¹ Pauli, witwa nu Kristu Yesu ukuti awe amu positole muno kulonda kwakwe Leza, nu Sositeni umunyina witu, ² ku chiwanza chakwe Leza ku Korinti, wawo wano waswefizwe mwe Kristu Yesu nu kwitwa ukuti wawe a wanthu awatele, apaliponga na wonsi wawo mu yaliyonsi amasyo wano wakakwita pi zina Mfumu yitu Yesu Kristu, wino a Mfumu yawo swinya ayitu. ³ Inkhumbu nu mutende viwe kwe mwemwe ukufuma kwe Leza Tata witu ni Mfumu Yesu Kristu. ⁴ Nenji nkhusalifya penye kwakwe Leza wane muno amwemwe umulandu wa nkhumbu zyakwe Leza zino Kristu Yesu wapile kwe mwemwe. ⁵ Weni wapanga mwemwe wawotoke munzila zyonsi, Mu kuvwanga konsi nu kumanya konsi, ⁶ ndivino uwukamboni ku vyakwe Kristu kwasimichilwa ngati achisinkha pakasi pinu. ⁷ Achaleka mutasoweka nanthi achawila cha muzimu pano nu mwenzo mukulindilila ukuwumbulika kwakwe Mfumu Yesu Kristu. ⁸ Weni swinya alisimphisya mwemwe ukufika kunsilo, alyakuti mwite muwe nanthi amulandu pa wanda wakwe Yesu Kristu i Mfumu yitu. ⁹ Leza amusuwilwa, wino wawitizile mwemwe mu wuponga wa mwana wakwe Yesu Kristu i Mfumu yitu. ¹⁰ Nomba nenji nkhuchintchizya mwemwe, wanawitu, ukupitila mwi zina lyakwe Yesu Kristu i Mfumu yitu, kuno mwazimilizyania mwensi swinya kuno kutakawe nanthi kupawunkhana mwakwe mwemwe. Nenji nkhuchintchizya ukuti mwemwe musanzinkhane ni myenzo yiliyonga swinya chakulonda chilichonga. ¹¹ Amuno chaloleka pa lwenze kwe nene, wanawitu, na wanthu wakwe Kulowe ukuti muli imphokoto mwakwe mwemwe. ¹² NKhusula choo: wenga wakwe mwemwe akuti ''Nenji indi nu Pauli,'' pamwi ''Nenji indi nu Apolosi,'' pamwi ''Nenji indi nu Kefasi,'' pamwi ''Nenji indi nu Kristu.'' ¹³ Wuzye Kristu wapawunkhana? Wuzye Pauli wasayisilwe muno mwemwe? Wuzye mwabatizizwe mwi zina lyakwe Pauli? ¹⁴ Nenji nkhusalifya Leza ukuti nthabatizya nanthi wenga uwakwe mwemwe, suka Krispasi nu Gayiyusi. ¹⁵ Choo chalinji woo alyakuti nanthi wenga angalanda ukuti mwemwe mwabatizwa mwizina lyane. ¹⁶ (Nenji nabatizizye swinya awa mu ng'anda yakwe Stefano. Ukulusya papo, nenji nthamanyile ndi nabatizizye na wanji.) ¹⁷ Amuno Kristu atatuma nene ukuti imbatizye kweni ukulumbilila ilandwe zima -- asa nu muvwango wa kuchenjela, alyakuti uwuchingane wakwe Kristu watakachefwe amaka yakwe. ¹⁸ Amuno ilandwe lyavya wuchingane awupuwa ku wawo wano wakufwa. Ukuwa mwakwe wawo wano Leza akutula, ayali maka yakwe Leza. ¹⁹ Amuno chawalikwa, ''Nenji ndiyonona amano yawa mano. Nenji ndikandanizya ukwiluka kwa wamano.'' ²⁰ Alikwinye umunthu wa mano? Alikwinye umusambilile? Alikwinye e kakonkelezya wansi yoo? Wuzye Leza atapilula amano yansi ukuwa vyawupuwa? ²¹ Amuno insi mu mano yakwe yitamumanyile Leza, chamusechelesizye Leza ukupitila mu wupuwa wa kulumbilila ukuti atule wawo wano wakusuwila. ²² Amuno awa Yuda wakulenga ivilolesyo vya kuzungusya na wa Griki wakuvwamba amano. ²³ Ukuwa swenji tukulumbilila Kristu umusayike, icha kupunuzya ku wa Yuda swinya icha wupuwa ku wa Griki. ²⁴ Ukuwa ku wawo wano Leza wita, wonsi awa Yuda na wa Griki, tukulumbilila Kristu ngati amaka na mano yakwe Leza. ²⁵ Amuno uwupuwa wakwe Leza wuli na mano ukulusya awanthu, swinya uwutonthe wakwe Leza akuli kuzawana ukulusya awanthu. ²⁶ Lolani ukwitwa kwinu, wanawitu. Asa wavule wa mwemwe walinji na mano mu kulingana na wanthu. Asa wavule wa mwemwe walinji na maka. Asa wavule wa mwemwe walinji awachindame mu nkhwatwa. ²⁷ Ukuwa Leza wasola ivinthu vya wupuwa ivya munsi ukusozya insoni awamano. Leza wasola chino achitonthe munsi ukusozya insoni chino achizawana. ²⁸ Leza wasola chino acha pansi swinya ichisulwe munsi. Weni wasola ni vinthu vino vikuloleka avyavye, ukuti alete ku nanthi chimwi ivinthu vino vikuloleka ngati avili vinthu. ²⁹ Weni wawomvile choo alyakuti nanthi wenga angawa ni chifukwa chakuyikuzya paminso yakwe. ³⁰ Umulandu wa chino Leza wawomvile, nomba muli mwakwe Kristu Yesu, wino wizile wawa kwe sweswe amano ukufuma kwe Leza. Weni wizile wawa a wulungamane witu, uwutele, swinya ukukombolwa. ³¹ Muno acho, ndi vino amawaliko yakuvwanga, ''Lekani wenga wino ukuyikuzya, ayikuzye mwakwe Mfumu.''