¹ Womalela wontivela, Maria Madalena, Maria, anumwanawe Tiago ni Solome yahothumatja makura onukela wowira yanukelihe herutho ya Yesu. ² Nihuku nopatjera esumana, owitjusuru, nikumaca ntjua, ayenatja yahorwatja npaka omahiye. ³ Ayenatja yanakohana n'thu ni n'kwawe: "Tipani n'hala onipikirissela n'luku?". ⁴ Okathi opathusaliaya men'tho, yahona wira havo pikirissale n'lukun'no, ni nari nulupale. ⁵ Akelakatjaka nmahiyeninmo, yahomonatja mwavano nmotja onawarale evestito yothela, nokomale nphathi welopwana, ni yahokalatja othuthuwatja. ⁶ aheerelatja: ''N'hovatje. nnowehawehatja Yesu, o Nazare, yoyo okomeliye wansalapani. Yena ohun'welela!. Vaa kavo. Monatjeke opuro weesiyawe. ⁷ Vano nrweke muahimereke arumeyawe ni Pedro wira Yesu nawa wariyariwinho o Galileia. Won'wo nnahala omona, ntoko Yena tjahimalyawe". ⁸ Ayenatja yahokuma ni yahothawenlatja omahiye, yathethemelatjaka yahokala owova ventji. Kayan'himerale ethu hata nthu, mana yaari nuwova. ⁹ Navuwelen'le owitjiso nihuku nopatjera, Yesu ahon'kumenla Maria Madalena, yole amomolalhawe massuhapa sapa. ¹⁰ Yena hokuma ni hohimia yele yonaliawe wa yale otene yarinawe, aala yera etjukulaka ni yun'laka. ¹¹ Ayena yahin'wa wira Yesu n'kumi ni ahonia ni yena, kayakupalatjale. ¹² Tjinavirale tjithu ntoko n'nha, Yena ahakumenla tototho eli wale yale man'nana ovirikana, anari ephiro yomattaani. ¹³ Ayenatja yahoruatja wahimeria assikwaya, ni kakupalatjale. ¹⁴ Vano, Yesu hakumen'la okumi na n'motja, anathukamanale wa metja, ahavanhiha mwaha wolipiha n'rima, wohakupali wa yale yakumenlaliawe yena navuwenlale. ¹⁵ Vano, ahirela: "N'rue etunia yotene, mwalalhee Nulumo athu otene. ¹⁶ Olee nkothuna ni apattissiaka narwa wopua, vano hin'rua othuna narwa ottarussia. ¹⁷ N'nha mithonhihero n'nha tjin'kowatara aale an'thunale: "Mua n'tjinanaka n'nahala womola minepa tjotakala, n'narwa wuluma mananna makuawe, ¹⁸ n'nahala ovara enua ni matata ni n'narua ovuria eveneno, katjin'hala owerihani ethu; n'nahala wavara aretha ni matata anarua ovona". ¹⁹ A pwiya Yesu anulumale nayenani, ahokussia wirimo ni hon'koma mono wo n'lopwana wa N'luku. ²⁰ Arun'mua yahokumatja ni yaholalia n'panthi wotene, a Pwiya evaraka n'teko na yenani yanokupali nulumo muaha tjomitikiniho tjomatikiniho tjathara.