¹ Sasa walipokuwa wakifika Yerusalemu, walikuwa karibu na Bethfage na Bethania, kwenye Mlima wa Mizeituni, Yesu akawatuma wawili miongoni mwa wanafunzi wake ² na akawaambia, "Nendeni katika kijiji kinyume na sisi. Mara mtakapoingia humo, mtamkuta mwanapunda ambaye hajapandwa. Mfungueni na mmlete kwangu. ³ Na kama yeyote akiwaambia, 'Kwa nini mnafanya hivi'?, mnapaswa kusema, 'Bwana anamhitaji na mara atamrudisha hapa'." ⁴ Wakaenda, wakamkuta mwana-punda amefungwa mlangoni nje ya njia kuu nao wakamfungua. ⁵ Na baadhi ya watu waliokuwa wamesimama pale wakawaambia, "Mnafanya nini, kumfungua mwana-punda huyo?" ⁶ Wakawaambia kama Yesu alivyowaambia, na watu wakawaacha waende. ⁷ Wakamleta mwana-punda kwa Yesu na wakatandika nguo zao, naye akaketi juu yake. ⁸ Watu wengi wakatandaza mavazi yao barabarani, na wengine wakatandaza matawi waliyoyakata mashambani. ⁹ Wale waliotangulia mbele yake na wale waliomfuata walipiga kelele, "Hosana! Amebarikiwa anayekuja kwa jina la Bwana. ¹⁰ Umebarikiwa ufalme ujao wa baba yetu Daudi! Hosana juu mbinguni" ¹¹ Kisha Yesu akaingia Yerusalemu, akaingia hekaluni akatazama kila kitu. Sasa, wakati ulikuwa umeenda, alitoka kwenda Bethania pamoja nao kumi na wawili. ¹² Kesho yake walipokuwa wakitoka Bethania, aliona njaa. ¹³ Na akaona kwa mbali mtini wenye majani, akaenda ili aone kama angeweza kupata matunda juu yake, alipofika akakuta majani tu, kwa kuwa haikuwa majira ya tini. ¹⁴ Akauambia, "Hakuna yeyote atakayekula tunda kutoka kwako tena". Na wanafunzi wake wakasikia. ¹⁵ Wafika Yerusalemu, naye akaingia hekaluni na kuanza kuwatoa nje wauzaji na wanunuzi ndani ya hekalu. Akazipindua meza za wabadilishaji wa fedha na viti vya wale waliokuwa wakiuza njiwa. ¹⁶ Hakumruhusu yeyote kubeba chochote hekaluni kilichoweza kuuzwa. ¹⁷ Akawafundisha na kusema, "Je haikuandikwa, 'nyumba yangu itaitwa nyumba ya sala kwa mataifa yote'? Lakini mmeifanya pango la wanyang'anyi". ¹⁸ Makuhani wakuu na waandishi walisikia alivyokuwa amesema, nao walitafuta njia ya kumwangamiza. Hata hivyo walimwogopa kwa sababu umati ulishangazwa na mafundisho yake. ¹⁹ Na jioni ilipofika, waliondoka mjini. ²⁰ Walipokuwa wakitembea asubuhi, waliuona mti wa mtini umekauka mpaka kwenye mizizi yake. ²¹ Petro akakumbuka na kusema, "Rabi! Tazama, mti wa mtini ulioulaani umekauka". ²² Yesu akawajibu, "Muwe na imani katika Mungu. ²³ Amini nawaambia kwamba kila auambiaye mlima huu, 'Ondoka, na ukajitupe mwenyewe baharini, 'na kama hana mashaka moyoni mwake lakini anaamini kwamba alichokisema kitatokea, hivyo ndivyo Mungu atakavyofanya. ²⁴ Kwa hiyo ninawaambia: kila kitu muombacho na kuuliza, aminini kwamba mmepokea, navyo vitakuwa vyenu. ²⁵ Msimamapo na kuomba, mnapaswa kusamehe chochote mlichonacho dhidi ya yeyote, ili kwamba Baba yenu aliye mbinguni awasamehe pia ninyi makosa yenu. ²⁶ (Zingatia: Mstari huu, "Lakini msiposamehe, wala Baba yenu aliye mbinguni hatasamehe dhambi zenu" haumo kwenye nakala za kale). ²⁷ Wakarudi Yerusalemu tena. Na Yesu alipokuwa akitembea hekaluni, makuhani wakuu, waandishi na wazee walikuja kwake. ²⁸ Na wakamwambia, "Kwa mamlaka gani unafanya mambo haya?" Na ni nani aliyekupa mamlaka kuyafanya haya?" ²⁹ Yesu akawaambia, "Nitawauliza swali moja. Niambieni na mimi nitawaambia kwa mamlaka gani ninayafanya mambo haya. ³⁰ Je, ubatizo wa Yohana ulitoka mbinguni au ulitoka kwa wanadamu? Nijibuni." ³¹ Wakajadiliana miongoni mwao na kushindana na kusema, "Kama tukisema, 'Kutoka mbinguni,' atasema, 'Kwa nini basi hamkumwamini?' ³² Lakini kama tukisema, 'Kutoka kwa wanadamu,'..." Waliwaogopa watu, kwa kuwa wote walishawishika kwamba Yohana alikuwa Nabii. ³³ Ndipo walimjibu Yesu na kusema, "Hatujui". Ndipo Yesu akawaambia, "Wala mimi sitawaambia ni kwa mamlaka gani nayafanya mambo haya.