BIT'IL YA STAK' XKUXIN TUL CH'UUNJEL. ¹ Ma me xa awijk'tayik te stalel xk'uxul awot'anik te bit'il awermano abaike. ² Ma me xch'ay awu'unik te ya awik'ik ochel ta anaik te mach'atik ma ana'bey sbaike. Melel ay me mach'atik la yik'ik ochel ta snaik ch'ul abatetik te ma la sna'bey sbaike. ³ Na'aik me te mach'atik chukatike, jichuk me k'oem ta awot'anik te bit'il chukulatik soke. Na'aik me te mach'atik ayik ta uts'inele, jich'uk me k'oem te bit'il pajal uts'inbilex soke. ⁴ Ich'biluk ta muk' awu'unik te nujp'inele. Ma me xa kapik ta mulil te bit'il awik'oj abaike, melel te Diose ya me yak'bey kastigo te mach'a ya xyal ta mulil sok te ya yaiy mulweje. ⁵ Ma me jauk ay ta awot'anik te tak'ine. Binuk nax me k'inal awaiyik yu'un te beluk ay awu'unike, melel te Diose jich la yal: ''MA BA YA JKIJK'TAYAT, SOK MA BA YA JPIJT'ESAT.'' ⁶ Binuk nax me jkot'antik te jich ya jkaltike: ''TE KAJWALTIKE, JA' KOLTAYWANEJ JKU'UN; MA BA YA XIWON. ¿BELUK YA STAK' SPASBON TE ANTS-WINIKETIKE?'' ⁷ Ma me xch'ay ta awot'anik te wolwanej awu'unike, te ja la yalbeyex te sk'op te Dios ta atojolike, sok na'aik me te lekil at'elil la spasike. Nopbeyaik me te xch'uunjel yot'anike. ⁸ Te Jesucristoe stalel ay, ma xyanaj stukel, te bit'il ay te wojeye, janix jich ta ora to, sok ta sbajt'el k'inal. ⁹ Ma me ach'uunik te yantik jnoptesel te ya yak'batike. Ja me lek te yakuk yich' smuk'ul awot'anik ta swenta te yutsil yot'an te Diose, ma ta swenta we'lil te lek ya xk'oex yu'une. Melel mayuk beluk ya staik te mach'atik ya xch'uunik spasele. ¹⁰ Ay jku'untik milbil smajt'an Dios, te ma xju' yu'un slajinik te sacerdoteetik te swenteinojik te nail pak'e. ¹¹ Melel te xch'ich'el te chambalametik, te la yich' ak'el ta swenta te mulile, och ak'el ta bay te awilal te ch'ultesbile, yan te sbak'etale ya yich' chik'el ta sti'il te lume. ¹² Janix jich k'ot ta pasel ta swenta te Jesuse, te k'ax swokol ta lajel te la yich' lok'esel bael ta sti'il te lume, ja ta swenta te la xch'ultes jilel te lume, ta swenta te xch'ich'ele. ¹³ Aka lok'otik bael uuk ta spat te lume, aka me ts'ijk'uk jku'untik uuk teme ya jkich'tik labanele. ¹⁴ Melel mayuk jlumaltik le' to te sbajt'el k'inal aye. Jauk me to, yakotik ta sleel te jun muk'ul lum te ya xtale. ¹⁵ Jich yu'un ya sk'an ya jkak'tik ta spisil ora te majt'aniletik ta yich'el ta muk' te Diose, sok te ya jk'ajinteybeytik te yutsilal sbiile. ¹⁶ Sok ma me xch'ay ta jkot'antik ta spasel te beluk leke sok te jech ya jkoltaybatike, melel ja milbil majt'anil te ya smulan bayal te Diose. ¹⁷ Ch'uunbeyaik me smantal sok ich'aik me ta muk' te wolwanejetik awu'unike, melel jaik ya skananteybeyex te ach'ulelike, sok te jaik nix ya xk'o yak'ik kuenta. Ch'uunbeyaik me smantal te wolwanejetik awu'unike, ma me xa wak'beyik smel-yot'an jich me binax yot'anik ya x-at'ejik ta atojolik, jich me ya stak' akolteyik uuk. ¹⁸ K'oponbotik me Dios, melel jna'otik te mayuk beluk ma lekuk ya jnoptik, sok te ya jk'antik te toj ya xkuxinotike. ¹⁹ Ya jkalbeyex te yakuk apasik tulan ta spasel spisil in to, ta swenta te yakuk xju' sujt'on tel ta atojolik ta ora nax. ²⁰ Ta ora to te Dios yu'un te lamal k'inale, te ja la xcha' kusestel ta aelmeletik te muk'ul wolwanej kanan chij, ja bi ja te Kajwaltik Jesuse, ta swenta te xch'ich'ele te ay trato ta sbajt'el k'inale, ²¹ sok te yakuk stojtesatik ta spasel te beluk lek ta pasele, jich me ya yich' pasel te sk'anjel yot'ane. Te yakuk spastaj te yat'el ta jtojoltik te bit'il ya sk'an ta swenta te Jesucristoe, te ja ay yutsilal ta sbajt'el k'inal. Jichuk. ²² Ta ora to, kermanotak ya me jkalbeyex te yakuk awak'beyik yipal, te lekuk ya awaiyik te tak'uyel te ja la jts'ibubeyexe. ²³ Na'aik me te jkermanotik Timoteo te lok'ix tel ta chukele, ja ya juintel teme sujt' tel ta orae ya me xtal jkilex. ²⁴ Ak'beyame spatjibal yot'anik spisilik te wolwanejetik awu'unike sok spisilik te ch'ul lum yu'un te Jkajwaltike. Te mach'atik ayik ta Italia ya me spatbeyex awot'anik uuk. ²⁵ Te yutsil yot'an te Diose ayuk me ta atojolik.