¹ Yesu afuma mwi tempeli nu kuya pa wulendo. Awa sambilizi wakwe awiza kwe weliwe nu kumusonthela izyang'anda izya tempeli. ² Ukuwa weni atolelela nu kuti kwe woliwo, ''Wuzye mutakulola ivinthu vyonsi vyoo? Nakawuzyenye nkhuwanena, nanthi a liwe lyonga lilisyala pa liwuye lino litalimongolwa.'' ³ Ala wikala pa mwamba wa Olivi, awa sambilizi awiza kwe weliwe ku mbali nu kuti, ''Tunene, alinye pano ivinthunye vyovyo viliwombwa? Wuzye ichimanyikwilo chakwiza kwako chiliwa achani nu wumalilo wa nkhulo yoo?'' ⁴ Yesu atolelela nu kuti kwe woliwo, ''Chenjelani ukuti nanthi wenga atakati awasovye. ⁵ Amuno awavule waliyiza mwi zinz lyane. Waliti, 'Nenji ne Kristu,' nga wali sovya awavule. ⁶ Muliyivya ivya vita ni mbili ya vita. muwe minso ukuti mutakatamike, amuno ivinthu vyoo vifwile vichitike; kweni insilo yiliwanga yichili. ⁷ Amuno insi yikutuchilana ni nsi, swinya uwufumunu wufumu. Kuliwa izya nzala ni vizumanji mu masyo yakulekanalekana. ⁸ Ukuwa vyonsinye ivinthu vyoo akuli kutalikanye kwa wulume wa mphapo. ⁹ Apano walilemeka mwemwe ku mayimba nu kuwakoma. Muli patwa ninsi zyonsi amuno izina lyane. ¹⁰ Ngapano awavule walipunula, nu kukolowekana wenga nu muwuye swinya ukupatana wenga nu muwuye. ¹¹ Awavule awatumwa wawufi walikatuka nu kusovya awavule. ¹² Umulandu ukusita masundo kulivula, ulukundo lwa wavule lulitalala. ¹³ Ukuwa weyo wenga wino akujimba ukufika kunsilo alitulwa. ¹⁴ Ilandwe izima lyoo ilya wufumu lili lumbililwa munsi yansi ngati akusimichila ku myiko yonsi. Ngapano insilo yiliyiza. ¹⁵ Achaleka, pano mwalola icha mwiko icha konona, chino chavwangwa nu mutumwa u Daniyeli, ukwimilila mu masyo amatele'' (leka uwa kuwazya ayivwichisye), ¹⁶ Lekani wawo wano wali mu Yudeya wasamalile ku myamba, ¹⁷ Leka weyo wino ali papela pa ng'anda ata kike ukuti asende chilichonsi ukufuma mu ng'anda yakwe, ¹⁸ swinya leka weliwe wino ali mu chalo atakanyochele ukuti asende ichizwalo chakwe. ¹⁹ Kweni akalanda kwe wawo wano wali nu wula swinya wano wakonsya awana mu manda yayonye! ²⁰ Mupepe kuno ukusamala kwinu kutakachitike pano akutalale pamwi pa Sabata. ²¹ Amuno kuliwa ukuchula ukukulu, kuno kutatela kuweko ukufuma ku nthaliko yansi ukufika nomba, awe, kutalitela kuweko swinya. ²² Suka amanda yayo yafupika, nanthi amuwili wuliwa pusuka. Ukuwa muno umulandu wa wasolwa amanda yayo yalifupilwa. ²³ Apano ndi wumwi akuti kwe mwemwe, 'Lolani, kuli e Kristu!' pamwi, 'Koko kuli e Kristu!' Mutakasuwile chenecho. ²⁴ Amuno wa Kristu wawufi na watumwa wawufi waliyiza nu kulanjizya ivimanyikwilo ni vizungusyo, alyakuti wangasovya, ndi achakuchitika, na wasolwenye. ²⁵ Lolani, nenji mbanenile mwemwe lyankhani. ²⁶ Achaleka, ndi wakuti kwe mwemwe, 'Lolani, ali mu lupalang'ang'a,' mutakaye ku lupalang'ang'a. Pamwi, 'Lolani, weni ali mu vipinda mukasi,' mutakasuwile chenecho. ²⁷ Amuno ndivino akamesya kakuwalila ukufuma kwilanzi nu kumekuka konsi ukufika kuno ilanzi likakwinjilila, avyo chiliwa nu kwiza kwakw Mwana wa Munthu. ²⁸ Konskuno inyama imfwe, kokonye amawimba yali wungana. ²⁹ ''Ukuwa paponapapo lyo ukutamika kwapita mu manda yalyanye ilanzi lilifiswa, umwezi wutalipa uwuswepe wakwe, inthanda ziliwa ukufuma mupela , swinya amaka ya mwiyulu yali yingana. ³⁰ Ngapano ichimanyikwilo cha Mwana wa Munthu chili loleka mupela, swinya imyiko yonsi iya munsi yiliwalosya. Walilola u Mwana wa Munthu akwiza pa mawinga aya mupela na maka swinya uwuchindame uwukulu. ³¹ Weni alituma awangelo wakwe nu kulila ukukulu ukwa nkhakang'ombe, nga wili wungania apaliponga awasolwa wakwe ukufuma ku mphepo zini, ukufuma ku wumalilo wonga uwa mupela ukufika kuwuwuye. ³² Sambililani isambilo ukufuma ku muti wa mukuyu. Lyo insamba zyatonthavye na mafwa yalemba, mukumanya kuno aminjililo yapalamila. ³³ Awowonye, pano mwalola ivinthu vyonsi vyoo, mufwile mumanye kuno ali mupipi, paponye pa mulyango. ³⁴ Nakawuzyenye nkhuwanena, inkulo yoo yitalisila suka ivinyhu vyonsi vyoo viliwa vichitisile. ³⁵ Mwiyulu ninsi vilipita, kweni amazwi yane yatalitela yapite. ³⁶ Ukuwa ukulingana uwanda wowo ni ola nanthi wenga wamanya, nanthi awangelonye awa mwiyulu, nanthi a Mwana, ukuwa e Tata wenganye. ³⁷ Ndivino amanda yakwe Nowa yalinji, avino kuliwa pakwiza kwakwe Mwana wa Munthu. ³⁸ Amuno ndi vino mu manda yayo pano inthalala yachilinji walyanga nu kung'wa, watwalanga nu kutwalwa ukwizafika pano Nowa winjila mu ngalawa, ³⁹ swinya watamanyile nanthi chimwi ukufika inthalala yiza nukwasenda wansinye -- avino chiliwa ukwiza kwakwe Mwana wa Manthu. ⁴⁰ Apano awanthu wawili waliwa mu chalo -- wenga alisendwa swinya wenga alisyala. ⁴¹ Awanachi wawili wali wasya pa lwala -- wenga alisendwa, swinya wenga alisyala. ⁴² Achaleka muwe minso, amuno mutamanyile pa wandachi Imfumu yinu yiliyizila. ⁴³ Ukuwa mumanye choo, kuno ndi e bwana uwa ng'anda wamanyile mu mphindichi iya wusiku umung'o akwizila, weni afwilu kuwa minso swinya nanthi kuzumilizya ing'anda yakwe yinjilwe pa kufwantha. ⁴⁴ Achaleka namwenye mufwile muyisenganie, amuno u Mwana wa Munthu aliyiza pi ola lino mutakuchetekela. ⁴⁵ Ngafwandi weweni umuwomvi umusuwilwa swinya uwamano wino e bwana wakwe amuwisile papela pa vinthu vyakwe alyakuti awape ichakulya chawo pa mphindi iyakulondeka? ⁴⁶ Mulotwe a muwomvi weyo wino e bwana wakwe alizana akuwomba chochonye pano akwiza. ⁴⁷ Nakawuzyenye nkhuwanena kuno e bwana aliwika weliwe pa chilichonsi chino achakwe. ⁴⁸ Ukuwa ndi umuwomvi umuwipe ati mu mwenzo wakwe, 'E bwana wane wacheleswa,' ⁴⁹ nu kutalika ukuma awawomvi awawuye, swinya ukulya nu kung'wa na wa chakolwa, ⁵⁰ ngapano e bwana wa muwomvi aliyiza pa wanda wuno weyo u muwomvi ataku chetekela swinya pi ola lino weni ata kumanya. ⁵¹ E bwana wakwe alimuputulania nu kumuwika ponga na wawufi, kuno kuliwa ukulila nu kusya amino.