¹ E Songo kwe mukundwe Gayasi, wino namukunda mu chisinkha. ² Mukundwe, nenji nkhupepepa ukuti vyonsi vingawa ichete ne wewe swinya ukuti uwe nanthi andwala, ndivino chili chete nu moyo wako. ³ Amuno nalinji ni chimwemwe ichikulu pano awanyina wizile swinya wanyamuzile u wukamboni ku kusimichila kwako, ndivino ukupita mu chisinkha. ⁴ Nenji nsi ni chimwemwe ichikulu ukuchila choo, ukwivwa kuno awana wane wakupita mu chisinkha. ⁵ Mukundwe, ukuchita isuwilo lyonsi pano wewe ukuwombela awanyina na walendo ⁶ wano wanyamuzile u wukamboni uwa lukundo lwako pa minso ya chiwanza. Ukuchitichete ukutuma woliwo pa wulendo wawo munzila iya kuyana nu Leza, ⁷ umulandu chalinji amuno izina kuno awaya pa wulendo, nanthi kusenda chimwi ukufuma ku Makandi. ⁸ Achaleka tupochelele awa musango ngati awaa alyakuti naswenye tuwe awawomvi ponga ku chisinkha. ⁹ Nenji nawalisile chimwi ku chiwanza, kweni Diyotirefesi, wino akakunda ukuwa wakutalichila mwakwe woliwo, atakutupochelela sweswe. ¹⁰ Nomba ndi niza, neji ndikonkhelezya chino weni akuwomba, ukulanda ivyawupuwa iviwipe ukususya sweswe. NAnthi akwikuta na choo, weni asa kukana kwenga ukupochelela awanyina ku mwenecho wenga, kweni akulesya swinya wawo wano wakulonda ukupochelela woliwo swinya ukuwasamazya mu chiwanza. ¹¹ Mukundwe, utakakonkhe chino a chiwipe kweni chino a chizima. Weyo wonga wino akuchita ichizima awakwe Leza; weyo wonga wino ukuchita ichiwipe atamuweni Leza. ¹² Demetiriyasi anyamuzile uwu kamboni ku wonsi swinya ku chisinkha ichenecho. Naswenye twanyamula uwu kamboni, swinya wewe wamanya ukuti ukusimichila kwitu a chisinkha. ¹³ Nenji nalinji ni vinthu ivivule ukuti imbalike kwe wewe, kweni nthakulonda ukuti imbalike vyenevyo kwe wewe mwe kalata. ¹⁴ Ukuwa nenji nkhuchetekela ukukulola wewe zuwa, nga tulivwanga paminso na paminso. ¹⁵ Umutende wuwe na wewe. Iviwuzya vikukulamuka. Ulamuke iviwuzya vyitu koko aliwensi pi zina lyakwe.