SPATJIBAL OT'ANIL ¹ Jo'on Pablo, wolwanej puk k'op, ma ta swenta ants-winiketik te la jkich' jkat'ele, ja ta swenta te Jesucristo sok te Dios Tatile te la yich' cha'kuxesel ta bay aelmeletik yu'un te Diose, ² te jo'one sok spisil te jkermanotaktik te joineje, ya me yak'batik spatjibal awot'anik te ja'ex ch'uunjelex te ayex ta sjoylejal sk'inal Galacia: ³ Te yutsil ot'anil ayuk ta atojolik sok te lamal k'inal yu'un te Dios Jtatik sok te Jkajwaltik Jesucristoe, ⁴ Te la yak' sba ta lajel yu'un te jmultike, jich me ju' yu'un te la skoltayotik lok'el yu'un te yip te beluk malekuke, te jich sk'anjel yot'an te Dios Tatil jku'untike, ⁵ aka yich' ich'el ta muk' ta ora to sok ta sbajt'el k'inal. Jichuk. ⁶ Yanax ya jkaiy a te bit'il yakatik ta lok'el bael ta stojol te mach'a la yik'ex tel ta yutsil yot'an te Cristoe. Yanax ya jkaiy a te bit'il yakatik ta k'atbujel bael ta yan yach'il k'op. ⁷ Ma jauk ya jk'an jkal te ay yan yach'il k'ope, jauk me to ay winiketik te yakalik ta xjajchel k'op ta atojolik sok ya sk'anik syantesik te lek yach'il k'op yu'un te Cristoe. ⁸ Machuk me jo'otik o te ch'ul abatetik ta ch'ulchan, ya yalbeyex yan lek yach'il k'op te bit'il la jkaltike, ya me yich' bol k'opteyel yu'un. ⁹ Jich nix ya jkalbeyex te bit'il la jkal ta neelal toe, jich ya jcha' jkalbeyex: "Teme ay mach'a ya yalbeyex yan yach'il k'op te ma jauk te bit'il la awich'ik albeyel ta sneelal toe, aka me yich' bol k'opteyel yu'un." ¹⁰ Jich yu'un, ¿ja ba yakon ta sleel te lek jk'oplal yu'un te ants-winike o ja ba te jauk lek jk'oplal yu'un te Diose?¿Ja ba yakon ta sleel te lek nax yot'an jku'un te ants-winiketike? teme ja ya xbajt' jkot'an te binax yot'an jku'un te ants-winiketike, ma ba abaton yu'un te Cristo abi. ¹¹ Melel ya jk'an te yakuk ana'ik stojol jkermanotak, te yach'il k'op te la jkalbeyex awaiyike, ma sk'opok ants-winiketik. ¹² Te jo'one, ma la jkich' ak'bel yu'un tul ants-winik, ni ma la jkich' nojp'tesel yu'un. Ja la jkich' ak'bel jna' stojol yu'un te Jesucristoe. ¹³ Te ja'exe ja awaiyojik stojol te namey jkuxinel te bit'il judioon sok te bit'il bajt' ta jkot'an snutsel te ch'uunjeletik yu'un te Diose sok te la jk'an te k'axeluk laj sk'oplalike. ¹⁴ Te jo'one k'axem to jich la jch'uun te beluk xch'uunejik te judioetik te bit'il mach'a pajal jch'iel sok ta bay te jlumale. Jich me k'ax jelawen sk'oplal jku'un te stalel xkuxinel te jme'-jtate. ¹⁵ Jauk me to te Dios ja la stsaon k'alal ta xch'ujt' te jme'e sok ja la yik'on ta swenta yutsil yot'an, ¹⁶ la smulan yot'an te la yak'bon jkil te Snich'ane, jich te jo'one ya me jcholbey sk'oplal ta stojolik te mach'atik yan lumetike, ma jauk ba jle te ants-winiketik te yakuk xcholbon jkaiye. ¹⁷ Ma ba moon bael ta Jerusalén ta sleel te mach'atik neel wolwanej puk k'opetike, jauk me to boon ta sjoylejal sk'inal Arabia sok ta patil sujt'on tel ta lum Damasco. ¹⁸ Ta patil te k'axix oxeb ja'wil a, boon ta Jerusalén ba jna'bey sba te Cefas(Pedro), sok la join jo'lajuneb k'aal le'a. ¹⁹ Jauk me to ma la jkil te yantik wolwanej puk k'opetike, janax te Santiagoe, te yijts'in te Kajwaltike. ²⁰ Te bit'il yakon ta sts'ibubelex ta june, jamal ya jkalbeyex ta stojol te Dios te ma ba yakon ta spasel lot. ²¹ Ta patil boon ta sk'inal Siria sok Cilicia. ²² Ma to sna'bon jba a te ch'uunjeletik te ayik ta Judea te ayikix ta stojol a te Cristoe. ²³ Janax yaiyobonik stojol te jk'oplale: "Te winik te jun k'aal la snutsotike, ta ora to yakix ta xcholbel sk'oplal te xch'uunjel ot'anil te jun k'aal k'anuk slajinbey sk'oplale." ²⁴ Jich yakalik ta yich'el ta muk' te Dios ta swenta te beluk yak ta spasel ta jtojol te Diose.