¹ Teme ay mach'a ya xch'uun te Jesús te ja' Cristoe, ja me bejk'ajem ta swenta te Diose, sok teme ay mach'a k'ux yaiyoj ta yot'an te Tatile jich me k'ux ta yot'an te mach'a bejk'ajem yu'une. ² Jich ya jna'tik te k'ux ya jkaiytik ta jkot'antik te yal-snich'nab te Diose: Teme k'ux ya jkaiytik ta jkot'antik te Diose sok teme ya jch'uunbeytik spasel te mantalil yu'une. ³ Melel jai to ja xk'uxul ot'anil ta stojol te Diose: Te yakuk k'ejbeytik te smantale. Melel te smantal stukele ma ba wokol ta pasel. ⁴ Melel te mach'a bejk'ajem ta swenta te Diose ya me stsal te balumilale. Te beluk ya yaiy tsalaw ta stojol te balumilale: Ja te xch'uunjel jkot'antike. ⁵ ¿Mach'a te ya stsal te balumilale? Ja te mach'a ya xch'uun te ja Jesús te Snich'an te Diose. ⁶ Ja te mach'a tal ta swenta ja' sok ta swenta te ch'ich'e: Ja te Jesucristoe. Ma jauk nax tal yu'un te ich' ja'e, janix jich tal yu'un te la smal xch'ich'el te laj ta cruze. ⁷ Melel ay oxeb testigoetik yu'un: ⁸ Ja te Espíritue, ja te ja'e sok te ch'ich'e. Ta yoxchajp'al junax me ayik. ⁹ Teme ya jkich'tik ta muk' te testigo-k'op te ya yalik te ants-winiketike, jichuk me k'axem to xan ya jkich'beytik ta muk' te testigo-k’op te ya yal stukel te Diose. Melel te testigo-k'op yu'un te Diose ja in to: Te ja la yalbotik sk'oplal te Snich'ane. ¹⁰ Te mach'a ya xch'uun te Snich'an te Diose ja me xch'uunoj te testigo-k'op te la yal te Diose. Yan te mach'a ma xch'uun te sk'op te Diose, ja me la yalix a te ya spas lot te Diose, melel ma ba xch'uunoj te testigo-k'op te la yal te Dios ta swenta te Snich'ane. ¹¹ Ja in to ja te testigo-k'op te la yalbotikixe: Te ja Dios te la yak'botikix te jkuxlejaltik ta sbajt'el k'inale sok te kuxlejale ja ta swenta te Snich'ane. ¹² Te mach'a yik'oj ta yot'an te Snich'an te Diose ay me xkuxinel ta sbajt'el k'inal. Yan te mach'a ma xch'uunej te Snich'an te Diose mayuk xkuxlejal stukel. ¹³ La jts'ibubeyex ta awentaik, swenta yu'un te ya ana'ik te ay akuxinelik ta sbajt'el k'inale, ja'ex te ya ach'uunik te sbiil te Snich'an te Diose. ¹⁴ Jich ay smuk'ul jkot'antik ta stojol te Diose, teme ay beluk ya jk'anbeytik ta swenta te sk'anjel yot'ane, ya me yaiybotik stojol te jk'optike. ¹⁵ Janix jich, ya me jna'tik te ya yaiybotik stojol te jk'optike, sok ya me yak'botik te beluk ya jk'anbeytike. ¹⁶ Teme ay mach'a ya yil te yermano te yak ta sleel te smule, teme ma jauk ta swenta te lajele, ya me sk'an sk'oponbey Dios, jich te Diose ya me yak' xkuxin uuk. Ja me ya jkal yu'un te ay mulil te ma x-ak'wan ta lajele. Ay me mulil te ya x-ak'wan ta lajele jauk me to ma me ya jkal te ya ak'oponbeyik Dios yu'une. ¹⁷ Spisil mulil te beluk ma stojil ta pasele, Jauk me to ay me mulil te ma ta swenta uuk te lajele. ¹⁸ Jna'ojtik stojol te mach'a bejk'ajem ta swenta te Diose, ma ba ya sleulayix smul. Melel ja kananteybil yu'un te Snich'an te Diose, jich me ma stak' yich' uts'inel yu'un te pukuje. ¹⁹ Jna'ojtikix stojol te yu'unotikix te Diose, sok jna'ojtikix te balumilale ay ta sk'ab te pukuje. ²⁰ Jauk me to jna'ojtikix te talukix te Snich'an te Diose, sok ja la yak'botikix jna'tik k'inal, swenta yu'un jich me ya jna'beytik sba te mach'a smelelile. Jich jun ayotikix sok te smelelile, ja bi ja' te Jesucristoe. Te ja Snich'an te Diose. Ja mero kuxul Dios stukel sok ja kuxinel sbajt'el k'inal. ²¹ Jkal-jnich'nab, ma me ach'uunik te lok'ombaetike.