¹ Kwizile kwawa pano Yesu malizizye yonsi amazwi yaa, atili kuwa sambilizi wakwe, ² ''Mumanyile kuno ala yapita amanda yawili, i Chakupitililwa chikwiza, swinya u Mwana wa Munthu alilemekwa ukuti apamanthilwe. ³ Ngapano wa simapepo wakulu nawa songo wa wanthu wawungine apaliponga mu ng'anda yakwe simapepo mukulu, wino witwanga Kayafasi. ⁴ Awavyanzania apaliponga ukuti wamuleme Yesu ku nkhama nu kumukoma. ⁵ Amuno watinji, ''Yitakize yiwe a mphindi ya masika, alyakuti ukupazinkhana kutakakatuke pakasi pa wanthu.'' ⁶ Nomba pano Yesu walinji mu Betaniya mu ng'anda yakwe Simoni uwa mambombo, ⁷ pano walambalazile pa kabechi, u mwanachi wizile kwe weliwe walinji ni nsembo ya mafuta iya mutengo uwukulu, nga apungulila pa mutwe wakwe. ⁸ Kweni pano awa sambilizi wakwe wachilola, wizile wafulwa nukuti, ''Wuzye achifukwachi ichakonona wonye woo? ⁹ Vyoo ngetukazizye pa mtengo uwukulu nu kupa awasaluke.'' ¹⁰ Kweni Yesu, akumanya choo, atili kwe woliwo, ''Achani chino mukumuchuzya umwanachi wee? Amuno awomvile ichinthu ichizima kwe nene. ¹¹ Awasaluke muli nawo penye, kweni mutaliwa nane penye. ¹² Amuno pano apungulila amafuta yaa pa muwili wane, awomvile choo pakuzikwa kwane. ¹³ Nakawuzyenye nkhuti kwe mwemwe, kulikonsi ilandwe zima likulumbililwa kunsi yonsi, chino umwanachi wee awomvile nachonye chili vwangwa mukumwizuka weliwe. ¹⁴ Ngapano wenga mu ikumi na wawili, wino wamwisile Yudasi Isikariyoti, wayile kuwa simapepo wakulu ¹⁵ nu kuti, ''Wuzye achani chino mukulonda ukumpha ukuti imbalemeke weni kwe mwemwe. ¹⁶ Ukufuma imphindi yilyanye wavwambanga ulongo ukuti awalemeke weni kwe woliwo. ¹⁷ Nomba pa wanda wakutalichila uwa mukate wuno wusi nu mutawa awa sambilizi wizile kwe Yesu nu kuti, ''Akwinye kuno ukulonda tukusenganizye ukuti ulye ichakulya ichakupitililwa?'' ¹⁸ Weni atili, ''Muye mu musumba ku munthu wumwi nu kuti kwe weliwe, 'U musambilizya akuti, ''Imphindi yane yili nukufika. Nenji nandi nsunge Ukupitililwa pa ng'anda yako na wa sambilizi wane.'''' ¹⁹ Awa sambilizi wawomvile ndimuno Yesu wanenile kwe woliwo, nga wasenganizye ichakulya cha Kupitililwa. ²⁰ Pano amanguzi yafika, ayikala pansi ukuti alye na wa sambilizi ikumi na wawili. ²¹ Awala awalyanga, weni atili, ''Nakawuzyenye nkhuti kwe mwemwe kuno wenga mwakwe mwemwe alinkhutilila nene.'' ²² Awafwilimana nkhaninye, nga wenga na wenga watalisile ukumukolowozya, ''Awenche asa nene, Mfumu?'' ²³ Weni atolelela, ''Weyo wino akusomfezya ikasa lyakwe na nene mu mbale awili wenga wino alikutilila nene. ²⁴ U Mwana wa Munthu aliya, ndivino wawalikwa ivya kwe wewe. Kweni akalanda ku munthu mwe wino alikutililwa! Changa chizipe kwe weyo u munthu ndi atakwasilwe.'' ²⁵ Yudas, wino walinji nu kumukutilila weliwe atili, ''Anene, Rabi?'' Weni atili kwe weliwe, ''Wayivyanjila wenga wemwenecho.'' ²⁶ Ala pano wakulya, Yesu asenda umukate, awupepela nu kuwumonthola. Weni awupile ku wa sambilizi nu kuti, ''Sendani, lyani. Woo amuwili wane.'' ²⁷ Asenda ulupindi nu kusalifya, nu kuwapa woliwo nu kuti, ''Ng'wani, mwensinye. ²⁸ Amuno woo a wazi wane uwipangani wuno wazwila awavule kwi tetelo lya mwawembu. ²⁹ Kweni nkhuti kwe mwemwe, nene nthalitela ing'we swinya ku chikomwa cha tumphesya, ukufichila uwanda wowo pano nkhung'wa uwupya na mwemwe mu wufumu wakwe Tata.'' ³⁰ Pano wimbile ulwimbo, awaya kunzi ku lupili lwa Olivi. ³¹ Ngapano Yesu atili kwe woliwo, ''Mwensinye mwandi muwe uwisiku woo umulandu wakwe nene, amuno kwa walikwa, 'Ndikoma umuchemi ni ng'onzi zya mwenecho zilisalangana.' ³² Kweni Ala nene nakatuswa, nenji ndiwakolela ikuya mu Galileya. ³³ Ukuwa Peturo atili kwe weliwe, ''Naponye ndi wonsi wangapona umulandu wakwe wewe, nenji nthalitela imphone.'' ³⁴ Yesu atili kwe weliwe, ''Nakawuzyenye nkhukunena, uwusiku wonye woo, pano e mukwelo atani alamule kawili, ulinkhana katatu.'' ³⁵ Peturo atili kwe weliwe, ''Napano ningafwila ukufwa nawewe, Nenji nthalitela inkhukane.'' Nawa sambilizi awanji wonsinye awavwanga ichili chonga. ³⁶ Ngapano Yesu aya na woliwo ku masyo yano yitwanga Getisemani nga atili ku wa sambilizi wakwe, ''Yikalani paa pano nene nkhuya papo nu kupepa.'' ³⁷ Asenda Peturo na wawili awana wakwe Zebediya na weliwe nu awatalika ukuwa nu malanda nu kutamika. ³⁸ Ngapano weni atili kwe woliwo, ''U mwenzo wane wuli na malanda nkhaninye, na kumfwanye. Syalani paa nu kulolela na nene. ³⁹ Weni wayile pawutali katichi, apona pa minso yakwe, nu kupepa. Weni atili, ''Tata wane, ndi chingachitika, lekani ulupindi loo lumphitilile. Lelo, asa ndivino nene nkhulonda, kweni ndi muno ukulonda.'' ⁴⁰ Weni wizile ku wa sambilizi nga azana walazile utulo, nga atili kwe Peturo, ''Achani, mutanga mulolele nane pa ola lyonga? ⁴¹ Lolelani nu kupepa kuno mutakinjile mukwelezwa. U muzimu mwelimonye wukulonda, ukuwa umuwili uwutonthe.'' ⁴² Weni wizile wapita aka chitiwili nu kupepa. Atili, ''Tata wane, ndi choo chitanga chipitilile suka ing'we chenecho, ukulonda kwako kuwombwe.''' ⁴³ Weni wizile wiza swinya nu kuwazana walazile utulo, amuno aminso yawo yalinji amang'wame. ⁴⁴ Apano akuwasya swinya, weni ayile nu kupepa imphindi yachititatu, ukulanda amazwi yonga. ⁴⁵ Ngapano Yesu wizile kuwa sambilizi nu kuti kwe woliwo, Wunze muchili mulazile utulo nu kupuza? Lolani, imphindi yili nukufika, swinya u Mwana wa Munthu akukutililwa ukuya mu makasa ya wawembu. ⁴⁶ Katukani, tuyani. Lolani, weyo wino akukutilila nene ali mupipi.'' ⁴⁷ Pano wachilinji akulanda, Yudasi, wenga uwa ikumi na wawili, wizile. Iwumba ikulu lyizile na weliwe ukufuma kwe simapepo mukulu na wasongo wa wanthu. Awiza na wapanga ni zyandugu. ⁴⁸ Lelo umunthu wino walinji ukumukutilila Yesu wawapile ichimanyisyo, ukuti, ''Weyo wino ndifyompha awili munthu. Mulemani.'' ⁴⁹ Paponapapo weni wizile kwe Yesu nu kuti, ''Tulamuke, Rabi!'' nu kumufyompha weliwe. ⁵⁰ Yesu atili kwe weliwe, ''Chiwuzya, womba chino wewe wiza mu kuchita.'' Ngapano awiza, wawika amakasa yawo pakwe Yesu, nu kumulema. ⁵¹ Lolani, wenga wakwe wawo wano walinji nu Yesu ayololosya ikasa lyakwe, nukufumya e panga wakwe, nu kumuma umuwomvi wakwe simapepo mukulu, nu kuputula ikutwi lyakwe. ⁵² Ngapano Yesu atili kwe weliwe, ''Nyosezya e panga wako mu masyo yakwe, amuno wonsi wawo wano wakawomvya awa panga walifwila ku wapanga. ⁵³ Wuzye mukwelengania kuno nthanga mphunde kwe Tata wane, swinya weni anganthumila awangelo amakumi ikumi na wawili? ⁵⁴ Kweni chingawa wuli nomba ukuti amawaliko yize yafiswe, kuno choo chifwile chiwombwe?'' ⁵⁵ Pa mphindi yoyonye yesu atili kwi wumba, ''Wuzye mukwiza na wapanga ni zyandugu ukuti mundeme ngati ne kapoka? Chila wanda nikalanga ukusambizya mwi tempeli, kweni mutandemile. ⁵⁶ Kweni vyonsi vyoo vyachitika alyakuti amawaliko ya watumwa yangafiswa.'' Ngapano wansi awa sambilizi wamusyile nu kusamala. ⁵⁷ Wawo wano walemile Yesu wamusenzile ukuya kwe Kayafasi e simapepo mukulu, kuno awakawalika na wasongo wawungine apaliponga. ⁵⁸ Ukuwa Peturo wamukonkhanga pawutali katichi ukuya ku musolo wakwe simapepo mukulu. Winjizile mukasi nu kwikala pansi na wakalindilila ukuti alole ichakukonkha. ⁵⁹ Lelo awa simapepo wakuli ni panzyo lyonsi walondanga ukusimichila kwa wufi ukwakususyania nu Yesu alyakuti wangamukoma. ⁶⁰ Watazanile nanthi chimwi, napano awakamboni wawufi awavule wizile pankholelo. Ukuwa pansizi wawili wizile pa nkholelo ⁶¹ nu kuti, ''U munthu wee atili, 'Nenji ningakwanisya ukonona i tempeli lakwe Leza nu kulizenga mu manda yatatu.''' ⁶² E simapepo mukulu wimilizile nukuti kwe weliwe, ''Wuzye usi nanthi akutolelela? Wuzye achani choo chino wakusimichila ukususyania na . wewe?'' ⁶³ Kweni Yesu alanga myalile. E simapepo mukulu atili kwe weliwe, ''Nkhukupatichizya mwakwe Leza uwa wumi, tunene wewe we Kristu, u Mwana wakwe Leza.'' ⁶⁴ Yesu atolelela kwe weliwe, ''Wewe wataka wemwenecho. Ukuwa nkhuwanena, ukufuma nomba ukuya ku nkholelo muli mulola u Mwana wa Munthu ayikazile kwi kasa ilya ndilo ilya maka, swinya akwiza pa mawingo iya mwiyulu.'' ⁶⁵ Apano e simapepo mukulu alepula ivizwalo vyakwe nu kuti, ''Wavwanga ivya musamu! Nga chani chino tuchili tukulonda awakamboni? Lolani, nomba mwivwile umusamu. ⁶⁶ Wuzye mukwelengania chani?'' Awatolelela nu kuti, ''Weni wazapila impfwa.'' ⁶⁷ Ngapano awamuswilila kuminso nu kumuma, nu kumuma namapi yamu makasa yawo, ⁶⁸ nu kuti, ''Tulotele, wewe Kristu. Wuzye wewenu wino wakuma?'' ⁶⁹ Nomba Peturo wisile panzi paluwanza, nga umuwomvi umwanachi ayiza kwe weliwe nu kuti, ''Nawenye walinji nu Yesu wamu Galileya.'' ⁷⁰ Ukuwa weni wakanile paminso yawo wonsi, atinji, ''Nenji ntachimanyile chino mukulanda.'' ⁷¹ Pano wayile kunzi ku chimphongolo, wunji umuwomvi umwanachi wamuweni nga atili kwe wawo palyanye, ''U munthu wee nawenye walinji nu Yesu waku Nazareti.'' ⁷² Weni swinya wakanile nu kulapa, ''Nenji nthamumanyile u munthu!'' ⁷³ Lyo papita akamphindi wawo wano wimilile papipi awiza nu kuti kwe Peturo, ''Nakawuzyenye nawenye a wenga wakwe woliwo, amuno umuvwango wako wukukulemesya. ⁷⁴ Ngapano watalisile ukutuka nu kulapa, ''Nenji nthamumanyile u munthu,'' nga paponapapo e mukolwe alamula. ⁷⁵ Peturo wizusile amazwi yano Yesu avwanzile, ''Wala pano e mukolwe atani alamule ulinkhana katatu.'' Ngapano aya panzi nu kulila nkhaninye.