Nini, nuŋ njyyuŋ nyin +nənyyug mba dənian usham əlyyad əkyo nku nshay nyin ni, sɨkwo nyi san ni, tuza kyaŋ əkwo naŋ nyi ngyoŋ ni. Tuza usham əlyyad əkay ni ə nyî nshyyo san ku, kənaŋ nyi byoŋ əlyyad ənay ni kpəmkpam nio nku shey nyin ni, sə́ kə̀ ŋwwag cucug nyi ku byyo kpaŋtin dag. Nwad, n ŋwwag nyin ətan kyaŋ əwo nsswag wo ntsa nsan ni: Kristi ə hwu dənian əbun zɨd wu wo nad cəcərag bu kyang əkwo shyyo bumi əlyyad Əgwaza na ni. Naŋ əku n niad gu, ə́sɨ dərog bə ngu tuza nwam ntad ku cəcərag bɨ kyaŋ əkwo shyyo bumi əlyyad Əgwaza ka ni. Kristi ə twərag əpyo gu bə Kefas, mbyyaŋ ənied myam ntəm guba swag bə əfyyaŋ ba. Əsɨ bə twərag əpyo gu bə +nənyyug əbyo sswag ci tsswon ni bə njen jyuŋ. Əlyyag ba ənɨ shyyo əced, əwod əyyaŋ ba kə nkay nda. Əsɨ bə twərag əpyo gu bə Yakubu mbyyaŋ kəkəb +əgwag ntəm gu ba. Bə nŋhan wu səlley, əsɨ twərag əpyo gu bə nuŋ naŋ ŋgwon əkyo ə byin əhwad njen ji ni. Nwad, nuŋ ə ndad bəd bə +əgwag ntəm Yesu ba. Ǹ tay əmun ə yoroŋ n əgwag ntəm gu dag. Nwad, nuŋ mmun kə təshug nnwan Əgwaza na. Nwad shog Əgwaza əzo cyyo ngyed kyaŋ əkwo ngyed nini ni, shog gu ji bumi nka ku nad bə kpəd dag. Də kunuŋ əkyo, n sswag kwo nyan məmba bə ntəm na. Sɨm bə ənnyo, nuŋ ə ku nyyo na dag, shog Əgwaza əzo shyyo dunduŋ bə nuŋ ni izo. Kukwo mbyyo, kwo nuŋ ə, kwo ba byo, zɨ shey nyin əlyyad Əgwaza na nio cyyo nyin ŋwwag cucug ni. Nini Kənaŋ ə shey əlyyad dərog Kristi na bə ənied əbyo kən nkwi ni, bɨ yag ə mbyyo əyyaŋ bumi nyi ka ə nyyo də əna mbyyo dərog ənied kwikwi ba dag? Əwod kənaŋ dwwod bə ənied kukwi ku nshyyo dag, ku twərag naŋ əku dərog bɨ Yesu bə əhwu ka dag; Bə kənaŋ əku dərog Yesu bə əhwu ka dag, shey usham əlyyad zɨd ku byyo kpaŋtɨn dag, ənnyǒ bwo ŋwwag tsswo nyin ku byyo kpaŋtɨn dag. Ku twərag naŋ əlyyad kub uma zɨd na tuza Əgwaza ka yed əlyem lyyen nyin kyo. Dənian əka taŋkay kub uma zɨd ku twərag naŋ zɨ shyyo dunduŋ bə Əgwaza u dag. Zɨ kɨ nyo ə dərog bə Kristi bə əhwu ka naŋ ənnyǒ dag. Bə kə ənied kukwi ba ə dərog ba dag, Kristi bwo əmun ə dərog gu dag. Bə kənaŋ ə dərog Kristi dag, ŋwwag tsswo nyi ku byyo kpaŋtɨn dag; kwǒ twərag had nini nyi nɨ shyyo bə katug nyyo nyin ba. Nwad, ənied əbyo kə nkwi bumi Kristi ni, ba kwi ə byyan. Kənaŋ ba swan swad bɨ swanta əkwi nio zɨ mbyyo gbugbag ku dɨ byoŋ tsswo bumi Kristi, bumi ənied ba kəkəb, zɨd byo sswag kwonyan bɨ yed kyaŋ kunag. Əwod bumi cucug əku dərog Kristi bə ənied əba kə nkwi ni. Ngwo ə yed utsa fway ka dɨ dərog bə ənied əbyo kə nkwi ni. Naŋ gag əkwo əhwu ka nŋwwo dunio ku mbwag ətyog ənyyuŋ ni, ənnyǒ bwo dərog ku bə ənied kukwi ba mbay mbwag ətyog ənyyuŋ. Bənaŋ əhwu ka nbay nyyo bumi Adamu ni, ənnyǒ bwo nyyo bumi Kristi kyo kwonyan əna shyyo sɨced ku. Əwod kwonyan bɨ jen bay gu ji. Kristi ə yed ətsa uswon fway u, əwod ənied əbyo yed əsɨn Kristi ba ni, ba na shyyo əced bə njen bwwog bay gu ji. Kukwo nŋhan wu əna mbay kwo twərag, jen əzo Kristi əna nyyeb Əgwaza Əcyo tyog ku ni. Ku na yed jen əzo gwo na ngyurug kwozaŋ shi bɨ ced bɨ tyog ku ə wuyem. Tɨlɨd kwo gwo nyyo tyog gu ku sənaŋ gwo cyyo kəkəb +nəndwan gu ba utag nnio tɨtag gu ba. Nəndwan əwo ə ba nŋhan ə təsherag ni, ngwo yed əhwu ka. "Ənnyǒ bwo gwo nsag kozaŋ nkyaŋ utag tɨtag guba." Naŋ ə ndyurug ni, "Kəkab nkyaŋ na shyyo utag tɨtag Kristi kaŋ bə Əgwaza Əcyo. Jen əzo kwozaŋ kyaŋ na shyyo utag tyog gu ka ni, kukwo ŋgwon ka əpyo ka, əna ŋwwag əpyo gu utag tyog Əcyo əwo cyyo kwo yag ə utag gu ka ni. Kuna yed ənnyo ku ncyyo Əgwaza Əcyo gwô yed kəkəb kwo zaŋ təŋkey kyaŋ tuza nkyaŋ. Bɨ yag ə mbyyo əyyaŋ ənied bə nyin əku nyyo botisma ji dənian ənied ba ba byyo əkə nkwi ni? Kə ə dwwod ənied kukwi ba dag, yag ə mbyyo ba ku nnyyo botisma ji dənian ba ka? Yag ə mbyyo bəd zɨ nshyyo bə əshoŋ əyyi kwozaŋ jen? Kwozaŋ utug nshyyo kpəkpog bə əhwu! Sɨkwi cucug əlyyad ə nshey nyin mmo ntswod fɨriŋ bə nyin, +nənyyug, kwo mbyyo bumi Yesu Kristi Ətyə Uli zɨd wu ni. Yag ə nɨ yed kpaŋtɨn nji bə dɨdam ətyibɨshyi, kənaŋ nkwan bɨ +nyam uyid bə Afisus, kanaŋ ənied kukwi bə dwwog dag? "Yog zɨd ya zɨd sswo, nwad utswon zɨ nɨ kwi." Nyi yog wod ə lyyen nyin dag. "Byyo umyaraŋ bə katug ənied ku nɨ byyan ətan kukwoy." Nyi tswaŋ əpyo nyin, nyî swan swad saŋ əbun. Nyi yog ya uswon bə nyyo katug dag. Dənian əyyaŋ nyin əlyen Əgwaza u dag. Nshey nyin sɨkwɨ ni nyî fəg nsum əpyo nyin. Əwod əyin əna nyyo, "Ənə nyyo ni ə ndwwod ənied kukwi ba? Zaŋ təŋkey lwam kwo bə nə ndərog ndyo?" Nyi nɨ shyyo bə ndyin! Kyaŋ əkwo nyi tɨb ni, kunɨ tǎ dag sə naŋ ku hwu. ³⁷ Lwam kyaŋ əkwo ətɨb ni, kukwo nâ wurug dag, əwod bɨ tswa zo. Ina yəw iyed alkama, kwo kyaŋ yyaŋ zan. Əwod Əgwaza u əna ŋwwag ji lwam bɨ gag əkwo gwo ncad ni, kwo zaŋ tswa bə taŋkey lwam ji ku. Kozaŋ lwam yed kanyyuŋ dag. Də kunuŋ əkyo, lwam ətyibɨshyi ku nshyyo mbyyaŋ sɨn nyam, bə sɨn unwan, bə sɨn fən. Əbyyo ndwam tuza mbyyaŋ əsɨn dunio na. Kɨnkyay shi lwam tuza u əlwwon bə əsɨn dunio wu. Kɨnkyay shi nwam ə nshyyo mbyyaŋ əsɨn zwad, bə əsɨn tə̀ŋgwad. Nwad kozaŋ tə̀ŋgwad, u byyo kɨnkyay shi ka zan. Ənnyǒ ku ndi bɨ dərog ənied kukwi ku. Kyaŋ əkwo ətɨb ni, iyed sɨn byyan kwo, sɨkwo əma dərog ndyo ni, í byyan dag. Ə̀ tɨb ku bumi saŋ shi, əsɨ yorog ku bumi kɨnkyay shi. Ə̀ tɨb ku bumi saŋ nced, əsɨ yorog ku, ku byyo ced. Ə̀ tɨb gu bə ətsag lwam ətyibɨshyi ku, əsɨ dərog gu bə lwam Ntswa Əgwaza. Kə ə mbyyo ətsag lwam, lwam ntswa nɨ nshyyo. Ənnyo ə ndyurug, "Ətsa uswon Adamu wu əku byyo sswon." Nŋhan Adamu u, əsɨ yed Tswa əzo ŋwwad sɨced ni. Əwod əsɨn tswa u, ngwo bɨ tsa bay dag, əsɨn ətsag lwam əwo. Əwod əsɨn ntswa wu əsɨ̂ nsag. Ətsa uswon ətyibɨshyi wu, əyed əshin dunio ə mbɨn nio ə nnyyo gu. Ətyibɨshyi əfyyaŋ u ə nyyo tuza kyo. Bənaŋ ətyə əwo əku nyyo bə mbɨn na ngyed ni, bə ənnyǒ bwo ənied əbyo ə nyyo bə mbɨn na ni ndi. Naŋ ətyə əwo nyyo tuza ka ni ə ngyed ni, ənnyǒ bwo əshin tuza ba ndi. Bənaŋ zɨd mbyyo lwam əkwo tay mbɨn na ni, ənnyo zɨ ba nshyyo tay ətyə tuza u. Nwad ndyyad sɨkwi ni +nəŋyyug mba, ətyibɨshyi bumi nam bə əswog ənâ shyyo ŋwwo Uli Əgwaza ka tuza dag. Ənnyǒ sɨkwo byyan ni, ina kyag ulwo sɨkwo ŋway byyan ni dag. Nyi di! Nshey nyin cucug nkyaŋ ənio əniad ni. Zɨ nɨ kwi kəkəb zɨd dag. Nwad, kəkəb zɨd, əba shay ndwam zɨd na. Əna shay ndwam zɨd na bə əkaday njen naŋ cyyo əyyi nyib ni, bɨ tyab əgwa nŋhan ka. Əwod əba tyab əgwa ka, ənied əbyo əkə nkwi ni ə dərog ba bɨ lwam ŋway byyan ku. Zɨd əbyo shyyo əced ni ə shay ndwam zɨd na ncyyo nfay nio. Naŋ lwam əkwɨ ngyed sɨn byyan ni, tɨlɨd kwo əshay ku ə ncyyo sɨkwo na ŋway byyan ni. Lwam əku yed sɨn əhwu ni, tɨlɨd kwo ə ncyyo sɨkwo na ŋway hwu ni. Kanaŋ lwam əkwi kwo byyan ni ku cyyo sɨkwo ŋway byyan ni. Lwam əkwo kwi ni i sɨ cyyo lwam əkwo ŋway kwi ni, kuna nad cəcərag bɨ kyaŋ əkwo əlyurug ni, nyo "San ku ŋwan əhwu ka." "Əhwu ka san a ku shyyo əji? Əhwu ka, təb aku shyyo əji ə?" Təb əhwu ku katug kwo, əwod tyog katug ku doka zo Əwod zɨ gway bə Əgwaza u, wo ŋwwag zɨd san ku dənian Ətyə Uli zɨd u Yesu Kristi. Əmgbom bə ənnyo, nyin +nanyyug mba byo ncad ni, nyi yoŋ nyî yog zwun dag. Kwo zaŋ njen, nyi ya uswon bɨ nyyo gbədarag ntəm Ətyə Uli na. Nwad, nyi lyen nyyo ntəm nyi na bumi Ətyə Uli na na nâd bə kpəd dag.