¹ Ukufuma kwe songo wa chiwanza ukuya ku mwanachi umusolwa na wana wakwe, wana nawakunda mu chisinkha--swinya asa nene nenga, kweni na wonsi wano wamanya ichisinkha-- ² umulandu wa chisinkha chino chikwikala mwakwe sweswe swinya chiliwa mwakwe sweswe ku muyayaya. ³ Uwila, inkhumbu nu mutende wuliwa na sweswe ukufuma kwe Leza e Tata nu kufuma kwe Yesu Kristu, u Mwana wakwe Tata , mu chisinkha nu lukundo. ⁴ Nenji nkhusechelela kuno nzanile wamwi awana wako wakupita mu chisinkha, ndivino twapochezile isundo lyoo ukufuma kwe Tata. ⁵ Nomba nenji nkhukomelezya wewe, mwanachi--asa ngati nenji nkhukuwalikila isundo ipya, kweni lyonga lino tuli nayo ukufuma kunthaliko--kuno tuwakundana wonga nu muwuye. ⁶ Loo a lukundo, kuno tuwapita ukuyana na masundo yakwe. Lyoo a lisundo, ndivino wewe wivwa ukufuma ku nthaliko, kuno wewe uwapita mu lyenelyo. ⁷ Amuno wakawepa awavule wayile munsi ya pansi, swinya watakuzumilizya kuno Yesu Kristu wiza ku muwili. Wee we kawepa swinya we mususyakristu. ⁸ Ulolechesye ku wemwenecho, ukuti utakasovye ivinthu vyoo muno vyelivyo sweswe swensi tuwomvile, kweni alyakuti wewe ungapochelela ichisalifyo chonsi. ⁹ Aliwensi wino akuya ku nkholelo nga nanthi kwikala mu chisambilizyo chakwe Kristu asi nawe Leza. Weyo wonga wino akwikala mu mu chisambilizyo, wee wonga ali nu Tata nu Mwana nye. ¹⁰ Ndi wumwi akwiza kwe wewe nga nanthi kuleta ichisambilizyo choo, utakapochelele weliwe mu ng'anda yako swinya utakalamuke weliwe. ¹¹ Amuno weyo wonga wino akulamuka weliwe aliponga na weliwe mu ntchito zyakwe iziwipe. ¹² Nenji indi ni vivule ivinthu ukuti imbalike kwe wewe, kweni nthakulonda ukuti imbalike vyenevyo mwe kalata. Ukuwa kweni, nenji nkhuchetekela ukuti nize kwe wewe nga nkhunene pa minso na pa minso, alyakuti ichimwemwe chitu chilifika penepo. ¹³ Awana wakwe nkhazi yako iyisolwe wakukulamuka.