¹ Wo malaikha ookapela osardes ahaantikha: Ala ari moolumo wayaale arina minepa saapa tjamluku ni ethontho saapa: Kinaatjuwela mitekotjaan´nho: Onvira mookumini ni ori ookwa. ² Namawehaweha oneehaka yaahanle wira ekwe, konttha akaapwanhan´ne mitekotjaya tjooreera weriyari wamlukwaaka. ³ Phimaana muupuwele wira n´nawaakenlaka ni wiiwa, mwiiwenle ni mwiitutthuwe. Ni, weehiwehaweheke, mi kin´hala owa toko thapaya, ni we khun´hala otjuwela owakatthini on´halaaka wooweela. ⁴ Masi ahaavo matjina oosardes ahiriipihale tjoowaratjaya. Ayenatja yeetha nimi anawaraleene ekuwo tjootheela, vano ari oopwanela. ⁵ Wayoole nkootthema nkoowara ekuwo tjootheela ni akin´hala ofutha ntjinanawe nliivuruni yeekumi. Mi kinaarwaa ohimyatja ntjinanawe weeri waatthumwanaka ni weeriyari womalaikhaaya. ⁶ Rina maaru iiwe n´nepa en´himyaaya nkeretja. ⁷ Womalaikha okeretja Ofiladelfia ahaantikha: Alaa moolumo wayaale ari owaamini ekweeli. Yena haana esaavi tja Davi, enthukula ni khaavo nthuka, ni athuka khaavo nthukula. ⁸ Mi kinaatjuwela empamkesakaa. Oweheke empamkaaka ohoolowaa mkhora n´motja woothukuliya hiinkhalattho oopheela othuka. Kihotjuwela wira orina ekuru vakaani. Tjitjonn´mo, onawinwenla moolumwaaka ni khunkhotha ntjinanaka. ⁹ Tthimi kin´hala wira ampwanela osinagooga wamtjasera, yaale aniitjiireela wira majudeu ni ahikhanle, masi yootthaka, kinkoopanka wira awe ni akokhore weeri enhaatjinhu ni anaahala otjuwela wira kihoofentani. ¹⁰ Nkwaha n´motja oniiweleleenhu tjoohimyatjaka nvilelaka vakaani vakaani, ni toottho kihoosumka owakatthi woothehathehiya on´hala owa ntuniyani, wira athehiye yaale amkhala wathayani. ¹¹ Kinaawa woohipitja, erineeyo wira hikhale nkussa ethuvweeyo. ¹² Wa yoole nkoothema mi kinkoopamka ntthato mpaani wamlukwaaka ni yena khan´halattho okhumavaa. Kin´hala wantikha wa yena ntjina namlukwaaka, ntjina weepooma yamlukwaaka nintjinanaka nikitthi. ¹³ Rina maaru iiwe en´himya n´nepa n´makeretja. ¹⁴ Womalaikha okertja olaodiceia ahaantikha: Amem niira tjo: namoona eekweeli ni owaamini, woopatjerani mpaka nimluku. ¹⁵ Kinaatjuwela mitekotjaan´nho: Khunakhala oririya wala oviha; Waakookhala tjani oririya wala oviha. ¹⁶ Konttha we ori oohilipa, oohirirya wala oohiviha, mi kinaahala wuuraphyaa mwaanomwaka. ¹⁷ N´niirelani: "Mi kitthaatjiri, kihaana mihakhu tjintji ni akinpheela ethu". Ni khamuntjuwela wira mrii oohitheeliya, oohithu, mwaamassikhini, oohoona ni mri tjiitjo. ¹⁸ Kinoohimeerya wira otthumeke ewooro yoopamkiya wamooroni wira otthaatjiriki, owareke tjootheela wira ohikhale ookhupatja ehaaya tjomuupuwelelwaa, ni tjoohiloka wira tjootjare n´meetthoniwaa, wowiira woone. ¹⁹ Kinawaavaanhiha ni kinawaathukela anaafentaaka. Phimaana, wiirathavenle ni wiitutthuwe. ²⁰ Mi kiri, wankhora ni kinawaatha. Vano nthu iiwaka ntjuunaka ni athulaka nkhora, mi kinaahala okela mpaaniwawe, kinkoolya niyena niyena nimi. ²¹ Wayoole nkoothema kinaahala onvaha nphanthe wookoma nimi weehitjeniwaka, toko mi tjithemalyaaka kookomaka naatthumwanaka, weehitjeniwaya. ²² Ri nimaaru iiwe en´himyaaya n´nepa n´makeretja.