¹ Awa kasesema wizile ku wanthu, na wasambilizya wawufi nawonye waliyiza kwe mwemwe. Umwa sita kuloleka walileta na woliwo ivyakwivwa ivya kumongolania, swinya walikana e bwana wino akazile woliwo. Wakuleta ukumongolania ukwa nanthi kuzimba pakwe woliwo awenecho. ² Awavule walikonkha vino umuwili wukulonda, swinya ukupitila mwakwe woliwo inzila ya chisinkha yilisamulwa. ³ Mu wu mphangandyanje wawo waliwawepa mwemwe na mazwi aya wufi. Ukononekwa kwawo kukwiza katichi katichi ukufuma kali, swinya ukomongolwa kwawo kutalazile. ⁴ Amuno Leza atasyile awangelo wano wawembusile. Mu malo mwakwe alemesile wenewo kwe Tatarasi ukuti wasungwe mu wunyololo pa mfizi ya pansi ukufika pa wupinguzi. ⁵ Na swinya, atasyile insi ya pansi iya kali. Mu malo mwakwe, asyile Nowa, wino alinji we kawizya wa wulungamane, ponga na wanji munenulambali(7) pano Leza iyizile na minzi ayavule kunsi ya wusitaleza. ⁶ Leza swinya ayononile imisumba ya Sodomu na Gomora nu mulilo swinya apinguzile woliwo ku kumongolania ngati a chimanyisyilo cha chino chili mukuchitika ku wasitaleza. ⁷ Ukuwa ku mulungamane Loti, Alyatanjilwe ni myikalile iya ku muwili ya wanthu awa sita masundo. ⁸ Alyakuti umunthu umulungamane, wino wikalanga pakasi pawo uwanda nu wanda, Ayimvilwe mu moyo wakwe uwulungamane umulandu wa vino aweni nu kwivwa. ⁹ Imfumu yamanya muno yingapususya awanthu ukufuma ku vyelezyo na muno yingalemela awanthu wanthalungamana ku kusundwa pa wanda wipingulo. ¹⁰ Choo a chisinkha sana sana kwe wawo wano wakutwalilila mu vikumbwa iviwole ivwa ku muwili swinya wano wakusula insambu. Nanthi a kutina, watakutina ukuti wasamule awachindame. ¹¹ Awangelo wali na maka ni nsambu, kweni watakuleta amapingulo aya kutuka ukususya woliwo ku Mfumu. ¹² Ukuwa waa awanthu, ngati avinyama ivisita kwelengania, wapanzile mu miwele ku kunyepwa nu kononeka. Watamanya chino wakutuka. Mu kumongolwa, nawonya waliyononeka. ¹³ Walipochelela ukuyana nu kuwomba iviwipe vyawo. Wakwelengania ukuti ukuzewela pa musanya a chizima. Wali na mawunyali ni vilema. Wakusehela mu milimo yawo iyawufi pano wakulya na mwemwe. ¹⁴ Wali na minso ayizule nu wuzelele; watakwikuta nu luwembu. Wakupepelezya imyoyo yino watikazile ichete ku kuwomba iviwipe, swinya imyenzo yawo yisambilizizwe mu vikumbwa. A watipwe awana waa! ¹⁵ Walesile inzila iyilungamane nga awapita ukuti wakonkhe inzila ya Balamu umwana wakwe Biyo, wino atemwizwe ukupochelela amalipilo muno wunthalungamana. ¹⁶ Lelo akalipizilwe muno ukunona kwakwe umwenecho--e chinunu wa ndokwe akuvwanga mwzwi lya wanthu alesizye uwu chipena wa kasesema. ¹⁷ Awanthu waa a vifula vino visa na minzi swinya a ngungu yino yikupiswa ni mphepo ya pa minzi. Ichilanda cha mfizi iyikulu yisunjilizilwe muno woliwo. ¹⁸ Wakuvwanga ni vikanza vyavye. Wakukopelezya awanthu ukupitila mu vyakulonda vya muwili. Wakukopelezya awanthu wano wakwelezya ukuti wasamale ukufuma ku wawo wano wikala mu konona. ¹⁹ Wakulayizya ipususyo kwe woliwo, kweni weni awenecho awazya ku wuwole. Amuno umunthu a muzya ku chino chikuchimvya weliwe. ²⁰ Ndi wapusuka ku wuwole wansi yapansi ukupitila ku chimanyisyo cha ku Mfumu nu Mutuli Yesu Kristu nga swinya wakupinzanwa mu vyolivyo swinya vikuwachimvya, imiwele yawo pawumalilo wiza wawa awuwipe ukulusya pakutalichila. ²¹ Chalinji a chizima kwe woliwo ukuti watakamanye inzila ya wulungamane ukulusya ukuti wayimanye nga wapiluke ukufuma kwi sundo ilitele lino lyapilwe kwe woliwo. ²² Umulumbe woo awa kusimichila kwe woliwo: ''Imbwa yikunyoka ku vino yaluka iyenecho, nu kapoli wino asamvyilwe akunyoka ku matipa.''