse.