ngala-francis-gis_tit_text

SLUF 2

¹ Amá ka ná, anja kə ɓi miŋgiɓi məru atə dubun jeŋŋa. ² Ɓa táŋ ŋgrá mojomoŋhiy ɓa a tram məjəgəna hərəŋ táŋhay, məkutuʼaka vú taŋhiy tatay, məsi aleslhay, məcəcaŋhiy zlák zlák ahur təɓi, ahur wuɗa vú, yo ahur ɓesa ɓi. ³ Mondoŋgoshiy ko ná, anja təram jeŋŋahay, amá məngəlá ishiy ta, məwihiy tə daliy ta, anja vulam dubun mezleŋ, ⁴ anja dubunaka táŋ wuɗa zil táŋhay ŋgrá ŋgos zəzəriháy, ⁵ ɓa a təram məsi aleslhay, ciɗaŋŋahay, məkam alesl tə hiy táŋhay, məɗuvaka táŋ hərəŋ ŋgrá zil táŋhay, yo ɓa mbru anja lum jiviɗ ŋgə zá slimiɗ ŋgə Bimulvúŋ ta. ⁶ anja kutuʼaka gawlahay aya, ɓa a təram mesi aleslhay. ⁷ Ka tə hərəŋ ɗek, anja kə tri mbru məsupaka sí sar naŋ ahur gí goɗ mezleŋhay, anja dubun ɗik tubiya a cəci aŋgə jiire atə kutuʼa vú. ⁸ anaj riyta ahur miŋgiɓi ɗik ta, ɓa ŋgə pa táŋ mesem ŋgrá məsi dugunhay ɓa a lumam liŋ ji mi ta. ⁹ Bekehiy ko ná, anja ɗuvaka táŋ hərəŋ ŋgrá buy táŋhay ahur goɗ bám. anja ŋgəlaka táŋ mi ta, ɓa buy táŋhay a həyaka taŋ. ¹⁰ Anja hulaka buy táŋhiy ta, amá anja tram məzliy jeŋŋahay ahur goɗhiy tubiya, ɓa məzliy anja ɗuvakaŋ hərəŋ ŋgra dubun ŋgə Bimulvúŋ mələh miya. ¹¹ Vur Bimulvúŋ á njuko her naŋ le, mətrí viɗviɗ ŋgə ləh vur məzliy tubiya. ¹² Her nana a rá dubuna miya pula kuw, atə həhəna goɗ ŋgə duniya beslék, yo ɓa í cufam tə alesl, ahur jiire atə zluwun ŋgə Bimulvúŋ, ¹³ ŋgə kútúká hən məgaŋ sək le məsi miya mərá kutukakaŋ; í hən məsi Kristu, mbuɗo vra Bimulvúŋ miya madaɗaŋ, mələh miya məsa bugo vú ahur duduk naŋ ná. ¹⁴ Náŋ məvula siifa naŋ vur miya, ɓa ŋgə puskó miya vri gí manjacar tubiya. Yo á trí tə miya jeŋŋahay ɓa í tram məzliy naŋhay məsi náŋ məwuná taŋ, yo məhurdumamhiy le ŋgə gí goɗ mezleŋhay. ¹⁵ ur naŋ so ná, ɓa táŋ goɗ hanahay, vula táŋ gədaŋ, mbəɗa táŋ hərəŋ tə gədaŋ ɗik tubiya. Anja kə pul mbru pal a risuw ta.