¹ Pa mphindinye yoyo, awanthu wamwi kulyanye awamunena Yesu ivya awa Galileya wano uwazi wawo Pilato awisile ponga ni nzuwi zyawo. ² Yesu atolela nga atili kwe woliwo, ''Wuzye mukwelengania ukuti awa Galileya waa walinji awa wembuke ukulusya awa Galileya wanji umulandu wayimvile mu nzila yoo? ³ Awe, Nenji nkhuwanena. Ukuwa ndi mutakutontholokwa, mwensinye mulifwa munzila yiliyonga. ⁴ Pamwi wawo awanthu ikumi nu kananimonsi(18) mu Silowamu pakwe wano ing'anda yawaponezile nu kuwakoma woliwo, wuzye mukwelengania ukuti walinji awa wembuke ukulusya awawanji awanthu mu Yerusalemu? ⁵ Awe, nenji nanena. Ukuwa ndi mutakutontholokwa, namwenye mwensi mulifwa.'' ⁶ Yesu avwanzile umulumbe woo, ''Umunthu wumwi alinji nu muti wa nthumbusya mu chalo chakwe nga ayiza ukulola ichikomwa mwenemo kweni atazanile nanthi chimwi. ⁷ Umunthunye weyo atili ku mulimi, 'Lola, amuno pa myaka yitatu nkhakwiza nu kwelezya ukuti inzane ichikomwa mu muti wa nthumbusya lelo nazanile nanthi chimwi. Liputule. Wuzye fandi angalisya wuli lyakonona ichalo? ⁸ Umulimi atololela nga atili, 'Ulisye umwaka woo wenga pano nandi indilimilile nu kuliwika umuvundo. ⁹ Ndi lyakoma ivikomwa mu mwaka wakukonkha, achizima; Kweni ndi lyapotwa, uliputule!''' ¹⁰ Nomba Yesu asambilizyanga pe sinagogi yongo mumphindi ya Sabata. ¹¹ Lolani, umwanachi alinji mulyanye wino pa myaka ikumi na kananimonsi wino alinji nu muzimu wa sita amaka. Alinji amwiname swinya apotwa ukuti angayololoka. ¹² Pano Yesu aweni weliwe, amupunda nga atili, ''Mwanachi, wapusukwa ku wusitamaka wako.'' ¹³ Awika ikasa lyakwe pakwe weliwe, nga paponapapo ayololosizwe nu kuchindamika Leza. ¹⁴ Ukuwa e katungulula wa sinagogi ayilizyanizye umulandu Yesu apozizye pe Sabata. Achaleka e katungulula atolelela nga atili kwi wumba, ''Pali amanda mutanda mwakwe yano chilichete ukuwomba. Wize nga upozwe mwenemo, chitakachitike pa wanda wa Sabata.'' ¹⁵ Imfumu ayitolelela kwe weliwe nga yatili, ''Mwe wawufi mwemwe! Wuzye nanthi wenga mwakwe mwemwe akasapula ing'ombe pamwi indokwe yakwe nu kuyitungulula ku minzi pe Sabata? ¹⁶ Achilichonga nu mwana umukazyana wee uwakwe Abrahamu, wino satana amunyefile imyaka iyitali ikumi na kananimonsi, wuzye inkhusa zyakwe zitanga zisapulwe pe Sabata?'' ¹⁷ Lyo akuvwanga ivinthunye vyoo, wonsi wawo wano wamususyanga insoni zyawalema, ukuwa iwumba lyonsi alisechelela pakwe chichindame chino Yesu awomvile. ¹⁸ Ngapano Yesu atili, ''Wuzye uwufumu wakwe Leza wui ngati achani, a kuchani kuno ningawukolania? ¹⁹ Wuli ngati ambeyu ya muzimwa wuno umunthu asenzile nu kutaya mu chalo chakwe, nga awukula ukuwa amuti uwukulu, nga inyunyi ya mwiyulu azizenga ivisalanzo mu nsamba zyakwe.'' ²⁰ Swinya Yesu atili, ''Wuzye akuchani ningakolania uwufumu wakwe Leza? ²¹ Wuli ngati a mutawa umwanachi asenzile swinya asanzizye ni vipimo vitatu vya wusu wa mukate ukufika pano wasata mu wusu wonsi.'' ²² Ngapano Yesu apitila mu misumba nu twaya, ukusambilizya swinya akupita ukuya ku Yerusalemu. ²³ Wumwi atili kwe weliwe, ''Mfumu, wuzye awatichivye awanthu awakuti wapokwe?'' Achaleka atili kwe woliwo, ²⁴ ''Mulwisye ukuti munginjila ukupitila pa chisakati ichifinye, umulandu, nenji nkhunena kwe mwemwe, awavule walilonda ukuti winjile, ukuwa watalikwanisya ukuti winjile. ²⁵ Ndi umweni ng'anda akatuka nu kuyala ichisakati, apano uliyimilila kunzi swinya ulikong'onsya pa chisakati swinya uliyi, 'Mfumu, Mfumu, twinjizyani.' ''Alitolelela nu kuti kwe wewe, 'Nenji nthawamanyile pamwi akwinye kuno mwafuma.' ²⁶ ''Ngapano muliti, 'Twalyanga nu kung'wa pankholelo yako swinya watusambilizyanga mu tunzila twitu.' ²⁷ ''Ukuwa alitolelela, 'Nenji nkhuwanena, nthawamanya kuno mwafuma. Fumaniko ku kwane, mwe wachita iviwipe!' ²⁸ Kuliwa ukulila nu kusya kwa mino pano mwalola Abrahamu, Iyizeki, Yakobi, na wa kasema wonsi mu wufumu wakwe Leza, kweni mwemwe mwasumbilwa kunzi. ²⁹ Waliyiza ukufuma ku mbali zyonsi zyansi ya pansi, nu kwikala pa tebulo mu wufumu wakwe Leza. ³⁰ Mumanye choo, wawo wano awakulondeka katichi waliwa wa kutalichila, swinya wawo wano awa kulondeka nkhani waliwa wa wumalilo.'' ³¹ Lyo papita akamphindi, awa Farisi wamwi wiza nga watili kwe Yesu, Yanga swinya ufume kweneko koo umulandu Herodi akulonda akukome.'' ³² Yesu atili, Yanga swinya mumunene mumbwe weyo, 'Lola, nkhusamazya ama demoni swinya nkhupozya ilelo, mutondo, nu wanda wa chititatu ndikwanisya ichakulonda chane.' ³³ Munzila yiliyonsi, achakulondeka kwe nene ukuti intwalilile ilelo, mutondo, nu wanda wuno wakonkha amuno asa chakuzumilizwa ukukoma e kasema kuno asa ku Yerusalemu. ³⁴ Yerusalemu, Yerusalemu, wino ukukoma awa kasema na wawo wano watumwa kwe wewe. Akuvule wuli nenji nalondesyanga ukuwunganika awana wako muno inkhoko yikawunganika utwana twakwe pansi pa vyapa vyakwe, lelo utalondesyanga choo. ³⁵ Lola, ing'anda yako yasyala yenga. Nenji nkhuti kwe wewe, 'A Mulotwe wino akwiza mwizina lyakwe Mfumu.'''