¹ Muhinvanhihe ntu owuluvaala, massi muinlipihere ntoko apapeen'nhu. Mwalipihere amwavano ntoko assun'nihu. ² Mwalipihere mapwiyawe ntoko anumwaninhu, ni assithiyanaayo ntoko assirokorinhu, worereela ³ Mwahissime minankhweli, ale ari minankhweli. ⁴ Massi, akhala nankhweli wira hana assaana ni otjuulu, mwahiye tokoni ethonhere wettihera ethokoaaya, mwahiye wakhela yan'na papaaya; kontha eyo enantjivelihaMuluku. ⁵ Kontha nankhweli phiyoole nokhala vekha, ni nokhala ankhuluvelaka Muluku, ni n'novekela ohiyu nu thana wira akhaviheriye. ⁶ Vano alee anivaha eruthuaaya, anarieene akumi, ari okhwene. ⁷ Ohimie molumoaala wira ekhale ohivanhihatjiya. ⁸ Massi, akhala nthu hinarattavenla assimutjaawe, ventji ventji ale owathokoniwawe, khakupalale, ni phiri otepana wonvikana nthu ohamini. ⁹ Nankhweli, wira antikhiye, hana akhalanaka eyakha sithini, nari nthiyana arina wan'nhawe m'motja. ¹⁰ Yena hana akhalanaka enamona tjo miteko tjorera: akhala wira anawaarattavenla assaana, ni anowakhela aletto, akhala wira harapiha enha tja attakattifu, ni anowakuvela athu ossankatja, ni ahiverera ovara miteko tjorera. ¹¹ Massi n'hathuune minankhweli amwavo; kontha, anahala ophela otheliya; ¹² womanan'na vamotja, anakhalana nlattu mwaha wohikhalela yele yakhuluvelihaliaya wopatjeroni. ¹³ Ayena haholamalela okhala ehivaraka ethu yettaka enupa ni nupa; ni kahi pahi ehivaraka ethu, ni ohimia himia, ahimiaka ethu ehiri yeeyo. ¹⁴ Thimana, kinphela wira amwavano onanaano ahana ethelaaka, ni yayare assaana, aholele ethokoaaya, ni ahinvahaka ehathuwa Nssassera wira athepiathepie. ¹⁵ Akinaku ahohathuwa ni ahonthara Nssassera. ¹⁶ Akhala nthiyana mwamini hana nankhweli, ahana aakhaviheraka, ni ahiriatje mirintti ekeretja, ahana akhaviheriyaka minankhweli ahirina nthu owakhavihera. ¹⁷ Aholeli an'holela saana ahana ahissimiyaka ni ethuveliyaka ekwaha piili, ventji ventji anvara nteko n'nulumoni ni nketteloni. ¹⁸ Tjowantikhiya tjin'himia: "N'hithuke emope en'hatta etiriku"; ni: "Nanteko hana aliviyaka". ¹⁹ N'hikupale wotheriya nkhulupale, wohikhala athu eli wala athu araru akhalelaka ossahiti. ²⁰ Antheka, n'hana mwathukelaka eriyari wathu otene, wowira akinaku ahana yovaka. ²¹ Kinawuhimeria, eriari ya Muluku, mwa Kristu Yesu, ni wo malaikha othanliya, wira ohana ossunkaka tjinthun'nha wohikhotta, n'hipankaka ethu. ²² O'himwatalele nthu matata wowakuviatja, ni ohikhalele mphantti etampi tjakinaku. ²³ N'himakele ovuria matji passi, massi n'hana nvuriaka nipha vakani, mwaha wo napwiipwi, ni eretta tjonkhalanaa. ²⁴ Etampi tja athu akinaku tjinkhala tjotjuweliya ni tjinawaruana omooroni, massi etampi tjikhuawe tjinkhumela mahukuru. ²⁵ Womanan'na vamotja, miteko tjorera tikhala tjotjuweliya, tjikhuaween'nho tjikhale tjovithiya.