¹ Se̱e̱kaa paka tingka Yeeso kweebaaz waza Billəzzǝk. ² Ni pu biisǝnǝn rababaaza Ishaya Annabiya Billǝzzǝk, "Ogum, N tomsapu tómbaaza miiz na asǝ mu', ura gọ'ruska bilaz, ³ "Gweraa der su' doolo rook, gọ'rǝsǝn sǝ i leerǝs bilaa Daa Billǝk." ⁴ Yohana zaa, bo̱'rǝ batisma doolo roo sǝ gǝ bo̱'rə wa'aziya batismaa pu'ka na' nok kinka ra'sǝskaa hakkeirǝk. ⁵ Mariya buta Yahuudiya naa a dǝlla Urushalimai yas i ree ullǝ. Bọ'si batisma womaa urdunnakrǝ, de i doo hakkeiya ii. ⁶ Yohana tǝ' yaluwa i siu naa gǝpta geloobarǝt sǝ pa' wok ullǝ seegrǝ, reka regǝg uki zaasi naa wo̱si. ⁷ Doo bonge, "Ura arǝz pu zakrǝ miirǝ sa' n reks ara n ka gu'un ullǝ dii sǝ n ka binsǝn taga ullǝ dǝntǝiyak pa. ⁸ N bọ'sǝn batisma naa maam, ama ur bọ'sǝkunuu naa Rumsa Billǝs." ⁹ Bọ'rum ru'a eyiro Yeeso keetǝ diga Nazarat buta Galiilittǝ, sǝ Yohana bọ'su batisma womaa Urdunnakrǝ. ¹⁰ De Yeeso keetǝ maamirǝ te', ara paak gbe'rum sǝ Rumsa Billǝs tiitǝ ni goluzak ullǝ paa, ¹¹ gǝ gwera do'tǝ billǝ paa bonge, "Mọọzi waza miirǝ n iiwaz. n gee tingnum naa mọọ wessawe." ¹² Sei Rumsa Billǝs kamu doolo roo. ¹³ Gau doolirǝ roo ru' zu' ittǝi sǝ seetan gwegu. Gau ar mukǝ naa do̱'neta wo̱'sǝt sǝ malaikaiya Billǝi i bo̱'su ina iin yas. ¹⁴ De i kam Yohanaa bọ'rǝ batismaz Yeeso zaa Galiili sǝ doo paka tingka Billǝk, ¹⁵ bonge. "Zo̱o̱r gọ'sapu Gwanta Billǝt sǝǝtǝpu mis. Pu'un na' sǝ i esǝ timr paka tingka Billǝkrǝ." ¹⁶ Pu arkrǝ gbonaa Galiilikrǝ og Siman naa zǝǝza ullǝz Andaraawus mẹ'ẹk yansso gbonarǝ, nok íi kamba duktǝiyi. ¹⁷ Yeeso doosi bonge, "Zan, Duune n yerkǝn kamba mari." ¹⁸ Naa le'ka sine pa i dạạ yansa iis sǝ duwu. ¹⁹ De Yeeso sǝǝ mu' topa, og Yaakubu waza Zabadirǝz naa Yohana zǝǝza ullǝz ɓarkrǝ te' ipu gọ'rǝsǝk yansa iisǝ. ²⁰ Sei deri i dàà daa a iiz Zabadi ɓarkrǝ te' naa tọmbaiya pe'iyai, ii i duu Yeeso. ²¹ Sei i ree Kafarnaahum, Ubla ǝngǝskaa Yahudaawai rǝkrǝ tor rora Billǝllǝ sǝ kubrusǝn. ²² Mǝsǝm kami naa kubruskǝnaa ullǝk, nọk kubrusǝn ni ura naa gbi'kǝmaz goo Biibaiya ii pa. ²³ Arkirǝ maz uza pii na zam. Wo̱o̱tǝ su', ²⁴ "A bo̱'o̱k an naa ee ya Yeeso maza Nazarattaz? A zaa wo̱'o̱skerǝya? N me̱e̱me̱n koo mo̱o̱ ne̱e̱ziya. Mo̱o̱zi maza wessa Billǝz!" ²⁵ Yeeso bi'sǝ màazi bonge, "Rǝǝsǝm, keetǝm ullə zokro!" ²⁶ De zammi ɓa'su dii, zamaroom wo̱o̱ su' paari sǝ kǝǝtǝ ullǝ zokro. ²⁷ Mari yas mǝssǝm kami, i deskǝnkǝn gwanirǝ te' bonge, "Anni ri'ariya? Kubruskǝnaa pǝkkak naa gbi'kǝm! Bi'sǝ zam sǝ duu ina doon." ²⁸ Ni umkpa norak dooma ullǝ paam yas ar koo araya buta Galiili naa ke̱e̱rattǝ. ²⁹ Keetǝkaa iirǝ rora Billǝllǝkki gom sei i ri'gǝ naa Yaakubu naa Yohana Siman naa Andaraawus iirǝ gwa. ³⁰ Mai guneriya Simandǝz pu kinarǝ kunzǝz, wọsu bọ'su. De i dooso Yeeso paka ullǝk. ³¹ Ree, kamu na'rǝ sǝ ruusu, wọsuwi fasu sǝ ma ọski kiisum. ³² De nimz bọ'tǝ, ubla pu dǝ'ǝkrǝ, i kamtǝ mariya na kunt somaso'i naa iya zam kamii. ³³ Mariya dǝllirǝi yas i tookǝn sugognarǝ. ³⁴ Rumgbo iya naa kunt somaso'i (ɓeseɓe'i) sǝ kees mai. Ama dạạ mạiyi sǝ i pag pa nọk i mẹẹu mẹn. ³⁵ Wẹẹ dǝmta nittǝ, ri'gǝ ara maz pin pakrǝ sǝ wẹẹrǝ Bil. ³⁶ Siman naa iya ipu yammai i laagu. ³⁷ I kinu, i doosu gee, "Konẹẹya pu laagẹkarǝ." ³⁸ Doosi gee, "A ri'gǝ ar ukarǝ dǝrmeya kẹẹr kẹ'iirǝ nọka riiki seǝ n zan ari." ³⁹ Kọọlǝ ata Galiilittǝ sǝ doo paka Billǝk iirǝ ro'a Billǝllǝ sǝ kees mai. ⁴⁰ Bǝdǝz uza zaa ullǝ sǝ gu' dii sǝ ooru gee, "Mona iigǝ rumgbume." ⁴¹ Yeesu oksu yirku, sei yii na' a ullǝk sǝ pa'u sǝ doo gee, "Go'sǝm, n iisapu." ⁴² Ni umkpa norak bǝdǝmmi daau, gọ'ọs. ⁴³ Yeeso dinsu to' sǝ wa'u. ⁴⁴ Yeeso doosu bonge, "Kaa doosǝ uza koo una pa, ama rem a yii zura mọọl Firissə, sǝ a esǝ ina dọọkaiya Muusa rǝi i doo gọ'ọskarə paan sǝna gau sedaakum a gọ'sapu." ⁴⁵ Ama mazzi ri'gǝ sǝ ma' doosǝka koo nẹẹya. Faks dooma Yeeso rǝm haa Yeeso le' sǝ kin zakaa ri'gǝttǝ dǝl ularǝ pa: Sei ri'gǝ doolo roo ara sei mari ina laanukrǝ.