¹ Daudi alipokuwa amemaliza kuongea na Sauli, roho ya Yonathani ilishikana na roho ya Daudi, na Yonathani akampenda kama roho yake mwenyewe. ² Sauli akamweka kazini Daudi siku hiyo, hakumwacha arudi nyumbani kwa baba yake. ³ Kisha Yonathani na Daudi wakafanya makubaliano ya urafiki kwa sababu Yonathani alimpenda kama roho yake mwenyewe. ⁴ Yonathani akavua kanzu aliyokuwa amevaa na kumpa Daudi, akampa na vazi lake la kivita, pamoja na upanga, upinde, na mshipi. ⁵ Daudi alikwenda popote ambapo Sauli alimtuma, naye alifanikiwa. Sauli akamteua Daudi awe mkuu wa wapiganaji. Jambo hili lilipendeza machoni pa watu na katika macho ya watumishi wa Sauli. ⁶ Wakati wanarudi nyumbani kutoka kuwapiga Wafilisti, wanawake walitoka miji yote ya Israeli, wakiimba na kucheza, ili kukutana na mfalme Sauli, wakiwa na matowazi, wenye furaha, na wakiwa na ala za muziki. ⁷ Hao wanawake waliimba kwa kupogezana huku wakicheza; Wakiimba: "Sauli ameua maelfu yake, Na Daudi ameua makumi elfu yake." ⁸ Sauli alikasirika sana, na wimbo huu haukumpendeza. Naye akasema, "Wamemsifia Daudi juu ya makumi elfu, lakini wamenisifia melfu tu mimi! Atapata kitu gani zaidi isipokuwa ufalme? ⁹ Kuanzia siku hiyo na kuendelea, Sauli alimuangalia Daudi kwa mashaka. ¹⁰ Kesho yake yule roho ya ubaya kutoka kwa Mungu ikamwingia Sauli kwa nguvu., naye akatabiri nyumbani mwake. Hivyo Daudi akapiga kifaa chake, kama alivyofanya kila siku. Sauli alikuwa na mkuki wake mkononi. ¹¹ Sauli akatupa mkuki wake, kwani alifikiri, "Nitampigilia ukutani." Lakini Daudi mara mbili aliepa uwepo wa Sauli. ¹² Sauli alimwogopa Daudi, kwa sababu BWANA alikuwa pamoja naye, lakini hakuwa na Sauli tena. ¹³ Hivyo Sauli alimuondoa Daudi mbele yake na akamteua kuwa kamanda wa kikosi cha askari elfu moja. Kwa namna hii Daudi alitoka na kuingia mbele ya watu. ¹⁴ Daudi alikuwa akistawi kwa mambo yake yote, maana BWANA alikuwa pamoja naye. ¹⁵ Sauli alipoona kwamba Daudi anastawi, alimwogopa. ¹⁶ Lakini Israeli yote na Yuda walimpenda Daudi, maana alitoka na kuingia mbele yao. ¹⁷ Kisha Sauli akamwambia Daudi, "Huyu hapa ni binti yangu mkubwa Merabu. Nitakupatia awe mke wako. Ila tu uwe jasiri kwa ajili yangu na upigane vita vya BWANA." Maana Sauli alifikiri, "Usije mkono wangu ukawa juu yake, ila acha mkono wa Wafilisti uwe juu yake." ¹⁸ Daudi akamwambia Sauli, "Mimi ni nani, na maisha yangu yana nini, au hata maisha ya familia ya baba yangu katika Israeli, kiasi cha kuwa mkwe wa mfalme?" ¹⁹ Lakini wakati ambao Merabu, binti Sauli, ilipasa kuwa ameolewa na Daudi, aliozwa kwa Adrieli Mmeholathi. ²⁰ Lakini Mikali, binti Sauli, alimpenda Daudi. Na watu walimwambia Sauli, na jambo hilo likampendeza. ²¹ Ndipo Sauli akafikiri, "Nitampatia huyu awe mke wake, ili uwe mtego kwake, na hivyo mkono wa Wafilisti uwe juu yake." Kwa hiyo Sauli akamwambia Daudi mara ya pili, "Wewe utakuwa mkwe wangu." ²² Sauli akawaamuru watumishi wake, "Ongeeni na Daudi kwa njia ya siri, na mseme, 'Tazama, mfalme anakufurahia, na watumishi wake wote wanakupenda. Sasa basi, uwe mkwe wa mfalme.'" ²³ Hivyo watumishi wa Sauli wakayasema maneno haya kwa Daudi. Na Daudi akasema, "Kwenu ninyi mnaona ni jambo dogo kuwa mkwe wa mfalme, mimi ni maskini, na heshima yangu ni ndogo." ²⁴ Watumishi wa Sauli wakarudisha kwake taarifa ya maneno ambayo Daudi aliyasema. ²⁵ Na Sauli akasema, "Hivi ndivyo mtakavyo mwambia Daudi, 'Mfalme haitaji mahari yoyote, isipokuwa govi mia moja za Wafilisti, ili ajilipize kisasi kwa adui wa mfalme."' Basi Sauli alifikiri atamwangusha Daudi kwa mkono wa Wafilisti. ²⁶ Watumishi wake walipomwambia maneno haya, yakamvutia Daudi awe mkwe wa mfalme. ²⁷ Kabla siku hizo hazijapita, Daudi aliondoka na watu wake na kuwaua Wafilisti mia mbili. Daudi akazileta govi zao, na kumkabidhi mfalme kulingana na idadi yake, ili aweze kufanyika mkwe wa mfalme. Kwa hiyo Sauli akamwoza Mikali, binti yake, awe mkewe. ²⁸ Basi Sauli aliona na kufahamu kwamba BWANA alikuwa pamoja na Daudi. Mikali, binti Sauli, akampenda Daudi. ²⁹ Sauli akazidi kumwogopa Daudi. Sauli akawa adui wa Daudi daima. ³⁰ Ndipo wakuu wa Wafilisti wakajitokeza kwa ajili ya vita, na mara zote walipojitokeza Daudi alifanikiwa zaidi kuliko watumishi wote wa Sauli, hivyo jina lake likapata heshima kubwa.