¹ Chiza chawa pano Yesu wamalizizye yaa amazwi, Yesu afuma mu Galileya nga aya ku chiputulwa cha Yudeya ukuchila u luzi lwa Yorodani. ² Amawumba ayakulu ayamukonkha, swinya ayapozizye yeneyo kulyanye. ³ Awa Farisi awiza kwe weliwe, ukumwelezya, awatinji kwe weliwe, ''Wuzye alisundo ukuti umonsi asye umuchi pa mulandu wuliwonsi?'' ⁴ Yesu atolelela nga ati, '''Wuzye mutatela muwelenge ukuti weyo wino walewuzile woliwo ukufuma kunthaliko walewuzile woliwo umonsi nu mwanachi? ⁵ Weyo wino walewuzile woliwo awino atili swinya, 'Pa mulandu woo umonsi alisya e baba wakwe nu nyina nu kulemanthila ku muchi, nga waa wawili wiliyiza wawe amuwili wonga.' ⁶ Achaleka watanga wawe wawili swinya, kweni umuwili wonga. Achaleka chino Leza alemenkhinie apaliponga, mutakaleke nanthi wonga alesyanie.'' ⁷ Watili kwe weliwe, ''Nga wuliwuli fwandi e Mose watunenile ukuti tuwapa e kalata wa kulekana nga pano tumusamazye?'' ⁸ Weni atili kwe woliwo, ''Muno imyenzo yinu iyiwome, Mose wazumilizyanga mwemwe ukuti mungawasya awachi winu, lelo ukufuma kunthaliko chitalinji wowonye. ⁹ Nenji nkhuwanena, aliwensi wino wasya umuchi, ukufumyako pa mulandu wa wuzelele, nga atwala wunji, lwo wawomba uwuzelele; nu munthunye weyo wino atwala umwanachi wino wamusya akuwomba uwuzelele.'' ¹⁰ Awa sambilizi awati kwe Yesu, ''Ndi chili wowonye ivya monsi nu muchi, asa chizima ukuti utwale.'' ¹¹ Ukuwa Yesu atili kwe woliwo, ''Asa wensi wino angazumilizya ichisambilizyo choo, kweni wawo mphela wano awazumilizwa ukuti wachizumilizye. ¹² Amuno kuli wamwi wanthatwala wano wali wowonye ukufuma munda zya wa mama wawo, swinya pali wamwi wanthatwala wano uwu nthatwala wawo wafuma ku wanthu, swinya kuli wamwi wa nthatwala wano wayiwika awenecho umulandu wa wufumu wa mwiyulu. Weyo wino angakwanisya ukupochelela ichisambilizyo choo, mulekani achipochelele.'' ¹³ Ngapano wamwi awana awatichi wizile waletwa kwe weliwe alyakuti angawika ikasa lyakwe pakwe woliwo nga apepe, ukuwa awa sambilizi awakalipila woliwo. ¹⁴ Ukuwa Yesu atili, ''Zumilizyani awana awatichi, swinya mutakati muwalesye ukuti wize kwe nene, amuno uwufumu wa mwiyulu awawo ku wanthu ngati waa.'' ¹⁵ Yesu awika amakasa yakwe pa wana, nga pano afuma kweneko. ¹⁶ Lolani, umunthu ayiza kwe Yesu nga ati, ''Musambilizya, achizimachi chino mfwile intchite ukuti ningawa nu wulanzi wa muyayaya?'' ¹⁷ Yesu atili kwe weliwe, ''Wuzye achani fwani chino ukukolowozya nene ivya chizimachi? Wonganye mphela amuzima, lelo ndi ukulonda ukuti winjile mu wulanzi, sunga amasundo.'' ¹⁸ Umunthunye weyo atili kwe weliwe, ''Isundochi?'' Yesu atili, '''Utakakome, utakawombe uwuzelele, utakiwe, Utakawe nu wukamboni wawufi, ¹⁹ chindika uwuso nu nyoko, swinya kunda umupalamani ndivino wayikunda we mwenecho.'' ²⁰ Umulumendo atili kwe weliwe, ''Vyonsi ivinthu vyoo nkhakwivwila. Wuzye ntchili nkhulonda chani?'' ²¹ Yesu atili kwe weliwe, ''Ndi ukulondesya ukuti uwe ichete, yanga, kakazye vino uli navyo, nga upe ku wasaluke, nga uliwa ni nsawo mwiyulu; nga wize, ukonkhe nene.'' ²² Ukuwa pano umulumendo wivwa chino Yesu wavwanga, afumile penepo ni chilanda, amuno alinji ni vyakwe ivivule. ²³ Yesu atili ku wasambilizi wakwe, ''Awenche nkhuwanena, achitale ukuti umunthu umukankhale ayinjile mu wufumu wa mwiyulu. ²⁴ Nkhuwanena swinya, achipepuke ukuti ingamila yingapulunsania mwi linso lya sindano ukulusya ukuti umunthu umukankhale ayinjile mu wufumu wakwe Leza.'' ²⁵ Pano wa sambilizi wakwe wachivwa, walinji awazunguke sana nga watili, ''Wuzye weweni fwandi angapususwa?'' ²⁶ Yesu alolechesya woliwo nga ati, ''Na wanthu choo achitale, ukuwa ne Leza ivinthu vyonsi vingawombwa.'' ²⁷ Ngapano Peturo atolelela nga ati kwe weliwe, ''Lola, sweswe tusyile vyonsi nu kukonkha wewe. Wuzye achani nomba chino tuliwa nacho?'' ²⁸ Yesu atili kwe woliwo, ''Nakawuzyenye nkhuwanena, mu nkhulo impya pano u Mwana wa Munthu wikala chipuna cha wuchindame wakwe, mwemwe wano mwakonkha nene namwenye muliyikala pa vipuna ikumi na viwili, mukupanzya amaluko ikumi na yawili aya Izirayeli. ²⁹ Aliwensi wino wasya izya ng'anda, awanyina, inkhazi, yisi, unyina, awana, pamwi ichalo muno izina lyane alipochelela ivivule umwanda swinya alipyana uwumi wa muyayaya. ³⁰ UKuwa awavule wano wali pankholelo waliza wasyale, swinya awa pansizi waliwa pankholelo.