¹ Pakukolelela palinji ivyakuchitika ivya wa Yuda, nga Yesu aya ku Yerusalemu. ² Nomba mu Yerusalemu papipi nu mulyango pali ichiziwa, chino mu muvyango we chi Aramayiki chikakwitwa Betesida, swinya chalinji namapembo yasano. ³ Awanthu awavule wano walwile, inthonkho, awalemale, pamwi wano wasinthukanga walalanga kokonye. Walindililanga ukuti aminzi yavundulwe. ⁴ Pakuti umungelo wa Mfumu Leza wachililanga mukuvundula aminzi mu mphindi zimwi. Wino wafika waponela pano aminzi yachili yavundusile wapolanga kundwala yonsi yino walwazile. ^{5 6} Palinji umunthu wumwi wino walwile imyaka amakumi yatatu na kananimonsi (38). Pano Yesu wamulola alazile palyanye, alola kuno wikalanga paponye imphindi nthali, ati kwakwe weliwe, '' Wuzye ukulonda ukupola?'' ⁷ Umulwale atolelela ati, ''Tatakulu, nsi nanthi wumwi uwakuti ambike muchiziwa pano aminzi yavundulwa. Pano nkhwiza, winji akwinjila pano ntchili.'' ⁸ Yesu ati kweakwe weliwe, Katuka, nyamula ichitanda chako uwapita.'' ⁹ Paponapapo umunthu apola, anyamula ichitanda chakwe awapita. Nomba uwandanye wowo walinji apa Sabata. ¹⁰ Apano awa Yuda awatiku munthu wino wapozile, '' Ilelo a Sabata swinya asa chakuzumilizwa ukuti ukutwika ichitanda chako.'' ¹¹ Atolelela, ''Wino wamphozizye watili kwe nene, ' Nyamula ichitanda chako uwapita.''' ¹² Awamukolowozya, '' Amunthuchi wino wavwanzile kwe wewe, 'Nnyamula ichitanda uwapita'?'' ¹³ Ukuwa, wino wapozizwe atamanyile ukuti weweni umulandu Yesu wafumile penepo munkhama, amuno palinji iwumba kulu pa masyo ¹⁴ Apala pazimba, Yesu aya amuzana mwi tempeli ati kwe weliwe, '' lola, wawa we mupole! Utakize uwembuke swinya, ukuti chimwi ichiwipe nkhani chitize chichitike kwe wewe. ¹⁵ Umunthu wizile afumapo nukuwanena awa Yuda kuno walinji e Yesu wino wamupozizye. ¹⁶ Nomba umulandu wa vinthunye vyoo awa Yuda awamuchuzya Yesu, amuno wawomvile ivinthunye vyoo pe Sabata. ¹⁷ Yesu atolelela kwe woliwo, ''E Tata wane na nombanye achili akuwomba, swinya nene, naninye, nkhuwomba.'' ¹⁸ Umulandu we choo, awa Yuda awavwambilizya ukuti wamukome umulandu atawifizye e Sabata wenga, kweni swinya wapunda Leza nge e Tata wakwe umwenecho, ukuyiwika muyane nu Leza. ¹⁹ Yesu atolelela woliwo, ''Awenche, awenche, Umwana ataga awombe nanthi chimwi icha weliwe, kanonzi chenga chino e Tata akuwomba, amuno chilichonsi chino Tata akuwomba, nu Mwana akawomba chochonye. ²⁰ Amuno Tata watemwa u Mwana swinya akamusonthela chilichonsi chino wene weliwe akawomba, swinya alimusonthela ivikulu ivinthu ukulusya vyoo ilyakuti muli zunguka. ²¹ Ndivino Tata akazyulupula awafwe nu kupa woliwo uwumi, achaleka nawenye u Mwana akapa uwumi kwe wensi wino akumulonda. ²² Amuno e Tata asipanzya nanthi wumwi, kweni apile ukupanzya konsi ku Mwana, ²³ ilyakuti wensi alichindika u Mwana ndivino wakachindika e Tata. Wensi wino asichindika u Mwana asichindika e Tata wino watuma weliwe. ²⁴ Awenche, awenche, weni wino akwivwa izwi lyane nu kusuwila weliwe wino watuma nene ali nu wumi wa muyayaya swinya atalipanzwa, kweni weni apululila ukufuma wafwe ukuya ku wumi. ²⁵ Awenche, awenche, nkhuwanena imphindi yikwiza, swinya a nomba, pano awafwe wiliyivwa izwi lyakwe Mwana kwe Leza, nga wonsi wano wivwa waliwa nu wumi. ²⁶ Ndivino e Tata ali nu wumi mwakwe weliwenye, achaleka weni nawenye apile u Mwana ilyakuti weni awe nuwumi mwe weliwe, ²⁷ swinya e Tata apile u Mwana amaka ya kupanzya umulandu weni a Mwana wa Munthu. ²⁸ Mutakazunguke pe choo, amuno pali imphindi yino yikwiza yino wensi wino ali mwi nkhungwe aliyivwa izwi lyakwe ²⁹ nga alifuma kunzi: walya wano wawomvile ichete ukuya kukuzyulupuka ku wumi, swinya walya wano wawomvile iviwipe kukuzyulupuka kwa kupanzwa. ³⁰ Nene nthanga mbombe nanthi chimwi ukufuma nene nenga. Pano nkhwivwa, nkhupanzya, swinya ukupanzya kwane akulungamane amuno naninye nthakuvwamba ukulonda kwe nene nenga kweni ukulonda kwakwe wino watuma nene. ³¹ Ndi nkhusimichila ivya kwe nene nenga, ukusimichila kwane kutanga kuwe ni chisinkha. ³² Kuli winji wino akusimichila ivya kwe nene, swinya manyile ukuti ukusimichila kuno weni akupa ivya kwe nene achisinkha. ³³ Mwemwe mwatuma kwe Yohani, nga weni wasimichila ichisinkha. ³⁴ Kweni ukusimichila kuno nkhupochela kusifuma ku munthu. Nkhuvwanga vyoo ivinthu kuno mwemwe munga pusuka. ³⁵ Yohani walinji a nyali yino yakolelanga nu kuwala, swinya mwemwe mwalondanga ukusechela mu wuswepe wakwe mu kamphindi. ³⁶ Ukuwa ukusimichila kuno ndinako akukulu ukulusya akwakwe Yohani, amuno imilimo yino e Tata wampha ukuti imale, imilimo yoyonye yino nkhuchita, yikusimichila ivyakwe nene kuno e Tata watuma nene. ³⁷ E Tata wino watuma nene a weliwe akusimichila ivya kwe nene. Mwemwe mutatela mwivwe izwi lyakwe pamwi ukulola imilolechele yakwe pa mphindi yimwi. ³⁸ Mwemwe musi nanthi a lizwi lyakwe lino lyasyala mukasi mwinu, amuno mutakusuwila mwakwe wenga wino weni atuma. ³⁹ Mukuvwamba amawaliko umulandu mukwelengania kuno mwakwe yeni amuno muli nu wumi wamuyayaya, swinya amawaliko yanye yaa yakusimichila ivya kwe nene, ⁴⁰ swinya mutakulonda ukwiza kwe nene ilyakuti muwe nuwumi. ⁴¹ Nene nthakupochela uwuchindame ukufuma ku wanthu, ⁴² kweni manyile kuno musi nu lukundo lwakwe Leza mukasi mwinu. ⁴³ Nene niza mwizina lyakwe Tata wane, swinya mutakumphochela. Ndi wunji angiza mwi zina lyakwe, mungize mupochele weliwe. ⁴⁴ Wuzye mungasuwila wuli, mwemwe wano mukuzumila uwuchindame ukufuma kwe wenga nu muwuye kweni mutakuvwamba uwuchindame wuno wukwiza ukufuma kwe Leza wenganye? ⁴⁵ Muta kelenganie kuno nene nenganye ndi wasusya paminso yakwe Tata. Wenga wino akususya mwemwe we Musa, mwakwe weliwe mukulindilila. ⁴⁶ Ndi mwasuwizile Musa, mungasuwila naninye, umulandu weni wawalika ivya kwe nene. ⁴⁷ Ndi mutakusuwila amawaliko yakwe, chingawa wuli ukutii musuwile amazwi yane?''