ABATETIK YU'UN TE YACH'IL TRATOE ¹ ¿Yu'un ba jo'otik nax yakotik ta slektesel jk'oplaltik? te jo'otike ma yejt'aluk ya jkak'tik ts'ibubil jun te lek ya yalbeyex ak'oplalike, janix jichex uuk ma yejt'aluk te ya awak'botik ts'ibubil jun te lek jk'oplaltik yu'une, jich te bit'il ya spasik te yantike ¿o ya ba xtuun jku'untik? ² Ja'ex me te bit'il lek jk'oplaltik awu'unike, ts'ibubil ta jkot'antik, na'bil sba sok k'oponbil yu'un te ants-winiketike. ³ Te ja'exe ya awak'ik ta ilel te jichex yilel te bit'il jun te ts'ibubilatik yu'un te Cristoe, te jo'otik ba jkak'tike. Te ma ba ts'ibubil ta tintae ja ts'ibubil yu'un te Ch'ul Espíritu yu'un te kuxul Diose. Ma la yich' ts'ibuyel ta pechel ton, ja la yich' ts'ibuyel ta yot'anik te ch'ich' bak'etetike. ⁴ Ja in to ja me smuk'ul jkot'antik ta swenta te Cristo ta stojol te Diose. ⁵ Te jo'otike ma xju' jku'untik ta jtukeltik nax te ay beluk ya jk'antik jich bit'il te ja jku'untike. Melel, te mach'a ya yak'botik te ya xju' jku'untike ja te Diose. ⁶ Te Diose ja la sbijtesotik swenta jich k'ootik ta abat yu'un te yach'il tratoe. Ja in to ja yach'il trato te ma ts'ibubile melel ja ta swenta te Espíritue. Melel te beluk ts'ibubile ya xmilwan, yan te Espíritue ya yak' kuxinel stukel. ⁷ K'alal te Moisés la yich' tel te mantaliletik, te la yich' ts'ibuyel tel ta pechel ton, te yich'oj tel lajele, jauk me to tal sok bayal yutsilal te xojobaj uuk te sit-yelaw te Moisese, jich ma ju' yu'unik sk'eluyel te sit yelawe, melel xojetnax te yutsilale, jauk me to te yutsilale k'un k'un yak ta tubel bael ⁸ ¿Jauk to bal a te yutsilal te beluk ts'ibubil yu'un te Espíritue? ⁹ Melel teme bayal yutsilal te mantaliletik te ya yak'otik ta lajele, ¡jauk to bal te yat'elul te beluk toj ta pasele k'axem to xan jelawen yutsil stukel! ¹⁰ Melel, te neel mantaliletik te ay nax yutsilale mayuk yutsilal k'ot ta swenta te ja k'ax bayal yutsilal te yach'il trato te la yak'botike. ¹¹ Melel te beluk yak ta tubel baele la yak' yutsilal ¡k'axem to xan yutsilal te beluk sbajt'el k'inal aye! ¹² Ta swenta te ja jkich'ojtik ta muk' jai yach'il trato to, te jo'otike ma me xiwotik. ¹³ Ma jichotik te bit'il te Moisese, te la smuk ta pak' te sit-yelawe, swenta jich ma la yich' ilbeyel a te sit yelaw yu'un te israelitaetike, melel xojetnax sok te k'un k'un yak ta tubel baele. ¹⁴ Jauk me to te israelitaetike ma k'ot ta yot'anik te beluk yakik ta yilele. Janix jich ta ora to, stalemal makal ta pak' te sitike melel ayik to ta pokol trato. Te pak' te makbil yu'un te sitike ma lok'esbil, melel janax te Cristo te ya xju' yu'un ya sk'ejbaele. ¹⁵ Te k'alal ya yich' k'oponel te smantal te Moisese, ta pak'e ja ya xmakbotik yu'un te yot'anike. ¹⁶ Jauk me to teme ay tul te ya sujt'es yot'an ta stojol te Jkajwaltike, ya yich' k'ejel lok'el te pak' te makbil sit yu'une. ¹⁷ Melel te Jkajwaltike janix te Espíritue, te banti ay te Espíritu yu'un te Jkajwaltike le' ay a te koltayele. ¹⁸ Jich yu'un te jo'otik, te ma makalix te jsitike, ya stak' jkiltik te yutsilal te Jkajwaltike. Te Jkajwaltike yak ta syantesbelotik jich te bit'il sit-yelaw te ay nax yutsilale, te yan yan yak ta utsubel ta swenta te Espíritu te janix te Jkajwaltike.