¹ Mwe wana, nenji nkhuwalika ivinthu vyoo kwe mwemwe alyakuti mutize muwembuke. Kweni ndi wumwi akuwembuka, tuli nu wakutuvwanjila kwe Tata, Yesu Kristu, wonganye wino amulungamane. ² Weni anzuwi ya mawembuko yitu, swinya asa yakwe sweswe swenga, kweni swiya naya kunsi ya pansi yonsi. ³ Tumanyile ukuti twiza ukumanya weliwe, ndi tukusunga amasundo yakwe. ⁴ Weyo wino akuti ''Nenji namumanya Leza'' kweni atakusunga amasundo yakwe awa wufi, swinya ichisinkha chitali mwakwe weliwe. ⁵ Ukuwa wensi wino akusunga izwi lyakwe, mwakwe weliwe amolimonye ulukundo lwakwe Leza lwawa nanthi akamphisya. Mwakwe choo tukumanya kuno tuli mwakwe weliwe: ⁶ wensi wino akuti ali mwakwe Leza nawenye umwenecho awapita ndivino Leza apitanga. ⁷ Wakundwe, nenji nthakuwalika isundo ilipya kwe mwemwe, kweni isundo ilya kali lino mwivwile ukufuma kunthaliko. Isundo lya kali a lizwi lino mwemwe mwivwile. ⁸ Lelo nenji nkhuwalika isundo ipya kwe mwemwe, lino achisinkha mwakwe Kristu na mwakwe mwemwe, umulandu imfizi yikupita, nu uwuswepe wa chisinkha wutalisile kali ukuwala. ⁹ Wonga wino akuvwanga ukuti ali mu wuswepe nga akupata umunyina wakwe ali mu mfizi ukufika na nomba. ¹⁰ Wonga wino akukundwa umunyina wakwe ali mu wuswepe swinya patali nanthi amphindi ya kupunula mwakwe weliwe. ¹¹ Ukuwa wonga wino wapata u munyina wakwe ali mu mfizi swinya akupita mu mfizi; atamanyile kuno akupita umulandu imfizi yiyalizile aminso yakwe. ¹² Nenji nkhuwalika kwe mwemwe, mwe wana, umulandu amawembuko yinu yatetezilwe umulandu wi zina lyakwe. ¹³ Nenji nkhuwalika kwe mwemwe, ya tata, umulandu mwamanya wonga wino akufuma ku nthaliko. Nenji nkhuwalika kwe mwemwe, walumendo, umulandu mwemwe mumutonsizye umuwipe. Nenji imbalisile kwe mwemwe, mwe wana, umulandu mwamumanya eTata. ¹⁴ Nenji imbalisile kwe mwemwe, wa tata, umulandu mwamumanya wonga wino ali ukufuma ku nthaliko. Nenji imbalisile kwe mwemwe, walumendo, umulandu mwe wakankhale, swinya izwi lyakwe Leza lichili mwakwe mwemwe, swinya mumutonsizye umuwipe. ¹⁵ Mutakatemwe insi ya pansi pamwi ivinthu vino vili munsi ya pansi. Ndi wumwi akutemwa insi ya pansi, ulukundo lwa kwe Tata lusi mwakwe weliwe. ¹⁶ Amuno vilivyonsi vino vili munsi ya pansi--ivikumbwa vya muwili, ivikumbwa vya minso, swinya u lukani lwa wulanzi--asa vya kufuma kwe Tata kweni a vya kufuma munsi ya pansi. ¹⁷ Insi ya pansi ni vikumbwa vyakwe vikusila. Kweni wensi wino akuwomba ukulonda kwakwe Leza aliwa mulanzi kwa muyayaya. ¹⁸ Mwe wana, a li ola lya wumalilo. Ndivino mwivwile ukuti u mususyakristu akwiza, lelo awasusyakristu awavule wizile. Mwakwe choo tukumanya ukuti a li ola lya wumalilo. ¹⁹ Wayile kunzi ukufuma mwakwe sweswe, kweni watalinji wakufuma mwakwe sweswe. Amuno ndi walinji wakufuma mwakwe sweswe nge wachili wali na sweswe. Ukuwa pano wayile kunzi, chalolesizye ukuti watafumile mwakwe sweswe. ²⁰ Ukuwa muli nu kupakazwa kwa kufuma kwe Wonga u Mutele, swinya mwensinye mwamanya. ²¹ Nenji nthawalisile kwe mwemwe umulandu mutamanya ichisinkha, kweni umulandu muchimanyile swinya umulandu pasi nanthi a wufi wuno wukufuma mu chisinkha. ²² Wuzye weweni a wawufi kweni wonga wino akukana ukuti Yesu we Kristu? U munthunye weyo a mususyakristu, umulandu akukana e Tata nu Mwana. ²³ Pasi nanthi wumwi wino akukana u Mwana ali nu Tata. Wensi wino akuzumila u Mwana nu Tata nye ali nawe. ²⁴ Kwe mwemwe, muleke chino mwivwile ukufuma ku nthaliko chiwe mwakwe mwemwe. Ndi chino mwivwile ukufuma ku nthaliko chili mwakwe mwemwe, namwenye muliwa mu Mwana na mwakwe Tata. ²⁵ Lyoo a li layano apile kwe sweswe--Uwulanzi wa pe na pe. ²⁶ Nenji imbalisile ivinthu vyoo kwe mwemwe ivya wawo wano wangize wasovye mwemwe. ²⁷ Kwe mwemwe, ukupakazwa kuno mwapochezile ukufuma kwe weliwe kukuwa mwakwe mwemwe, swinya mutakulonda nanthi wumwi ukuti awasambilizye. Kweni pano akupakazwa kukuwasambilizya mwemwe vilivyonsi achisinkha swinya asa wufi, swinya ndivino chisambilizizwe kwe mwemwe, yikalani mwakwe weliwe. ²⁸ Lelo, mwe wana, yikalani mwakwe weliwe alyakuti pano wiza tuliwa nu wuwome swinya nanthi a nsoni pa minso ya weliwe pakwiza kwakwe. ²⁹ Ndi mwamanya kuno a mulungamane, mwemwe mwamanya kuno aliwensi wino akuwomba chino achilungamane wakwatwa ukufuma kwe weliwe.