¹ Junuk nax me ya x-at'ejotik sok te Diose, janix jich ya jkalbeyex wokol te manchuk jontolok nax ya awich'beyik te yutsil yot'an te Diose. ² Melel jich yaloj: "BINAX YUTSIL TE K'ALAL LA JKAIYBATIK STOJOL TE AK'OPIKE, SOK TE BIN ORA JUL TE KOLTAYELE JO'ON ME LA JKOLTAYEX." Ilawilik, ja'ix yorail te ya jkich'tik aiybeyel stojol te jk'optike. Ilawilik, ja'ix yorail te koltayele. ³ Te jo'otike ma jk'antik te ya jkak'tik ta ch'ayel te yantike, melel ma jk'antik te ya yich' bol-k'optayel te jkat'eltik te jkich'ojtike. ⁴ Jauk me to, te jo'otike ta swenta jkat'eltik ya jkak'tik ta ilel te yabatotik te Diose. Te jo'otike yabatotik te Diose, te k'alal ya sts'ijk' jku'untik spisil te beluk ya xtal ta jtojoltike, ta wokolil, ta mel-ot'an, ta il-ot'antayel, ⁵ ta majel, ta chukel, ta tsakel, ta tulan at'el, sok te k'alal ma xwayotikixe, ta wi'nal, ⁶ te mayuk mulil ta jkot'antik, ta sbijil ot'anil, te k'alal ay beluk yakotik ta smaliyele, ta yutsil ot'anil, ta swenta te Ch'ul Espíritue, ta swenta te xk'uxul jkot'antike. ⁷ Jo'otik me yabatotik ta xcholel te lek yach'il k'ope, ta swenta yu'el te Diose, jkich'ojtik ta swa'el jk'abtik te espadae sok ta jk'exentik te jmajk'iltike. ⁸ Te jo'otike yakotik ta at'el manchuk teme ya jkich'tik ich'el ta muk' janix jich ya x-at'ejotik te k'alal ma ba ya jkich'tik ich'el ta muk'e, te k'alal amen jk'oplaltik yu'un te ants-winiketike sok nix teme lek jk'oplaltik yu'unike. Skuyojotik te paslototike, jauk me to ja yakotik ta xcholel te beluk smelelile. ⁹ Bayal mach'a ya sna'botik jbatik jauk me to ya spasbaik te bit'il ma sna'botik jbatik yilele, jauk me to yakotik ta at'el. Yakotik ta at'el manchuk teme ya skuyik te ya xlajotikixe, jauk me to ¡ilawilik! kuxulotik to. Ya x-at'ejotik manchuk teme ya yak'botik castigo, jauk me to ma ju'em yu'unik te ya smilotike. ¹⁰ Te jo'otik yakotik ta at'el, ayotik ta mel-ot'an yilel jauk me to binax jkot'antik. Me'baotik yilel, jauk me to bayal mach'a ya jkak'beytik sk'ulejal. Yakotik ta at'el manchuk teme mayuk beluk ay jku'untike, jauk me to spisil jkich'ojtikix. ¹¹ Te jo'otike la jkaltikix te beluk smelelil ta atojolike, corintoetik, melel bayal k'uxex ta jkot'an. ¹² Te jo'otike bayal k'uxex ta jkot'antik, jauk me to te ja'exe ma jichuk k'uxotik ta awot'anik te bit'il jo'otike. ¹³ Jich yu'un ta ora to, ja snujp'in te pajal k'ux ya jkaiybatike, ja swenta te jich ya jk'oponex te bit'il jnich'anexe, k'uxuk ya awayonik jich bit'il k'uxex ta jkot'anuke. ¹⁴ Ma me ajoin abaik sok te mach'atik mayuk xch'uunjel yot'anike, melel, ¿pajal ba sok te beluk toj ta pasel sok te toybajele? sok ¿pajal ba sok te sakil k'inal sok te ijk'al k'inale? ¹⁵ ¿Ay ba beluk ya stak' xchap te Cristo sok te pukuje? ¿Pajal ba snopjibal yu'un te mach'a ay xch'uunjel yot'an sok te mach'a mayuk xch'uunjel yot'ane? ¹⁶ ¿Sok jun ba ay te templo yu'un te Dios sok te lok'ombaetike? Melel te jo'otike ja templootik yu'un te kuxul Diose, jich bit'il la yal te Diose: "YA XKUXINON TA STOJOLIK SOK YA XBEENON TA YOLILIK. JO'ON ME DIOS YA XK'OON YU'UNIK, SOK JA ME LUM YA XK'OT JKU'UN." ¹⁷ Jich yu'un: "LOK'ANIK TEL TA BAY YOLILIK, SOK K'EJABAIK LOK'EL LE'A," xi' te Jkajwaltike. "MA ME XA TSAKIK TE BELUK MA CH'ULTESBILUKE, JICH ME YA JKIK'ATIK TEL TA JTOJOL. ¹⁸ JO'ON ME TATILON YA XK'OON AWU'UNIK SOK TE JA'EXE JKAL-JNICH'AN ME YA XK'OEX," xi' te Jkajwaltik te spisil ya xju' yu'une.