K'AXEL AK'ABAIK TA LIBRE ¹ Ta swenta Cristo libre ayotikix, ja yu'un te k'axel libreayotikixe. Jich yu'un, k'axel me awak'abaik ta stojol sok ma me awak'abaik sujel ta at'el jich te bit'il sneelal toe. ² Jo'on Pabloon, ya me jkalbeyex ta atojolik teme la awak'abaik ta circuncisione, jich me k'oem te bit'il mayuk stuul awu'unik te Cristoe. ³ Ya jcha jkal xan, spisil winik te ya yak' sba ta circuncisión sujbil me ta xch'uunel spisil te beluk ya yal te mantalile. ⁴ Te ja'exe lok'emex ta stojol te Cristoe, teme ja ya aleik te lek ak'oplalik ta swentanax te mantalile; te ja'exe ma ba awaiybeyik yutsilal te yutsil ot'anile. ⁵ Yan te mach'a kuxulotik ta swenta te Espíritue, ay xch'uunjel jkot'antik te yakotik ta smaliyel sok smuk'ul jkot'antik te beluk toje. ⁶ Ta stojol te Cristo Jesuse, mayuk stuul ya xk'ot te circuncisión sok te incircuncisione, janax te ayuk xch'uunjel jkot'antik te ya xchiknaj ta ilel ta swenta te k'ux ya jkaiytik te yantike. ⁷ Lek yakex ta aelmal a. ¿Mach'a me la skomatik te ya ach'uunik te smelelile? ⁸ ¡Te mach'a la sloleybatik te awot'anik ma jauk yat'el te mach'a yik'ojexe!. ⁹ Xujt'uk nax te levadurae ya spajubtes spisil te mats'e. ¹⁰ Ay smuk'ul jkot'an ta stojol te Jkajwaltike, te jich ya anopik te bit'il ya jnopoke. Te mach'a yak ta xchebtesbel te awot'anike, ya me staik swokolik, chikan mach'a a. ¹¹ Jkermanotak, te yakukon to ta yalel sk'oplal te circuncisióne, ¿Bistuuk te yakon to ta nutsel jiche? te manchuk ya jchol te bit'il janax ta swenta te ay kolel ta stojol te Cristo te laj ta cruze, mayuk mach'a ya xlijk' sjol te jichuke. ¹² Jauk me to te mach'a yak ta xchebtesbelatik awot'anike, ja lek te ayuk bit'il ya sjosik lok'el sk'olol spisil te sk'unilike. ¹³ Melel ja la awich'ik ik'el yu'un te ay akolelike. Jauk me to, ma me atuntesik te akolelik yu'un te beluk ya sk'an te abak'etalike; Jauk me to ta swenta te xk'uxul ot'anile jech k'ux me ya awaiy abaik. ¹⁴ Melel junax k'oem sk'oplal spisil te mantalile, jai to: "K'UX ME AWAIY TA AWOT'AN TE APAT A XUJK'E, JICH TE BIT'IL K'UX YA AWAIYABAE." ¹⁵ Jauk me to teme ya awuts'in abaik sok teme amen ya awilabaik ta tulutul, bijanik me, melel ya me stak' ajinabaik yu'un. ¹⁶ Jich ya jkalbeyex, ak'a me abaik ta stojol te Espíritue ta spisil ora, jich me ma ba ya spas a te sk'anjel yot'an te mulawil bak'ete. ¹⁷ Melel te sk'anjel yot'an te mulawil bak'ete, skontroinoj te Espíritue, janix jich te sk'anjel yot'an te Espíritue, skontroinoj te mulawil bak'ete. Spisil ora yakalik ta stsakbel sbaik, jich yu'un ma stak' apasik xan te beluk sk'an awot'anike. ¹⁸ Jauk me to teme ja la swentainex te Espíritue, jich yu'un ma ba swentaatikix te mantalile. ¹⁹ Ta ora to chikan ta ilel te yat'el te mulawil bak'ete, jai to: yalel ta mulil sok yan ants o yan winik, te beluk ilaybil sbae, bayal beluk ya smulan spasel sok ya snop spasel te k'exlaltik sbae, ²⁰ xch'uunel lok'ombaetik, ts'ilwanejetik, la' ot'aniletik, tsaktombaetik, paichaletik, ora ya xlijk'sjolik, kontroinwanejetik, tsaltonba ta k'op, xatombaetik, ²¹ bik'tal-ot'aniletik, yakubel, jach' k'opetik, janix jich ay yantik xan abi. Jich nix te bit'il la jkalbeyex ta sneelal toe, te mach'a jich ya spase ma me ya x-och ta bay ta ajwalinel yu'un te Diose. ²² Jauk me to te sit te Espíritue ja te xk'uxul ot'anile, sbujts' k'inale, te lamal k'inale, te ay smalib yu'une, te lek yot'ane, te ay yutsil yot'ane, te ay xch'uunjel yot'ane, ²³ te manso ot'anile sok nix te ya stsajtey sbae; spisil in to mayuk mantalil yu'un. ²⁴ Spisil te mach'atik ayikix ta stojol te Cristo Jesuse, sjijp'anojikix ta cruz te sk'anjel yot'anike sok te beluk ya smulan te mulawil sbak'etalike. ²⁵ Teme ja ya xkuxinotik ta swenta te Espíritue, beenkotik me ta stojol te Espíritue. ²⁶ Ma me jtoybatik, ma me jachtik kera a, ma me jkak'tik sbik'tal jkot'antik.