TE SACERDOTE MELQUISEDEC. ¹ Ja te Melquisedec, ajwalil yu'un Salem, sacerdote yu'un te muk' Dios, te ja la sta sba sok te Abraham te k'alal yak ta sujt'el tel ta kerajel te ba smil jilel te muk' ajwaliletike sok ja la xch'uultes te Abrahame. ² Jich te Abrahame la yak'bey te Melquisedec spisil te jun ta slajunebale. Te biilil ''Melquisedec'' ya sk'an yal ''toj ajwalil.'' te yan sbiil te ak'bote ja', ''muk' ajwalil yu'un lum Salem'' te ja ya sk'an yal ''muk' ajwalil yu'un lamal k'inal.'' ³ Mayuk sme'-stat, mayuk xchichmantak, janix jich mayuk xjajch'ibal sok mayuk slajibal te xkuxlejale. Jich yilel te bit'il te snich'an te Diose, melel janax tul sacerdote te ay ta sbajt'el k'inale. ⁴ Ilawilik te bit'il muk' stukel jai winik to. Te jchichmamtik Abraham la yak' te jun ta slajunebal te beluk la yich' tel te k'alal la yaiy te kerajele. ⁵ Jauk me to, te snich'nab te Leví te la yich'ik ak'el ta sacerdoteil yich'ojik mantal ta sk'anel te jun ta slajunebal yu'un te ants-winiketike, te ja' junax yermano sbaike, sok te janix sts'umbalik te Abrahame. ⁶ Yan te Melquisedec, manchuk me ma sna'beyik te mach'a sts'umbale, jauk me to la stsakbey te jun ta slajunebal te la yak' te Abrahame sok la xch'ultes ta swenta te beluk albil yu'un te Kajwaltike. ⁷ Melel nix a, te mach'a ya xch'ulteswane ja tulan sk'oplal yu'un te mach'a ya yich' ch'ultesele. ⁸ Jich te mach'atik ya stsakik te jun ta slajunebale, ch'ich'-bak'etik stukelik, jauk me to te Melquisedeke albil sk'oplal te kuxul ta ora to. ⁹ Jich yu'un ya stak' jkaltik, te Leví, te ja la yich' ak'beyel te jun ta slajunebale janix jich uuk la stoj te jun ta slajunebal ta swenta te Abrahame, ¹⁰ Melel te Leví ja xchichmam te Abrahame ja yu'un te k'alal taot yu'un te Melquisedec ta bee ja la yak'bey uuk te jun ta slajunebale. ¹¹ Jich yu'un, te jauk k'axel ya xlekubik yu'un te mantalil te la yich'ik ak'beyel jilel te sacerdoteetik yu'un Leví te ja sts'umbal te Aarone (melel ja ak'bot jilel te mantalil te lum yu'un te ya xlekubike) jauk me to ¿Bistuuk talix a te yan sacerdote te jich yilel te bit'il te Melquisedeke, sok te ma jichuk te bit'il te Aarone? ¹² Melel teme la yich' yantesel te sacerdotee, janix jich uuk ya yich' yantesel te mantalile. ¹³ Melel te mach'a yakotik ta yalbeyel sk'oplale, yan sts'umbal a, te mayuk ni tuluk yich'oj yat'el ta sacerdoteil. ¹⁴ Melel te Kajwaltike ja sts'umbal te Judá, jauk me to te Moisese ma la yal te ya xlok' tel sacerdoteetik le'a. ¹⁵ Jich ya jna'tik te chiknaj tel yan sacerdote te jich bit'il te Melquisedeke. ¹⁶ Te bit'il och ta sacerdote te Kajwaltike, ma ta swenta uuk te mantalil yu'un te chichmamiletike, ja ta swenta te ay yu'el te stalel kuxul te ma xlaj stukele. ¹⁷ Melel jich ts'ibubil sk'oplal:'' TE JA'ATE SACERDOTEAT TA SBAJT'EL K'INAL JICH BIT'IL STALEL TE MELQUISEDEKE.'' ¹⁸ Jich yu'un la yich' lajimbeyel sk'oplal te sneelal mantalile, ta skaj te mayuk yip sok te mayuk stulale. ¹⁹ Melel te namey mantalile ma ju' yu'un te ya slekteswane. Jauk me to, ay banti ya stak' x-ochotik te pajel-chaweje, ta swenta te smuk'ul jkot'antik ta stojol te Diose. ²⁰ Jich k'ot ta pasel, melel te Diose jamal la yal stukel. Jauk me to te yantik sacerdoteetike ma jichuk la yich'ik albeyel stukelik. ²¹ Jauk me to, te Jesuse, och ta sacerdote ta swenta te jamal la yal te Diose, melel jich ts'ibubil jilel: ''TE KAJWALTIK K'AXEL LA YAL SOK MA XYANUB TE SNOPJIBAL YU'UNE: ''JA'AT SACERDOTEAT SBAJT'EL K'INAL.'' ²² Jich yu'un te Jesuse la yak' k'otok ta pasel te lek trato te la yal te Diose. ²³ Jauk me to, bayal mach'a ya x-ochik ta sacerdoteil ta skaj te ya xlajik baele, jich ma stak' te k'axel ya xjilik ta at'ele. ²⁴ Yan te Jesuse sbajt'el k'inal kuxul stukel, ja yu'un sbajt'el k'inal ay ta sacerdoteil. ²⁵ Jich yu'un, te Jesuse ya xju' yu'un te ya skoltey te mach'atik ya xtal ta stojol te Diose ta swenta te Kajwaltike, melel ja kuxul yu'un te ya skolteyotik ta k'op ta stojol te Diose. ²⁶ Melel ja muk' sacerdote te ya xtuun jku'untike. Mayuk smul stukel, toj, ay yutsilal, ma pajal ay sok te mulawiletike, ja muk' k'oem ta ch'ulchan. ²⁷ Te Jesuse ma pajaluk sok te yantik sacerdoteetik, te ya yak'ik milbil majt'anil ta stojol Dios ta jujun k'aal ta swenta smulik sok ta swenta smul te lume. Yan stukel junax buelta la yak' te milbil majt'anile, melel ja la yak' sba ta milbil majt'anil stukel. ²⁸ Melel te mantalile ja ya yak' te ya x-ochik ta muk' sacerdoteil te ch'ich'-bak'ete sok te teb staelike. Jauk me to te k'alal la yak'botik tel te mantalile, tal te beluk k'axel albile, ja bi ja la snajk'an te Dios te Nich'anile te ja toj ta sbajt'el k'inale.