¹ Pauli, umu positole wakwe Kristu Yesu ku kulonda kwakwe Leza, nu Timoti umwana witu, ku chiwanza chakwe Leza chino chili mu Korinthi, swinya na ku wanthu wonsi awatele wakwe Leza mu chiputulwa chonsi mu Achayiya. ² Inkhumbu yiwe pakwe mwemwe nu mutende ukufuma kwe Leza e Tata witu swinya ni Mfumu Yesu Kristu. ³ Lekani e Leza nu Tata wakwe Mfumu yitu Yesu Kristu atumvwe. Weni we Tata wa chilanda swinya we Leza wa kutenganika imyenzo. ⁴ Leza akatutenganika imyenzo mu nthazi zyitu zyonsi, alyakuti naswe tungatenganika awanji nu kutenganika kuno Leza wawelezile ukutenganika sweswe. ⁵ Amuno ndivino ukuyimba kwakwe Kristu kwavula muno sweswe, acho swinya ukutengana kwitu kwavula ukupitila mwakwe Kristu. ⁶ Lelo ndi wakutuyimvya, akuli kutengana swinya utulwa kwinu; swinya ndi tukutenganikwa, akuli kutengana kwinu. Ukutengana kwinu kukuwombesya pano muchimyeke mukugawana ukuyimba kulikonga kuno naswenye tukuyimba. ⁷ Ukuchetekela kwitu ukuyana na mwemwe nanthi akuyingana, amuno twamanya kuno ndi mukugawana amayimba, nu kutengananye nako mukugawana. ⁸ Amuno tutakulonda ukuti muwe nanthi akumanya, wanawitu, ivya mayimba yano twalinji nawo ku Asiya. Twalinji mu mayimba sana ukuchila amaka yitu alyakuti tupasile nu wulanzinye. ⁹ Amolimo, twalinji nu kupingula kwa mfwa pakwe sweswe. Lelo chocho chalinji ukuti tutakawike isuwilo lyitu mwakwe sweswe, lelo mu malo mwakwe liwe mwakwe Leza, wino akakatusya ku wafwe. ¹⁰ Weni watuposile sweswe ukufuma ku mayimba ya kuwufwe, swinya andi atupoke. ¹¹ Weni aliwomba choo pano namwenye mukututula sweswe ukupitila mu mapepo yinu. Ngapano awavule walisalifizya sweswe muno ukutemwelwa kwa wila kuno kwapilwe kwe sweswe ukupitila mu mapepo ya wavule. ¹² Tukuyikwezya pakwe choo: Imyenzo yitu yikuwikila uwu kamboni ukuti twayisunjilila munsi ya pansi nu wutele swinya uwu leza uwakusimichila, asa kusuwila mu mano ya muwili kweni mu wila wakwe Leza. ¹³ Sweswe tutakuwalika nanthi chimwi chino mutanga muwelenge pamwi ukuvwichisya, swinya nkhuchetekela ukuti mwandi mwivwichisye ichete sana ¹⁴ ndivino mwatwivwichisizye sweswe katichi, ukuti mungayitumvya muno sweswe pa wanda wakwe Mfumu yitu Yesu, ndivino swewe naswenye tungayitumvya muno mwemwe. ¹⁵ Umulandu nayisuwizile nenga ivya choo, nalondanga ukuti nize tasi kwe mwemwe, alyakuti munga pochelela uwuzima wa kulolwa kawili. ¹⁶ Nayipekinie ukuti indole mwemwe pano ndiyanga ku Masedoniya. Apano nalondanga swinya ukuti imbalole swinya pa wulendo wane ukufuma ku Masedoniya, ngapano ukuti mwemwe munthume panzila yane ukuya ku Yudeya. ¹⁷ Pano nelenganianga munzila yoo, wuzye nazimbanga? Wuzye nkhupekania ivinthu ukuyana ni miwombele ya wanthu, ayakuti inthi ''Molimo, molimo'' swinya ''Awe, awe'' pa mphindi yonga? ¹⁸ Lelo ndivino Leza amusuwilwa, tutanga tuvwanjile ponga ''Molimo'' nu ''Awe.'' ¹⁹ Amuno u Mwana wakwe Leza, Yesu Kristu, wino Silivenasi, Timoti na nene twawizyanga pakasi pinu, asa ''Molimo'' nu ''Awe.'' Mumalo mwakwe, Weni mu mphindi zyonsi ''Molimo.'' ²⁰ Amuno amalayano yonsi aya kwe Leza a ''Molimo'' mwakwe weliwe. Acho swinya ukupitila mwakwe weliwe tukati ''Amen'' ku wuchindame wakwe Leza. ²¹ Nomba we Leza wino akuwika apaliponga sweswe na mwemwe twimilile mwakwe Kristu, swinya atupakazya sweswe, ²² Weni wawika ichidindo chakwe pakwe sweswe nga atupa u Muzimu mu myenzo yitu ngati a chikole chakwe chino chandi chize. ²³ Mu malo mwakwe, nkhupunda Leza ukuti awe we kamboni wane ukuti ichifukwa nthizile ku Kolinthi chalinji akuchinjilila mwemwe. ²⁴ Choo asa mulandu wakuti tuwalesye mwemwe ukuti isuwilo lyinu liwe achani. Mumalo mwakwe, tukuwomba na mwemwe muno ichimwemwe chinu, pano mwimilizile mwi suwilo lyinu.