¹ Yuntzile tu yaala ti Moices: ² "T’AN u cajil Israel, caa waati:Wa un tul coolel cu yoontale cu sii sic un tul chan xiipal, beytuno letie cu p’aatal kasil siete kinoo, jeembix u p’aatal kasil chen joop’oc u yic u kinil u meese. ³ Tu ocho kine yaan u xoot’ol u taabal u tuch le chan xiipalo. ⁴ Beytuno u yudz quintaal u kikel u mamae maun ch’enel caliquil maa kuchuc oxlajun yetel oxp’el kini. Leetie maa kabét u machic mix baa quiliichi mix caa oococ le tux yan u najil much’talo caliquil maa chuuc pajac u kinil u p’aatal utzili. ⁵ Baale wa leeti cu sii cic un tul chan chuupale, letitune cu p’aatal kaasi ichil caap’el semanas, jeen bix chen joop’oc u yic u “meese”. -Beytuno u yudztal le mamatzilo ma un ch’eenel ichil sesentaiseis kinoo. ⁶ Le chen dzoococ u kinil u yudztalo, wa yoolal un tul chan xiib wa yolal un tul chan chuupal, leetie kabét u tasic un tul chan xiibil taman un p’el jaab ti bey un p’el siibal cun toocbile, yetel un tul sacpacal loobayen wa un tul mucuy bey un p’el siibal ti kebane, tu jol u najil much’tal ti yunkin. ⁷ Beytuno leeti cun kubic tu tan Yuntzil cu metal pixkeban yolal leeti, leetie cu p’aataal paate utzil yetu kikel. Lela leeti u leyil tial le cooleloo cu sii sicoo wa xiipal wa chan ch’uupal. ⁸ Wa leeti maun beytal u manic un tul chan xiibi taman, beytuno leetie kabét u bisic caatul mucuy wa caatul sacpacal loobayeen, un tul bey un p’el siibal cun toocbile, u jeelo tial un p’el siibal yoolal keban, le yunkino cu meetic pixkeban yoolal leeti; Beytuno leetie cu p’aatal utzil”.