¹ Achaleka muwike kumbali iviwipe vyonsi, uwufi wonsi, uwulyalya, uwuzuwa, nu kutuka konsi. ² Ndivino awana awatichi, muvwambe umukaka uwuswepe uwa mupasi, alyakuti ukupitila mwakwe wenewo mungakula mwi pususyo, ³ ndi mwemwe mwawonja kuno Imfumu aya nkhumbu. ⁴ Mwize kwe weliwe wino a liwe lya wumi lino awanthu walikanile, kweni kuno lisozilwe nu Leza ngati a lyakulondeka kwe weliwe. ⁵ Mwemwe namwenye muli ngati amawe ya wumi yano yali mukuzengwa ukuti muwe mwe ng'anda ya muzimu alyakuti muwe mwe wananzuwi awatele wano wakupa inzuwi ya muzimu iyizumilizywa kwe Leza ukupitila mwakwe Yesu Kristu. ⁶ Amawaliko yali na choo: ''Lolani, nenji nkhulambalika mu Ziyoni iwe lya kuluminkhania, ilisolwa swinya ilya mutengo. Wensiwino akusuwila mwe weliwe atalitela asamulwe.'' ⁷ U muchinzi nomba awa kwe mwemwe wano mukusuwila. Ukuwa kwe wawo wano watakusuwila, ''Iwe lino lyakanilwe na wa fundi, alyo lyawa a liwe lya kuluminkhania,'' ⁸ swinya, ''Iwe lya kupinzania swinya ichiliwe chino chikuleka woliwo wapone.'' Awa kupunula umulandu awa tatonthezile izwi--a chinthu chino wasolizwe ukuti wachite. ⁹ Lelo mwemwe mwe wanthu awasolwe, awananzuwi wa wufumu, uluko ulutele, awanthu awakwe Leza, alyakuti mwemwe mungawizya ivizungusyo vyakwe wonga wino wita mwemwe ukufuma ku mfizi ukuya ku wuswepe wakwe uwakuzungusya. ¹⁰ Imphindi yimwi mutalinji mwe wanthu, kweni nomba mwawa mwe wanthu wakwe Leza. Mwemwe mutapochezile inkhumbu, kweni nomba mwapochelela inkhumbu. ¹¹ Wakundwe, nenji nkhuwakomelezya ngati mwe walendo munsi zya wenecho ukuti samalani ukufuma ku vyakukumbwa vya muwili, vino vikulwa nu moyo winu. ¹² Imisango yinu pakasi pa Makandi kuwe kwa muchinzi, alyakuti pano wakususya mwemwe muno ukuwomba ivinthu iviwipe, wangalola imilimo yinu iyizima nga wape uwuchindame kwe Leza pa wanda wuno aliyiza. ¹³ Mutonthele insambu zyoni izya wanthu muno Imfumu. Mutonthele Imfumu ngati ankhulu, ¹⁴ ponga nawa bwanamukumbwanye, wano watumwa ukuti wanyepe wano wakuwomba iviwipe nga watumvye wawo wano wakuwombichete. ¹⁵ Amuno choo a chakulonda chakwe Leza, kuno mu kuwomba ivizima mukumyalalika imivwango iyavye iya wanthu awapuwa. ¹⁶ Ndi vino awanthu awapusuke, mutakawombele uwupusukwe ngati achakuvwimba ku wuwipe winu, kweni muwe ngati mwe wawomvi wakwe Leza. ¹⁷ Muwachindika awanthu wonsi. Muwakunda uwunyina. Muwatina Leza. Muwachindika imfumu. ¹⁸ Mwe wawomvi, muwatonthela awa bwana winu nu muchinzi wonsi. Muwatonthela asa wazima na wamyalale mphela, kweni na wawipenye. ¹⁹ Amuno acha kutumvya ndi, umulandu weni amanyile ukuti Leza alipo, umunthu akujimba amalanda pano akuyimba sitamulandu. ²⁰ Wuzye chingawa chizima wuli ndi wewe wawembuka ngapano wajimba pano ukusundwa? Ukuwa ndi uwomvile uwuzima ngapano ukuyimba pano ukusundwa, choo a chikupa ukutumvya ukufuma kwe Leza. ²¹ Amuno akwe choo kuno mwemwe mwitwa, umulandu Kristu nawenye ayimvile muno mwemwe. ''Asyile mwemwe ichakulolela penepo ukuti muwakonkha mu matamba yakwe. ²² Weni atachitile nanthi a luwembu, patalinji nanthi awufi ukufuma mu mulomo mwakwe.'' ²³ Pano wamutusile, weni nanthi kunyosya. Pano weni ayimvile, weni nanthi kunyosya, kweni ayipile wenga kwe wonga wino akapingula mu wulungamane. ²⁴ Weni umwenecho anyamuzile amawembuko yitu mu muwili wakwe ukuya ku muti alyakuti sweswe tutize tuwe swinya ni mbali mu luwembu swinya alyakuti tungize tuwe swe wa wumi muno uwulungamane. Ni vilonda vyakwe mwemwe mupozile. ²⁵ Mwensi mwemwe mwapinananga ngati ang'onzi zino zisovile, kweni nomba mwanyochezwa kwe muchemi swinya e kasunjilila wa myoyo yinu.