¹ Minnhaano kinri weekhweli, ni apaapa phanlimela. ² Eritta yootene eri nimii, ni kineema n-hokhorokho, Yena onaathikila; ni eritta yootene eninma mihokhorokho, Ayena anakwetjera wiira wiime mihokhorokho tjintji. ³ Nhuu nrii oorerihiyeene ni nuulumo kinkhalaaka kuuhimeryakani. ⁴ Nkale ni minnhaano, ni mii ni nhuu, ntokoo eritta veekhayaru khanlamuliya winma n-hokhorokho, waahikhale mwinrini, ni nhuu tjitjommo kamwinlamuliya, mwaahikhale ni minnhaano. ⁵ Minnhaano kiinri, nhennhuva miritta. Ole onkhala ni minnhaano, nimi ni yena, yooyo onaavaha mihokhorokho tjintji, maana woohikhala ni minnhaano kiivo enrwennhu opanka. ⁶ Ole ohinkhala ni mi, onaariheliya ota ntoko eritta, ni enamunma; ni tjennho erittannho tjinaathukumanihiya, tjiriheliya wamooroni ni tjipahiyaka. ⁷ Mwakhala ni mii, ni moolumwaaka okhala ni nhu, mwinrwaa olepela ethunennhu, ni nnaarwaa ovahiya. ⁸ Apaapaka anvuwihiya niila: wo wiira mwiimme mihokhorokho tjintji; ni wira alawihe okhala amwithutjaaka. ⁹ Toko tikifentalyaaya apaapa, ni tjitjommo ni mi koohutentani, nkhale nnifentoniwaka. ¹⁰ Mwasunka ekettelo tjaka, mwinrwaa okhala nnifentoni waka. Ntoko minnhaano kinsunkaaka ekettelo tjaapaapa, ni mi kirii nnifentoniwaya. ¹¹ Nnha tjithunnha kinuuhimeerani wo wiira oteeliyawaka okhale ninhuu, ni otteliya winhu olikane. ¹² Ela tiikettelwaaka: wowiira nfentane nthu ninkwaawe,ntokoo tjuufentalyaakani. ¹³ Kuuvo orina nifento nuulupale noovikana nna: Wiira nthu onvaha ekumyaawe nlathu waasimpwanaawe. ¹⁴ Nhuu mwinkhala asimpwanaaka mwapanka enuurumaakani, ¹⁵ vano nkinwiihanani tho ananteko; kontha nanteko khantjuwela ethu empankaawe ole nonvarelaawe nteko; massi minnhaano kinwiihanani asimpwanaaka, kontha minnhaano kinawuutjuwelihani yootene kinwiiwaka apaapaka. ¹⁶ Kahii nhu nkithanlale minhaano, massi timi kuuthanlaleni, ,ni kiniira wo wira nrwee, ni mwinme n-hokhorokho,ni n-hokhorokhwennhu okhale; wo wiira yootene enrwennhu waalepela apaapa mwantjinanaka, yena oovaheni. ¹⁷ Ela tinuurumaakani, wo wiira nfentane yaayoru. ¹⁸ Etuniya yuuthanhani, ntjuwele wira okithanhalee mii ohinuuthanhani nhuu. ¹⁹ Nhuu nnari owatuniyani, etuniya yanrwaa ofentani; massi maana kan-hiyena owatuniyani, massi minnhaano kohuuthanlani otuniyani, Pimaana etuniya enawuuthanhani. ²⁰ Muupuwelele kinuuhimeerakani: nanteko kahii muulupale onvikana ononvarelaawe nteko.Mwakitharatharaka, ninhuu tjitjommo mwinrwaa otharathariya; mwasunka nuulumonaka, naayena anarwaa osunka nuulumoninhu. ²¹ Massi tjootene anrwaa opanka nlathu wo ntjinanaka; kontha kaanontjuwelatja ole okirumale. ²² Minnhaano kahaawale, walaa kaahahimeerale, kayaarwaa okhala etampi; massi vano khaarina mananna owiitjaakiha mwaha wo tampitjaya. ²³ Ole onkithanha, onaathanha tjitjommo. ²⁴ Yiiriyaka wariyariwaya nkaapankale miteko ohinapankaawe nthu nkina, khayaarwaa okhalana etampi; massi vaa ahoonatja, massi motheenemmo ahokithanha minnhaano, naapaapa. ²⁵ massi eyo erii yo wira nimaliheriya nuulumo nantikiye nketteloniwaya: Aakithanha woohi nlathu. ²⁶ Massi awaaka namamaaliha, kin-haalaka woovelelihani okhumaka waapaapa, ole nnepa weekhweli, onkhuma waapaapa, yooyo onaakivahera osaahiti. ²⁷ Ni nhuu tjitjommo nnaahala okivahera osaahiti, kontha nrii nimii nenne ekhumelo yoopatjera.