¹ Nɛbábánda niimée ná baaná bá Ɛ́sɛlahɛ́ɛlɛ go biene pɛ́ ya oŋɛndɔ yábɔ́ naá giolóo gá Sine, bá biene pɛ́ sɛ́ɛsɛ Kanɛ Mesúge a mbaá bó dándánáa; gɔ́ɔ bá dágamɔ́ undukí naá Elefídimi, boɛ́nɔ go lɔbɔ kanɛ go ɛ́na miimpo má go bónyo hɔ́ɔ. ² Boɛ́nɔ go ɛ́da go fúmbe cáŋɔ́ na Mósɛsɛ, bá amɔ́: "Có fáamɔ́ nɔnɔ miimpo má go bónyo." Mósɛsɛ go bó gundie a amɔ́: "No púmbe go cáŋɔ goakɛ́? No fúmbe go magana Kanɛ Mesúge goakɛ́?" ³ Boɛ́nɔ hɔ́ɔlɔ́, inyúidi hɛ́ bo nɔɔdɛnɔ, bau uŋguleŋgule na Mósɛsɛ. Bá gálagala bá: "O lɔ́mɔ́ có húmíelú naá Egíbítene goakɛ́? Bó mbaá lɛ goŋaá nco gúe naá giolóo na inyúidi, yɔmɔ́ɔ, baaná bámɛ na bidúgé bámɛ? ⁴ Mósɛsɛ go baŋadɛna Kanɛ Mesúge, a amɔ́: "Kaá ná ŋaáa nɛɛ́nɛ na boɛ́nɔ bɔ́ɔbɔ? Moɔnɔ́ ba gɛcamɛna a gɔnɔ dómba, bá gaá tóɛ́dánáa adánɛ́." ⁴ Mósɛsɛ go baŋadɛna Kanɛ Mesúge, a amɔ́: "Kaá ná ŋaáa nɛɛ́nɛ na boɛ́nɔ bɔ́ɔbɔ? Moɔnɔ́ ba gɛcamɛna a gɔnɔ dómba, bá gaá tóɛ́dánáa adánɛ́." ⁵ Kanɛ Mesúge go oyana Mósɛsɛ: "Dómbá naá busío bá boɛnɔ, o gɔ́lɔ olɔŋɔ nahɔ bafɛanɔ́ɔ bá Ɛ́sɛlahɛ́ɛlɛ; o gɔ́lɔ tɔ́nɔ naá ombɔ́gɔ gidímbo gáhɔ gɛ́ɛgɛ o mbaá góbá máŋɛ́, go ɛnda! ⁶ Ɛ́na, kaá bɛ́ɛ́mbá tálɛ́ɛ naá busío báhɔ naá gɛdánɛ́dánɛ́ gá Hólɛbɛ; o gɛ́ góba gidímbo, miimpo má ɛ́da go déndele, boɛ́nɔ bó bónyonono." Kɔ́ɔ Mósɛsɛ a ŋamɔ́ nɔ́ɔ naá busío bá bafɛanɔ́ɔ bá Ɛ́sɛlahɛ́ɛlɛ. ⁷ Gɔ́ɔ a fáamɔ́ hoóma há ndiemi ufíno yá 'Masa' na 'Mɛ́lɛba', naá cí goŋaá baaná bá Ɛ́sɛlahɛ́ɛlɛ bá mbu ubíe cáŋɔ́, gɔnɔ́ bá báá fúmbé go magana Kanɛ Mesúge, bá gálagala bá amɔ́: "Kanɛ Mesúge a lɛ́ naá tɛ́mádɛ́má yɛcɔ́ lí, a dɛ báá o? ⁸ Gɔ́ɔ Amalɛ́kɛ na batɔ bɛ́hɛ́ u úlemú go bidé naá Elefidími. ⁸ Gɔ́ɔ Amalɛ́kɛ na batɔ bɛ́hɛ́ u úlemú go bidé naá Elefidími. ⁹ Mósɛsɛ go oyana Yósue a amɔ́: "Có iyénéemú batɔ banɔ́mɔtɔ́, o húme, go ɛ́da go bidé na Amalɛ́kɛ; nembeli, yɔmɔ́ɔ kaá bɛ́ɛ́mbá tɛ́nɛ́ɛ naá tálɛ́dálɛ ya gɛɛnɛ, gidímbo gá Asaŋa naá ombɔ́gɔ." ¹⁰ Yósue go ŋa bɔ́ɔbɔ Mósɛsɛ a mbaá mo oyáná, go go ɛ́da bidé na Amalɛ́kɛ. Kanɛ́ Mósɛsɛ, Álɔŋɔ na Húule go bólɛga naá tálɛ́dálɛ ya gɛɛnɛ. ¹¹ Aŋa Mósɛsɛ a mbaá lɛ ombɔ́gɔ yɛ́hɛ́ go mmoɛná, Ɛ́sɛlahɛ́ɛlɛ a mba lɛ́ a mánɛgana; aŋa a siisiemú ombɔ́gɔ yɛ́hɛ́, Amalɛ́kɛ a mánɛgɛna tɔ́nɔ. ¹¹ Aŋa Mósɛsɛ a mbaá lɛ ombɔ́gɔ yɛ́hɛ́ go mmoɛná, Ɛ́sɛlahɛ́ɛlɛ a mba lɛ́ a mánɛgana; aŋa a siisiemú ombɔ́gɔ yɛ́hɛ́, Amalɛ́kɛ a mánɛgɛna tɔ́nɔ. ¹² Ɛmbɔ́gɔ ya Mósɛsɛ yɛ á dugé, Álɔŋɔ nɛhɛ́ na Húule go gɔ́lɔ ɛdánɛ́, gaábɔ́ go lukumene kɔ́ɔ. Go ɛ́da go dímbigene ɛmbɔ́gɔ ya Mósɛsɛ, mɔ́ɔnyɔ boayá, mɔ́ɔnyɔ boayá. Ɛmbɔ́gɔ go lɔbɔ go mmoɛná gó bɛ́ɛ́ ɛ́dá húme naá gobɛ́dɛmɛna gá buisí. ¹³ Yósue go mánɛgɛna Amalɛ́kɛ na batɔ bɛ́hɛ́ na nolɛa ná kalafɔ. ¹⁴ Mósɛsɛ go oyana Mósɛsɛ: "Dɛlɛ́da boóma moánɛ naá kálata, go go bɛ́dɛgɛna nciŋí yá bɔ́ kanɛ go bófoolio; o gɔnɔ go oyana Yósue go amɔ́ nná fúgune naá cí giliíli gá Amalɛ́kɛ. ¹⁴ Mósɛsɛ go oyana Mósɛsɛ: "Dɛlɛ́da boóma moánɛ naá kálata, go go bɛ́dɛgɛna nciŋí yá bɔ́ kanɛ go bófoolio; o gɔnɔ go oyana Yósue go amɔ́ nná fúgune naá cí giliíli gá Amalɛ́kɛ. ¹⁵ Mósɛsɛ go fóaga gɛdálɛ́ná, a báá gɛ́ fáá ufíno: 'Kanɛ Mesuge, gibélincígínyí gámɛ gá kanɛ go bófoolio'. ¹⁶ Mósɛsɛ a amɔ́: "Go busío bá goŋaá bá mba fedíginyée ombɔ́gɔ naá oŋgɛ́yɔ́ yá Kanɛ Mesúge, bidé bá Kanɛ Mesúge bɛ́ ŋga bɛ́ɛ́mbá na Amalɛ́kɛ, ɛgɛlɛ aá ɛgɛlɛ."