¹ Vano, Pilatos aahonkusa Yesu ni aahoruma wira ahomakatjiye. ² Atoropaayo yaahothotha ekhara yo minwa; yaahommwarihatja mmuruniwawe ni yaahonwariha mantha. ³ Yaahonweelatja ni yaahomwirelatja: "Esalaama, mpewe o ma Judeu". Ni yaahomwathatja. ⁴ Vano, Pilatos aahokuma tho ni aahiirela athwaayo: "Moone, mi kiniira kinwaanaka wo wira ntjuwele wira nkonaale ethu ethekalyaawe yena". ⁵ Yesu aahokuma nawarihiye mantha ni ekhara yo minwa. Pilatos aaherelatja: "Moone, orii va nlopwanooyo!". ⁶ Ni anamukutho oolupale ni ananteko wamonalyaya Yesu, yaahokuwela yiiraka: "Akomeliye, akomeliye!". Pilatos aaherelatja: "Mwinkuseke ni mwinkomelek mwasinenennyu. Kontha minnyaano nkonaale ethekalyaawe". ⁷ Majudeu yaahomwakula Pilatos: "Hinnyaano nihaana nlamulo, ni mwaha wonlamulo yena ohaana okhwa, kontha yena hiipanka veekawe mwaana a Nluku". ⁸ Vano Pilatos winwalyaawe ela yohimiyeela aahokala owoopopihiya ventji; ⁹ Ni aahokela tho mpaani , ankohaka tho Yesu: We onkuma vayi?". Vano Yesu kaamwakunle hata ethu. ¹⁰ Vano, Pilatos aahomwiirela: "We kunkaakula? kontjuwela wira mi kihaana ekuro tjowuuthukula ni tjowuukomela?". ¹¹ Yesu aahomwakula: "We kowarwaa okalana ekuru wa minnyaano, woohivahiya wiirimu.Pimaana nthu okivahenrale wa we ohaana etampi yuulupale" ¹² Mwahaa wa yeeyo, Pilatos ahomananiha onthukula, masi ma Judeu yaahokuwela yiiraka: We wanthukulaka ola nlopwanoola, kuhii npwaawe Cesar. Yoole ootheene onipanka mpewe onmuuluma yonanara Cesar?. ¹³ Pilatos winwalyaawe ala moolumwaala, ahonkumihera Yesu ota, ni aahonkoma ehitje yoolamula, nipuro niihaniya mpapatho womaluku, ni ebraico yiihaniyaka ,Cabata. ¹⁴ Vano naari nihuku noothonkomanihiya epascoa, weethelaka okati wo naasita. Pilatos ahiirela ma Judeu: "Moone, orii va mpeweehu!". ¹⁵ Ayena yaahokuwelatja: "Ota, ota; akomeliye!". Pilatos aheerelatja: "Kinkomeleke mpewennyuuyo? akulupale aanamukutho yaahakula: "Kanirina mpewe, wahuukala Cesar". ¹⁶ Vano, Pilatos aahavahatja Yesu wo wira akomeliye. ¹⁷ Yahiinkumera Yesu ota, ni yena aahokuma onakusale nsalapa arwaaka opuro onihaniya Caveira, wonwo niiluka hebraica onihaniya Golgota. ¹⁸ Wonwo yaahonkomelatja ni,wamotja ni yena, mavatinyu meeli, mmotja wokula mphanthe, ni Yesu eriyari. ¹⁹ Pilatos aaholepa yoolepiya, aheesa wansalapani, ni yaalepiye: "YESU O NAZARE, MPEWE O MA JUDEU". ²⁰ Ma judeu mentji yaahosoma yeeyo yolepiyeeyo, kontha opuro Yesu waakomeliyaawe waari wakiviru nuupoma; ni yoolepiya yaari ni braico,elatin ni egrego. ²² Vano, akulupale aanamukutho o ma Judeu yahomwirela Pilatos: "Ohilepe: Mpewe o ma Judeu, masi: Ola nlopwanoola eeralee: "Minnyaano kimpewe o ma Judeu"". ²¹ Pilatos aahakula: "Elepalyaaka, koolepa". ²³ Vano atoropaale wankomenlyaaya Yesu, yahonrulatja ekuwotjawe ni yaahikawanatja miphanthe mitjese, emotja wo kula toropa; ni nleya naarina nlinha, naathothiye nootheene. ²⁴ Vano, yaaheratja nthu ni nkhwawe: "Nihaahulatje; masi ninrwaa oriha wo wira noone wira enrwaa okala ya pani". Eyo yaakumenlale wo wira tjoolepiya tjimaliheriye: "Ayena yaahokawelana ekuwotjaka yaayoru, ni ekuwotjaka tjooriheliya otjaaliya". Atoropaayo aapanka nnya tjithunnya. ²⁵ Ni, mphanthi wonsalapa, yaarii oweemelatja, anumwanawe, ahiimaaya anumwanawe, Maria, amwaara a Clopas, ni Maria Madalena. ²⁶ Yesu wawoonalyaawe anumwanawe ni , onawaathamenle nrumeyi anfentesaawe, aaheerela anumwanawyale: "Nthiyana, mwaninyu tuuyo!". ²⁷ Vano aahomwiirela nrumeyuule: "Anumwana taayo!". Ekhumeo yoole okatyuule mpaka ohoolo, nrumeyuule ahonkusa nthiyanoole owannyawe. ²⁸ Wamanlyaaya eyo, Yesu, atjuwelaka wira tjithu tjootene tjaahomalela, wo wira tjimaliheriye tjoolepiya, ni ahiira: "Okivola nthona". ²⁹ Naahavo vale nthooka no vinaagre, vano yaahoheliya wansawuni evinagre enatomennye wanthaleni, ni ahonvusa malakwaawe. ³⁰ Wawuralyaawe Yesu evinaagreele, aahera: "Yoomala". Ahooromiha murwaawe ni aahovaha nnepaawe. ³¹ Nlathu wookala nihuku noothenkemanihiya, wo wira erthunnyo tjihikale mmisalapani nihuku nontivela(maana ntivela naari nihuku no fayita), Ma judeu yaahonlepela Pilatos wira manyaa aalopwana yaakomeliyaayo akale owuntakatjiya, ni eruthutjaya tjikumihiye. ³² Vano, atoropa yaahowa wuntakatja manyaa anlopwana oopatjera ni onaayeli yaakomelatjiye ni Yesu. ³³ Wamwaathamenlyaya Yesu, yaahomona wira aahokhwa; pimaana kayaamuntakatjale manyaayo. ³⁴ Vano toropa mmotja ahon-homa ni nivaka mpanthe mmotja, naananoru yaahokuma ephome ni maatji. ³⁵ Ole oonale ela naavaha osaahiti, ni osaahityaawe ti weekhweli. Yena onaatjuwela wira onuuluma ekhweeli, wo wira tjitjommo nkupali. ³⁶ Nnya tjithunnya tjikumenlalee wo wira tjoolepiya tjimaliheriye: "Kanuuntiye hataa nikuvanawe nimotja". ³⁷ Ni yoolepiya ekina eniira: Anrwaa onweha ole onthekenlyaaya. ³⁸ Waviralyaya nnya tjithunnya, Jose o warimteya, aari nrumeyi a Yesu nsiirini nlathu woowova ma Judeu, aahonlepela Pilatos wira akuse eruthu ya Yesu. Pilatos aho-hiyera. Vano, Jose aahowa okusa eruthu ya Yesu. ³⁹ Tjitjommo aahowa Nicodemos, yoole amonannale Yesu ohiyu. Yena aahowaana makura otakaniheriya ni aloes wookala elibra eminya elemelelwaaya. ⁴¹ Vano, yaahokusatja eruthu ya yesu, yahonthukatja niikuwo yoothela, ni tjithu tjoonukhela, ntoko tjaaryaya elamalelo yo ma Judeu woophela osikha eruthu. ⁴⁰ Opuro waakomeliyaawe yaahavo ematha, ni mmathanimmo yaahavo mahiye onaanano yaayo yaari ahinasikiya hataa nthu. ⁴² Kontha naari nihuku noothenkemanihiya no ma Judeu, masi maana mahiyaayo yaari wakiviru, yaahomweesatja moomo Yesu.