Kukwo ǝnnyǒ nini ǝbu na fyyed ǝlyyad ǝhwu tuza ǝnied ǝba shyyo bumi Kristi Yesu ni dag. Nwad mumwaŋ ntswa sɨced bumi Kristi Yesu ǝwa kǝ nfǝrog n ǝwon tuza mumwan ǝbun ku mbyyaŋ ǝhwu ka. Əwod kyaŋ əkwo doka ji yəw ku nnyyo ni dənian ku saŋ ced mbwag lwam, Əgwaza u ǝ nyyo. Əku tǝm bǝ Ŋgwon guka bumi ǝkwa lwam byyo ǝbun gwo ga ngyed fi zǝnaŋ tuza ǝbun. Kukwo gwo sɨ fyyed ǝlyyad ǝhwu tuza ǝbun bumi lwam ka. Ə̀ ku nyyo ǝnî dɨ nyyo kyaŋ əkwo doka ji cad ə ga nyyo bumi zɨd ka. Zɨd əbyo ŋway coŋ tuza lwam ni, əwod zɨ coŋ bə nced Zɨzǝrag Ntswa ə. Ənied ǝba swan swad lwam ni, ba ti ntsswo bana bɨ nkyaŋ lwam nio. Əwod ǝnied ǝba sɨ swan swad shin Zɨzǝrag Ntswa ni, ba ti ntsswo bana bǝ nkyaŋ Zɨzərag Ntswa nio. Nwad, cud dam tuza lwam yed ǝhwu kyo, ǝwod cug dam shin Zɨzərag Ntswa u ə yed sɨced mbyyaŋ kay nda. Cug dam ndwam wu ǝyed nandwan kwo bǝ Əgwaza u, nwad ji yed ǝhwo bɨ doka Əgwaza ji dag, mmǝntug jî hwi. Ənied ǝba shyyo bumi lwam ni ba nɨ yəw ŋwwag Əgwaza u ǝsay ntsswo dag. Bǝ kǝ ǝnnyo, nyi shyyo bumi lwam kwo dag. Nwad nyi shyyo bumi Zɨzǝrag Ntswa u. Bǝ kǝnaŋ cucug ǝ naŋ Tswa Əgwaza ji swan bumi nyin ka. Əwod kǝ ǝyin ǝsɨ byyo Tswa Kristi ji dag, sǝm ǝ yed ǝshin gu dag. Kǝ Kristi ǝshyyo bumi nyin ka, lwam ku cyyo kwom kwo dənian əbun kyo, əwod tswa ji shyyo əced bumi nyin ka dənian ŋwwag saŋ əbun shi. Kǝ Tswa gu əzǝ dǝrəg Yesu nyyo ndyo bə ənied kukwi ba ə swan bumi nyin ka. Gu ǝtǝ ǝwo ku dǝrəg Kristi nyyo bǝ ǝnied kukwi ba ni, ǝna ŋwwag nyin sɨced bwo tuza ndwam nyin ǝna kwi ni mbwag Zɨzǝrag Ntswa wo swan bumi nyin ka ni. To, +nǝnyyug mba, zɨ byyoŋ ta, əwod dǝ ku yed sɨn lwam kwo zɨ ga nnyyo swad tuza nswad lwam dag. Kǝnaŋ nyi swan swad naŋ lwam ku ncad ni, nyi na kwi. Əwod kənaŋ bumi Ntswa ə kyo nyî hyad ntǝm ndwam na, nyi na shyyo əced. Dɨdɨd ǝnied aba Tswa Əgwaza ji yed ǝkwog uswon ba wu ni, ba yed nnwan Əgwaza nio. Əmgbom bə ənnyo, nyi ku san Tswa shin nyyo hwo zo nyî ga mbyyo uwun dag. Də kunuŋ əkyo, nyi san Tswa yed nnwan nəhwu nio, byo ə twi ə nyo, "Abba Əcyo!" Zɨzərag Ntswa bə əpyo gu ə kub tswa zɨd ji uma naŋ zɨ ngyed nnwan Əgwaza. Kə zɨ yed nnwan gu, nwad zɨ yed nnwan gado Əgwaza nio. Zɨ mun ngyed ənied ya gado duŋduŋ bǝ Kristi, kǝ cucug ǝ naŋ zɨ mun sswo zwod ku duŋduŋ bǝ ngu, kwo na cyyo zɨd bwo zɨ mun shyyo kyeŋkyay shi wu duŋduŋ bǝ ngu. Nwad nkyag sswo ubuŋ ənio zɨ sswo bə njen əji ni, ya may ǝ ntyan ku bɨ kyeŋkyay shi ǝkwo ǝba twərag zɨd ni dag. Ə ŋaŋ bǝ ŋɨŋaŋ naŋ nkyaŋ nwad na swan tswoŋ bay nnwan Əgwaza ku. Kukwo nkyaŋ nwad na ku shyyo utag ywway kyo, də bɨ shim ku dag. Nwad ku shyyo mbwag ətyə əwo ywway ku ni. Ku shyyo bumi gbugbag ləb sag ku. Mbyoŋ tsswo naŋ nkyaŋ nwad na əna wurug ndyo bɨ hwo ku, ə ncyyo əbwi. Əwod əna bay bə nku bumi swan səd kyenkyay shi nnwan Əgwaza na Nwad zɨ lyen naŋ kəkəb nkyaŋ nwad na uŋwun mbyyaŋ unag mbyin dunduŋ nini. Kaŋ bə ənnyo, əwod kwo zɨd ə əpyo zɨd, zɨd əbyo yed əkwog uswon byyo +əsum Zɨzərag Ntswa wu ni, zɨd bə pyo zɨd, zɨ mɨn ŋwun bə əyyaŋ zɨd, tswoŋ jen əzo ənə nkyag zɨd ə nshay lwam zɨd ku. Tuza gbugbag əkwi ni, zɨ nshyyo san ku. Əwod kyaŋ ǝkwo zɨ nsag tsswo ku itǝ bay ni, zɨ kǝ ndi ku dag. Ənyan ǝ bəd əna sag tsswo ǝ ntswoŋ kyaŋ ǝkwo gwo kǝ ndi ni? Kǝ zɨ byyo sag tsswo bɨ kyaŋ ǝkwo dǝ zɨ kə ndi ni dag, sə zɨ tswoŋ ku bɨ yab tsswo. Nwad ənnyo, Zɨzərag Tswa wu ə mbyyaŋ zɨd bumi lad zɨ ka. Nwad, zɨ lyen gag ǝkwo zɨ nɨ nay Əgwaza ni dag. Əwod Zɨzərag Ntswa wu bə əpyo gu ngwo nay dǝ kunuŋ zɨ ka bumi kpəram tuza nkyaŋ ənio də zɨ yəw nay ni dag. Ətyə ǝwo zwob ntsswo na ni, əlyen kyaŋ əkwo cug dam Zɨzərag Ntswa wu dənian əka gwo kɨ nay də kunuŋ nnwan na, də kunuŋ kyaŋ əkwo Əgwaza u ə cad ni. Zɨ lyen ǝnied ǝba cad Əgwaza u ni, ǝnyyo nkyaŋ na sǝllǝy nio yed shog zo ni, dǝnian ǝnied ǝba ǝ yoroŋ bɨ cad gu ku ni. Nwad, ǝnied ǝba gwo mɨn ndyen nyyo gbəŋgbaŋ ni, ba byo gwo shim ba ndyo bâ byyo əkwa Ŋgwon guka, naŋ gwo ngyed ŋgwon nɨnab tuza +nənyyug dɨdɨd. Ənied ǝbyo gwo kə nkhay ni, ba byo gwo yoroŋ. Əsɨ ba gwo sɨ yoroŋ ni, ba byo gwo san. Əsɨ ba gwo san ni ba byo naŋ gwo twərag ba kyeŋkyay shi wu. Yag ǝ zɨ nɨ karag bǝ nkyaŋ ǝ nay? Ka Əgwaza ə shyyo dunduŋ bǝ nzɨd, ǝ nyan ǝ na nyyo fɨb bǝ nzɨd? Gu ǝwo dǝ ǝ lag bǝ Ŋgwon guka ni dag, ǝsɨ ŋwwag ka dǝ kunuŋ ǝnied sǝlləy. Yag ǝ nə ndwoŋ gu joŋ zɨd kozan kyaŋ bǝ dɨdɨd. Ə nyan ǝ na tog ǝnied ǝba Əgwaza u a khay ni? Əgwaza ǝ fərəg ba ə wod. Ə nyan ǝ nǝ fyyed ǝyin ǝlyyad ǝhwu? Kristi ǝwo ǝhwu dǝnian zɨd ka ni, had bɨ kyaŋ əkwo sswag ǝnnyo ni, gu əwo ǝsɨ dərəg bǝ əhwu ka ni. Ə̀ nyyo tyog ku dunduŋ bǝ Əgwaza u dulwo shi guka, ngwo kɨ nay Əgwaza u dənian zɨ ka. Ənyan ǝ bəd nǝ khab zɨd bɨ cad Kristi ku? Sswo ubuŋ kwo ə? Byyan tsswo ə, təshug kwo a, kwo zwoŋ, kǝgbyaŋ, kǝ ǝshoŋ ǝyyi, kǝ tswad ə́? Naŋ ǝ ndyurug ni, "dənian nyin ǝkyo ǝ nhyay zɨd ǝ nkwoy nnwam na." Əbwwag zɨd ǝ nti naŋ zwon tsyyeb fag ni. Sǝlləy nkyaŋ ǝnay, zɨ sswag ced ǝ yoroŋ nzɨd ǝnied ya +zwaŋ mbwag ǝtyə ǝwo cad zɨd ni. Nwad, nwa kə nshyyo cucug wu naŋ kwo əhwu, kwo sɨced, kwo +ətəm ntswa, kwo nyyo +nɨtyog, kwo nkyaŋ nini na, kwo nkyaŋ tɨbay na, kwo nced. Kwo akətən, kwo bumi gɨ bwoŋ kyo, kwo kozaŋ nkyaŋ nini na, kwo kyaŋ əkwo ə nwad bə swanta ku ni, na may nâ khab zɨd bɨ cad əkwo shyyo nyyo bə Ətyə Uli Yesu Kristi zɨ wu ni dag.