TE XCH'UUNJEL OT'ANILE. ¹ Jich yu'un, te xch'uunjel ot'anile, ja te ya jna'tik te ya jtatik te beluk yakotik ta smaliyele. Ja te jna'otik te smelelil te ya jtatik te beluk ma jkilojtike. ² Melel te jchichmamtike lek k'ot sk'oplalik yu'un te xch'uunjel yot'anike. ³ Ta swenta te xch'uunjel ot'anile, ya xk'ot ta jkot'antik te ja smantal te Dios te pastaj spisil te beluk ay ta ch'ulchan sok te beluk ay ta balumilal, melel te beluk ya jtatik ta ilel pasbil yu'un te beluk ma chikanuk ta ilele. ⁴ Ta swenta xch'uunjel yot'an te Abele te k'ax jich la yak' milbil majt'anil te bit'il la yak' te Caine, jich albot sk'oplal te toj stukele. Te Diose lek la yalbey sk'oplal te Abel yu'un te majt'aniletik te la yak'e, sok te xch'uunjel yot'ane, te Abele lajemix stukel jauk me to yak to ta k'op manchuk me lajemix a. ⁵ Ta swenta xch'uunjel yot'an te Enoc te la yich' ik'el bael yu'un ma ba la yaiy te lajele. Ma la yich' tael te sbak'etale, melel te Diose ja la yik' bael. Melel te k'alal ma to yich' ik'el bael a, la yich' albeyel sk'oplal te ja la xch'uunbey smantal te Diose. ⁶ Jich yu'un, teme mayuk xch'uunjel ot'anile ma xju' te binax yot'an yu'un te Diose. Melel te mach'a ya xtal ta stojol te Diose ya me sk'an te yakuk xch'uun te ay Dios sok te ya yich' smajt'anik teme la sleike. ⁷ Ta swenta te xch'uunjel yot'an te Noeje, te la yich' albeyel tel koel te beluk ma to yiloj a te ya xk'ot ta pasele, jich jun yot'an la xch'uun spasel te jun barko te banti kol te mach'atik junax ayik ta snae. Te k'alal jich la spase, la yak'bey ilel smulik te mach'atik ayik ta balumilale sok ak'bot smajt'an yu'un te beluk toj la spase ta swenta te xch'uunjel yot'ane. ⁸ Ta swenta xch'uunjel yot'an te Abraham, te k'alal ik'ot, la xch'uun mantal sok lok' bael ta slumal yu'un le' ba yich' smajt'an k'inal ta yan lum. Te k'alal lok' baele, ma ba sna'oj te banti yak ta baele. ⁹ Ta swenta te xch'uunjel yot'ane, te kuxin ta bay yan lum te k'axel ak'bil yu'un te Dios te ya xnaine. La snainik nail pak' sok Isaac sok Jacob, melel janix ak'botik te beluk ak'bot te statike. ¹⁰ Melel te Abrahame ja yak ta yilel te lum te ay ta sbajt'el k'inale, te ja lum te mero nopbil sok ja lek pasbil yu'un te Diose. ¹¹ Ta swenta te xch'uunjel yot'anike, te Sara te ma stak' x-alaje, jauk me to la yich' ak'beyel yip sbak'etal yu'un yik'el te yale. Jich k'ot ta pasel te k'alal mamalix a te Abrahame, melel ja xch'uunoj te Dios te ja la yal te beluk ya xk'ot ta pasel ta stojolike. ¹² Jich yu'un, ta swenta te tul winik te ja te Abrahame, te le' nopol ya xlajix a, bek'ajik tsobol alnich'anetik yu'un te JICH K'OT TE BIT'IL EK'ETIK TE AY TA CH'ULCHAN TE BAYAL NAX TA ILEL SOK TE BIT'IL SJI'AL TE STI'IL TE MARE, TE MA STAK' TA AJTEYELE. ¹³ Ta spisilik in to, te ay xch'uunjel yot'anike, te k'alal lajik baele ma la staik te beluk la yich'ik albeyel yu'un te Diose. Janax la yilik te k'ejel to aye, la yalik te ma ba le' ayuk te snaike sok te k'axel nax ayik ta balumilale. ¹⁴ Melel te mach'atik jich la yalike, ja la yalik ta jamal te yakik ta sleel te mero slumalike. ¹⁵ Te jauk yakik ta snopel te ya xch'a sujt'ik bael te banti lok'iktele, la stak' sujt'ik bael te jichuke. ¹⁶ Jauk me to, ja la sk'anik jun slumalik te k'axem to xan leke, te ay ta ch'ulchane. Ja swentail te Dios te ma xk'exaw te ja Dios yu'unike, melel ja xchajp'anojbey jun slumalik. ¹⁷ Ta swenta te xch'uunjel yot'an te Abrahame, te k'alal la yich' ilbel te xch'uunjel yot'an yu'un te Diose, ja la yak' te Isaac. Te ja te tul snich'an te la yak' ta majt'anile, te janix la yich' ak'beyel yu'un te Diose. ¹⁸ Te jich la yich' albeyel te Abrahame: "JA TA SWENTA TE ISAAC TE YA XCHIKNAJ TE ATS'UMBALE." ¹⁹ Te Abraham xch'uunej yot'an te Dios te ay yu'el te ya stak' xcha'kuses tel te Isaac ta yolil te aelmeletike, melel la yil te Abraham te k'alal la yak' te snich'an te jich k'ot te bit'il milbil majt'anile, jauk me to ma la yich' milel melel komot yu'un te Diose, jich k'ot te bit'il cha'kuxtele. ²⁰ Ja ta swenta te xch'uunjel ot'anile, te Isaac la yak'bey bendición te Jacob sok te Esaú ta swenta te beluk ya x-ak'botik ta patilale. ²¹ Ja ta swenta te xch'uunjel yot'an te Jacob, te k'alal ya xlajix a, la yak'bey bendición ta tulutul te snich'nab te José. Te Jacobe la snijan sba ta sjol snabte' jich la yich' ta muk' te Diose. ²² Ta swenta xch'uunjel yot'an te José, te le' nopol ya xlajix a, la yal jilel te ya me xlok'ik tel te snich'nab Israeletik ta lum Egipto sok la yal jilel te banti ya xjil te sbakele. ²³ Ja ta swenta te xch'uunjel ot'anile, te k'alal bejk'aj te Moisese la yich' nak'el oxeb u, melel la yil te sme'-stat te t'ubil nax te alale. Ma la xi'ik te beluk la yal mantal te muk' ajwalile. ²⁴ Ja ta swenta te xch'uunjel yot'an te Moisese, te k'alal winikix a, ma la sk'an te la yich' albeyel te ja snich'an te yach'ix te Faraone. ²⁵ Ja la sk'an te yakuk xk'ax swokol sok te lum yu'un te Diose, melel ma la sk'an te la yaiybey sbujts' te mulil jun-chebuk nax k'aale. ²⁶ Ja k'ot ta yot'an te ja bayal xan sk'oplal te ya xk'ax swokol ta swenta Cristo melel te majt'aniletik te ay ta Egipto ma ba ya spajbey smuk'ul te bit'il ay ta ch'ulchane. Melel ja bajt' ta yot'an yilel te majt'anil te ya x-ak'bot yu'un te Diose. ²⁷ Ta swenta xch'uunjel yot'an te Moisés lok' bael ta Egipto. Ma ba la xi' te yilimba te muk' ajwalile, melel ja yak'oj sit ta stojol te Dios te machikanuk ta ilele. ²⁸ Ja ta swenta xch'uunjel yot'an te Moisés te la sk'ej te pascua sok te la stsijts'an ch'ich' ta ti'naeletik yu'un te israeletik ta swenta te ma ya xlajik ta milel a te ba-alaletik yu'un te mach'a tikunbilik tel te ya xmilwanike. ²⁹ Ja ta swenta te xch'uunjel yot'anik te israeletik te k'axik bael ta bay takin yolik slumil te tsajal mare. Jich k'anuk spasik uk te egipcioetike jauk me to ma la stak' k'axik bael melel bik'otik bael yu'un te ja'e. ³⁰ Ja ta swenta xch'uunjel ot'anil te jin koel te sts'akul te muk'ul lum Jericó, ja to jin koel a te k'alal la yich' juyinteyel jukeb k'aale. ³¹ Ja ta swenta te xch'uunjel yot'an te mulawil ants Rahab ma ba laj sok te mach'atik k'axin te mantaletike, melel ay yutsil yot'an te la yik' ochel ta sna te mach'atik tsajtaywanejetike. ³² ¿Beluk xan ya stak' jkalbeyex abi? ma xlaj jkot'an ta xcholel te bit'il ay sk'oplal te Gedeón, Barac, Sansón, Jefté, David, Samuel, sok te alwanejetike. ³³ Ta swenta xch'uunjel ot'anil te ju' yu'unik stsalel bayal lumetik, sok la spasik te beluk toj ta pasele sok la yich'ik te beluk k'axel albilike. Ju' yu'unik smakbeyel yej te león-ti' awal chojetike, ³⁴ la stubik te yip te k'ajk'e, sok ma la yich'ik milel ta espada, la yich'ik ch'abtesel yu'un te xchamelike, ju' yu'unik ta kerajel sok la yaiyik tsalaw ta stojol te mach'atik yaj-kontroik te talemik ta yan lumetike. ³⁵ Te antsetike la yich'ik cha'kusesbel te mach'a lajemix yu'unike. Sok ay yantik te mach'a k'ax swokolik te ma la sk'anik te ya yich'ik ak'el ta libre, melel ja ay ta yot'anik te ya xch'a kuxike. ³⁶ Sok ay yantik te la yich'ik labanel sok la yich'ik majel sok la yich'ik chukel ta kadenaetik. ³⁷ La yich'ik ch'ojel ta ton. La yich'ik set'el ta serrucho. La yich'ik milel ta espada. La slapik snuk'el chijetik sok tentsunetik. Mero me'ba ayik ta k'inal, mayuk beluk ayu'unik a, sok uts'inbilik a. ³⁸ Ma snujp'in te ayik ta balumilale, Beenik ta bay takin jochol k'inal, ta muk'ul witsetik, ainik ta bay xaabetik sok la spas snaik ta bay yutil lum. ³⁹ Ta spisilik in to, lek k'otik yu'un te xch'uunjel yot'anike, jauk me to ma to la yilik te beluk k'axel albilik yu'un te Diose. ⁴⁰ Melel te Diose ay bi xchajp'anoj ta jtojoltik te ja mero lek xane, yu'un ja ya sk'an te ya jkich'tik lektesel jich te bit'il la yich'ik lektesel uke.