¹ Achaleka, ichakutalichila mu vyonsi, nenji nkhuwakomeezya ukuti ukulenga, amapepo, ukupepelana, nu kusalifya kuchitikile awanthu wonsi, ² muno izya mfumu na wonsi wano wali mu nsambu, alyakuti tungikala uwulanzi wa mutende swinya umyalale mu wonsi uwuleza swinya uwuchindikwa. ³ Choo achizima swinya chakuzumilizwa pa minso yakwe Leza u Mutuli witu. ⁴ Akalondesya awanthu wonsi ukuti watulwe swinya ukuti wize ku chimanyisyo cha wu chisinkha. ⁵ Amuno kuli Leza wonga, swinya kuli wenga kimililapakasi wakwe Leza nu munthu, u munthu weyo we Kristu Yesu. ⁶ Ayipile wenga umwenecho a chilipo ku wonsi, ngati a wukamboni pa mphini iyenecho. ⁷ Muno mulimo woo nasolizwe ne mutumwa swinya mu positole--nenji nkhuvwanga ichisinkha, nenji nthakuwipa--swinya umusambilizya wa Makandi mwi suwilo ni chisinkha. ⁸ Achaleka, nenji nkhulonda awonsi mu masyo yonsi ukuti awapepa swinya ukuti winusye mupela amakasa ayatele nanthi kufulwa pamwi ukupazinhana. ⁹ Achilichonga awanachi wazwale ivizwalo ivizima, nu muchinzi swinya ukuyilesya, asa ni sisi ililuke pamwi na makoza ayayembe pamwi ivizwalo vya mutengo uwukulu, ¹⁰ kweni na vino vilichete ku wanachi wano wakulanda ivya wu leza ukupitila mu milimo iyizima. ¹¹ U mwanachi afwile asambilile mu chimyamya nu kutonthela konsi. ¹² Nenji nthakuzumilizya umwanaci ukuti asambilizye pamwi alolesye insambu papela pa monsi, kweni ukwikala mu chimyamya. ¹³ Amuno Adamu amatilwe pakutalichila ngapano Eva. ¹⁴ Adamu atawefilwe, kweni umwanachi awefilwe nga awa muwembuke. ¹⁵ Mulimonsi, umwanachi alitulwa ukupitila mu kukwata awana, ndi watwalilila mwi suwilo na mu lukundo swinya ukuwikwa pambali ni myelenganio iyizima.