¹ Enaviraleene ela yaahokala esukuhulu yo ma Judeu, ni Yesu aahowela o Jerusalem. ² Ehaavo o Jerusalem ehime waathamela wankora wopwithipwithi, niiramaico eniihaniya Betesda, ni ehaana evirelotjaya thanu tjookuneeliya otawaya. ³ Athu entji oowerennha, ohoona, oothumpela, ni owuntakyaa, yaaholamalela wonkoma vaavale mmamikorani [awehenraka weenheenha wo maatji, ⁴ Kontha nlaika naa Pwiiya nankuruwela ni aneeheenhiha maatji okati ni okati ni woyoole aakela ni maatji yeenheenhaka anvonihiya wo retha piiretha]. ⁵ Nlopwana mmotja aahokala owerennhaka myaaka thalaathini na naane, onari vaavale. ⁶ Onaamonale onarupale ni atjuwelaka wira aari vaavale owakati mwintji, Yeesu aahonkoha: "Onaaphela ovonihiya?". ⁷ Nlopwana owereennha aahakula: "Nlopwana, minnhaano akirina nthu oopheela okihela n-himeni, maatji wanenheenhaaya, okati onrwaaka nkina onvira oholowaka". ⁸ Yesu aahomwirela: Ovuwe, okuse ekoryaa, ni weethe". ⁹ Nanaanoru, nlopwanoole aahovona, ni aahokusa ekoryaawe ni aheetha. Nenne nihukunne naari ntivela. ¹⁰ Vano ma Judeu yaahomwirela nlopwana aavonihiyoole: "Elelo ntivela kunthunihiya okusa ekoryaa." ¹¹ Nlopwanoole aahakula: Yoole okivonihale eeralee: Okuse ekoryaa ni weethe". ¹² Yaahonkohatja, vano: Tipani owiirenle: Okuse ekoryaa ni weethe?". ¹³ Vano nlopwana aavonihiyoole kantjuwela anvonihale, maana Yesu aahokuma ole opuroole nnsiirini nlathu wootjara athu entji vaavale. ¹⁴ Onavirale okati Yesu aahonphwanha nlopwanoole nkeretja, ni aahomwiirela: Vano woovona; Ohotheke tho, wo wira ethu yootepa otakhala ehikumenle. ¹⁵ Ole nlopwanoole aahorwaa waahimeera ma Judeu wira Yesu tanvonihale. ¹⁶ Pimaana akulupale o ma Judeu yanonthathara Yesu kontha yena aapanka nnha tjithunnha ntivela. ¹⁷ Ni yesu aahowakulatja: Apapaaka anaavara nteko mpaka nna, ni minnhaano kinaavara tjitjommo. ¹⁸ Pimaana, nanlelo ma Judeu yaapheela omwiivatja, kahii pahi nlathu woohanhuriha ntivela, masi nlathu woomwihana Nluku apapaawe, eepaankaka oolikaana ni Nluku. ¹⁹ Yesu aahowakulatja: Weekhweli, weekhweli kinaawuhimeeryani, wira mwaana kanlamuliya opanka ethu wa yooyo, woohikala yeele yena enwonaawe apapaawe apankaka; ²⁰ kontha apapaawe ananfenta mwanawe, ni tjithu tjootene tjinpankaawe onaamonihera, ni onaahala otonhiihera tjithu tjintji tjoovirikana ni nnha, ni nhuu nnaahala othamala. ²¹ okhala wira apaapa anawunwenliha athu ookhwa ni anaavaha okumi, ni mwaana tjotjommo onaawavaha okumi athu anonthuna. ²² Pimaana apapaaka kaavo anon-hukumwaaya, masi ayena ahonvaha mwanaya ohukumu wootene, ²³ wo wira ootene anthithimihe mwaana ntokoo tjinaathithimihaaya apapaawe. Ni ole ohinonthithimiha mwaana, ohinaathithimiha apapaawe anrumale. ²⁴ Weekhweli, weekhweli, kinawumeeryani wira oninwa moolumwaaka ni oninkupali okiwaanale, onaakala okumi woohimala, ni kanrwaa ohukumwiya, masi hovira wuukhwaani arwaaka wuukumini. ²⁵ Weekhweli, weekhweli kinawuuhimeryani, wira onaawa okati, ni ohophiya, athu ookhwa wanrwaaya winwa ntjuu na mwaana a Nluku, ni wo yaale anrwaa wiinwa, anaahala okala akumi. ²⁶ ntokoo apaapa tjirinaaya ekumi aneenyaaya,wira akalane ekumi veekhaweeru, ni tjitjommo ayena ahonvaha ²⁷ ni apaapa ahonvaha mwanaya eworti wira ahukhumu , kontha yena mwaana a Nthu. ²⁸ N-hitikinihiye ni tjennha tjithunnha, maana oniira ophiyaka okati wo yaale anrwaa okala mmahiye anrwaa winwa ntjunawe ni nuukhuma: ²⁹ Ale ankoopanka tjoorera, anrwaa ovuwenla weekumi, ni ankoopanka tjoonanara, anrwaa ovuwenla wowuuhukhumwiyani. ³⁰ Minnhaani nkilamuliya opanka ethu vwwkaka. Ntokoo tjineewaka, tin-hukumwaaka, ni ohukhumwaaka tiwo sariya, kontha akimpheelatja opanka othuwaka, masi othuna wa yoole okiwaanale. ³¹ Kakala veekaka, oovaha osaahiti wawaka, osaahityaaka kunakhala weekhweli. ³² Ohaavo nkina onkoona minnhaano, ni minnhaano kinaatjuwela wira osaahityaawe wo minnhaano ti weekhweli. ³³ Nhu n-haaveleeliha anamahimya wa tjuwau, ni yena aahovaha osaahiti weekhweli. ³⁴ Piimaana osaahiti kinaakelaaka kunkhuma waathu. Minnhaano kinuuluma nnha tjithunnha wo wira nhu nkale owoopwaa. ³⁵ Tjuwau waari nthuko waapharela ni waamwaalela ni , owakati vakaani mwaahotheeliya ni nthukwaawe. ³⁶ Masi minnhaano kihaana osaahiti muulupale woovirikana wa Tjuwau, maana miteko tjikivalyaya apaapa wira kivare, tjennho mitekonnho tjinaakivaha osaahiti wira apaapa takiwaanale. ³⁷ Apaapa aneenene, akiwaanale, ahokivahera osaahiti. Nhuu kannatoko winwa ntjunaya, hataa kannoona makalelwaaya; ³⁸ ni hataa kannakalana nuulumonaya wa nhuu, maana kannonkuli ole ayena onrumalyaaya. ³⁹ N-wehawehe tjoolepiya; kontha nhuu mwinkupaleela tjennho okala okumi woohimala, ni tjennho tjinaakivahera osaahiti; ⁴⁰ masi kamwinthuna okiweela minnhaano wo wira nkalane okumi. ⁴¹ Minnhaano nkinaakela waarya waathu, ⁴² masi minnhaano kinawuutjuwela wira kanrina n-hinawinhu nifento na Nluku. ⁴³ Minnhaani kiwaale mwa ntjina napaapa, ni kankaakenlale; masi nthu nkhwaawe awaa mwa ntjinanawe, nhuu nnarwaa omwaakenla. ⁴⁴ Mwinrwaa okupali tjani, nhuu nnaakenla waarya wa nthu ni nkhaawe, masi kamwinrweela waarya wa Nluku mmotja? ⁴⁵ Kanunpuweela wira yeemi kinrwaa owootheryani ohoolo wa paapa. Ole onwootheryani kanlee Moises, yooyo non-wehererennhu. ⁴⁶ Nnankupanli Moises, ni mi mwaarwaa okikupali, kontha yena hokivahera osaahiti, ⁴⁷ Vano mwaahikupaliki ethu elepalyaawe yena, vano mwinrwaa okupali tjani moolumwaaka?".