¹ Mwiitjukulatje wanrimani winyu mwinkupali Nluku; nkikupali tjitjommo minnyaano. ² Ethoko ya paapa ahaavo mapuro mentji; yahaari tjommo, ³ Minnyaano kanrwaa owiirelani, kinrwaa woothenkemaniherani opuro. Ni minnyaano koothenkemaniherani opuro, kinaahala owa ekwaha ekina, ni kinaahala owakenlani yeemiyaano, wo wira opuro kinrwaaka okala minnyaano, ni nyu tjitjommo nkale. ⁴ Nyu nnaatjuwela ephiro enrwaaka". ⁵ Tome aahimwirela Yesu: "Pwiya, kanintjuwela onrwennyu. Ninrwaa otjuwela tjani ephiro?". ⁶ Yesu aahomwirela: Minnyaano kiiphiro, ekhweeli, ni ekumi, kaavo onwaa wapaapa wahuukala wa minnyaano. ⁷ Nyu nnakitjuwenle, mwanrwaa watjuwela titjommo apaapa; Okuma phiyaaruva mpaka ohoolo nyu nnamwaatjuwela ni nnamoonasa. ⁸ Filipe ahiimwirela Yesu: "Pwiiya, onoonihere paapa, ni yeeyo enaanitosa. ⁹ Yesu aahomwirela: Kiri ninyu okathi mwiintji, ni nanlelo kamwinkitjuwela, Filipe? Onkoona mi, oomoona Paapa; Onkiirela tjani: Onoonihere apaapa"? ¹⁰ Kunkupali wira mi kirii na Paapa, ni apaapa arii ni minnyaano, moolumo minnyaano kinuuhimeeryakani, akinuuhimeryani niikurutjaka; masi, apaapa ankala nimii tampanka mitekotjaya. ¹¹ Nkikupali minnyaano kiri naapaapa, ni apaapa arii ni minnyaano; Walaani nkupali nlathu wo mitekotjaka. ¹² Wekhweeli, weekhweli, kinawuuhimeryani, wira yoole onkikupali minnyaano, tjitjommo onarwaa ovara miteko tjinvaraaka, ni onaahala ovara tjuulupale tjoopwaha nnya tjinvaraaka minnyaano, kontha minnyaano kinrwaa wa paapa. ¹³ Tjooteene mwinrwennyu olepela mwa ntjinanaka, Minnyaano nahala opanka wo wira apaapa avuwihiye ni mwanaya. ¹⁴ Mwakilepela ethupiithu mwantjinanaka, Mi kinapanka. ¹⁵ Mwakifenta,nnarwaa osunka ekanotjaka. ¹⁶ Minnyaano kinamwaalepela apaapa, ni ayena naarwaa wovahani namamaaliha nkina, wo wira akale ni nyu mahuku otheene, ¹⁷ nnepa weekhweli, yooyo etuniya ehimphwaneelaya waakela kontha kinoona hataa kintjuwela. Masi, nyu nnaatjuwela, maana yooyo onkala ninyuu ni onrwaa okala wa nyuu. ¹⁸ Minnyaano nkinrwaa woohiyani vekennyu; Minnyaano kinaahala woweelani. ¹⁹ N-hina woowakati vakaani, etuniya kinrwaa okoonatho, masi nyuu nnarwaa okoona. Kontha minnyaano kinkumi ni nyuu nnahala okalana okumi. ²⁰ Nenno nihukunno, nyuu nnahala otjuwela wira minnyaano kirii napaapaka, ni wira nyuu nrii ni mi , ni Minnyaano mwanyuu. ²¹ Ole orina ekanotjaka ni onsunka, yooyo tinkifenta; ni yoole onkifenta onrwaa ofentiya naapaapaka, ni mi kinaarwaa ofenta, ni kinaarwaa wiithonhihera wa yena. ²² Judas (kahi iscariotes) ahoonkoha Yesu: Pwiiya, mwinrwaa wiithonyiherelani ni hinnyaano , woohika watuniyani?". ²³ Yesu aahomwaakula: "Nthu nkifenta onaahala osunka nuulumonaka. Apaapaka annhala ofenta, ni ninaahala onweela yena ni ninaarwaa opanka ethoko mwa yena. ²⁴ Ole ohinkifenta, kansunka moolumwaaka. Nuulumo nniwennyu kahii nawaka, masi naapaapa akivahenrale. ²⁵ Nnya tjithunnya kinuuhimeeryani kinari nanlelo ninyuu. ²⁶ Masi, namamaaliha, nnepa nthakathifu, yooyo apaapa anrwaaya onvahenra mwa ntjinanaka, Yena onaarwa woosomihani tjithu tjootene ni onaarwaa owuupusani tjithu tjootene tjuuhimeryalaakani. ²⁷ Kinawuuhiyerani nnema, nnemanaka kinawuvahani. Minnyaano nkinvaha nnema ntokoo etuniya tjinvahaaya. N-hitjukulatje nrimennyu ni n-hoove. ²⁸ N-hinwatja yuuhimeralyaakani wira: Kinaarwaa ni kinawuuweelani. nnakifentale mwaarwa okala ootheeliya, kontha mi kinrwaa waapaapa, maana apaapayo yoolupale vika minnyaano. ²⁹ Minnyaano kinuuhimeeraniila vano , ehinakumenla , wo wira yakumenla nkupali. ³⁰ Nkinrwaa owuulumanani tho, maana nkulupale oyeela etuniyeela oniira ophiyaka, ni yena karina ekuru tjookiphwaha minnyaano. ³¹ Masi wo wira etuniya etjuwelae wira minnyaano kinawaafenta apaapa, kimpanka ele ekirumalyaaya apaapa. Munwatje, nikume ola opuroola".